യുഎസ് ലോകമഹായുദ്ധത്തിലേക്ക് തള്ളിവിടാന്‍ ശ്രമിക്കുന്നു; ഉത്തരകൊറിയ
യുഎസിനും ദക്ഷിണ കൊറിയയ്ക്കു വിമര്‍ശനവുമായി ഉത്തരകൊറിയ. രണ്ടുരാജ്യങ്ങളും സംയുക്തമായി നടത്തിയ തല്‍സമയ സൈനിക അഭ്യാസത്തിനെതിരെ രൂക്ഷ വിമര്‍ശനവുമായി ഉത്തരകൊറിയ രംഗത്തുവന്നിരിക്കുന്നത്. കൊറിയന്‍ മുനമ്പിനെ ആണവയുദ്ധത്തിന്റെ വക്കിലേക്ക് തള്ളിവിടാനുള്ള ശ്രമമാണ് ഇതിലൂടെ യുഎസ് നടത്തുന്നതെന്ന് അവര്‍ ആരോപിച്ചു. ഉത്തരകൊറിയ ഭൂഖണ്ഡാന്തര ദീര്‍ഘദൂര മിസൈല്‍ പരീക്ഷിച്ച പശ്ചാത്തലത്തിലാണ് യുഎസിന്റെയും ദക്ഷിണകൊറിയുടെയും ഈ സൈനികാഭ്യാസം.
നിയന്ത്രണങ്ങളും ഉപരോധങ്ങളും മറികടന്ന് മിസൈലുകള്‍ പരീക്ഷിക്കുന്നത് ഉത്തരകൊറിയ പതിവാക്കിയ പശ്ചാത്തലത്തില്‍, ഇതിനെതിരായ ശക്തമായ മുന്നറിയിപ്പെന്ന നിലയിലായിരുന്നു തല്‍സമയ സൈനികാഭ്യാസം. 'ശത്രുരാജ്യത്തിന്റെ' മിസൈല്‍ ബാറ്ററികളെ ലക്ഷ്യമിട്ട് രണ്ട് യുഎസ് ബോംബര്‍ വിമാനങ്ങള്‍ നടത്തിയ ആക്രമണമായിരുന്നു സൈനികാഭ്യാസത്തിന്റെ ഏറ്റവും വലിയ സവിശേഷത. ആക്രമണങ്ങളുടെ കൃത്യത പരിശോധിക്കുന്നതിനായി ഭൂമിക്കടിയിലുള്ള ഒളിയിടങ്ങള്‍ ലക്ഷ്യമിട്ട് കൊറിയന്‍ വിമാനങ്ങള്‍ നടത്തിയ അഭ്യാസവും ശ്രദ്ധനേടി. അഭ്യാസത്തിന്റെ ഭാഗമായി ഇരു കൊറിയകളുടെയും അതിര്‍ത്തിക്കു സമീപം യുഎസ് സൈനിക വിമാനങ്ങള്‍ എത്തിയതാണ് ഉത്തരകൊറിയയുടെ കടുത്ത വിമര്‍ശനത്തിന് വഴിവച്ചത്.
ഉത്തരകൊറിയന്‍ സര്‍ക്കാരിന്റെ നിയന്ത്രണത്തിലുള്ള പത്രമായ 'റൊഡോങ്' മുഖപ്രസംഗത്തില്‍ ഇരു രാജ്യങ്ങളുടെയും സൈനീക അഭ്യാസത്തെ ശക്തമായ രീതിയില്‍ വിമര്‍ശിച്ചു. അതീവ അപകടകരമായ സൈനിക പ്രകോപനത്തിലൂടെ കൊറിയന്‍ മുനമ്പിനെ ഒരു ആണവയുദ്ധത്തിന്റെ സാധ്യതയിലേക്ക് തള്ളിവിടാനാണ് യുഎസിന്റെ ശ്രമമെന്നും. ചെറിയൊരു തെറ്റിദ്ധാരണ പോലും ആണവയുദ്ധത്തിനും, പിന്നീട് മറ്റൊരു ലോകമഹായുദ്ധത്തിനും കാരണമാകാനുള്ള സാധ്യത നിലനില്‍ക്കെയാണ് യുഎസും ദക്ഷിണകൊറിയയും ഇത്തരം പ്രകോപനങ്ങള്‍ ആവര്‍ത്തിക്കുന്നതെന്ന് മുഖപ്രസംഗം വിമര്‍ശിച്ച പറഞ്ഞു.
https://www.facebook.com/Malayalivartha
