മോട്ടോര്‍വേ ദുരന്തത്തില്‍ മരിച്ച ഇന്ത്യക്കാരുടെ മൃതദേഹങ്ങള്‍ ഉടന്‍ നാട്ടിലെത്തിക്കും
ബ്രിട്ടനില്‍ വെള്ളിയാഴ്ച രാത്രിയുണ്ടായ മോട്ടോര്‍വേ ദുരന്തത്തില്‍ മരിച്ച രണ്ട് മലയാളികള്‍ ഉള്‍പ്പെടെ എട്ട് ഇന്ത്യക്കാരുടെയും മൃതദേഹങ്ങള്‍ നാട്ടിലെത്തിക്കാന്‍ അടിയന്തര നടപടികള്‍ തുടങ്ങി. അപകടം നടന്ന മില്‍ട്ടണ്‍ കെയിന്‍സില്‍ കൊറോണറുടെ സാന്നിധ്യത്തില്‍ നടന്ന ബന്ധപ്പെട്ടവരുടെ യോഗത്തില്‍ ഇതുവരെയുള്ള നടപടികളുടെ പുരോഗതി വിലയിരുത്തി. തുടര്‍നടപടികള്‍ വേഗത്തിലാക്കി എത്രയുംവേഗം മൃതദേഹങ്ങള്‍ നാട്ടിലെത്തിക്കാനാണു തീരുമാനം.
ഇന്ത്യന്‍ ഹൈക്കമ്മിഷനിലെ സീനിയര്‍ അഡ്മിനിസ്‌ട്രേറ്റീവ് ഓഫിസര്‍ ടി.ഹരിദാസ്, അന്വേഷണ ഉദ്യോഗസ്ഥനായ പൊലീസ് കോണ്‍സ്റ്റബിള്‍ സൈമണ്‍ നെല്‍സണ്‍, പൊലീസ് ചുമതലപ്പെടുത്തിയിട്ടുള്ള ഫാമിലി കോഓര്‍ഡിനേറ്റര്‍, അപകടത്തില്‍ മരിച്ചയാളുകള്‍ ജോലിചെയ്തിരുന്ന വിപ്രോ കമ്പനിയുടെ പ്രതിനിധി, മൃതദേഹങ്ങള്‍ നാട്ടിലെത്തിക്കാന്‍ കരാറെടുത്ത ഫ്യൂണറല്‍ സര്‍വീസ് കമ്പനി പ്രതിനിധികള്‍ തുടങ്ങിയവര്‍ യോഗത്തില്‍ പങ്കെടുത്തു.
മൃതദേഹങ്ങള്‍ കൃത്യമായി തിരിച്ചറിയുക എന്നതാണ് ആദ്യ നടപടി. അപകടത്തിന്റെ ആഘാതത്തില്‍ മൃതദേഹങ്ങള്‍ പലതും ഛിന്നഭിന്നമായ അവസ്ഥയിലായതിനാല്‍ ഡിഎന്‍എ പരിശോധനയിലൂടെയോ വിരലടയാള പരിശോധനയിലൂടെയോ മാത്രമേ തിരിച്ചറിയല്‍ സാധ്യമാകൂ. ഡിഎന്‍എ പരിശോധനയ്ക്കു കൂടുതല്‍ സമയമെടുക്കും.
വിരലടയാള പരിശോധനയിലൂടെ മൃതദേഹങ്ങള്‍ തിരിച്ചറിഞ്ഞാലുടന്‍ മറ്റ് നടപടികള്‍ ഒഴിവാക്കി 'ഔട്ട് ഓഫ് ഇംഗ്‌ളണ്ട് സര്‍ട്ടിഫിക്കറ്റ്' നല്‍കാനാകുമെന്നാണു കൊറോണര്‍ വിശദീകരിച്ചത്. എന്നാല്‍ വാന്‍ െ്രെഡവര്‍ ചേര്‍പ്പുങ്കല്‍ സ്വദേശി സിറിയക് ജോസഫിന്റെ മൃതദേഹം ആവശ്യമായ എല്ലാ പോസ്റ്റ്‌മോര്‍ട്ടം പരിശോധനകള്‍ക്കും വിധേയമാക്കും.
തുടര്‍ന്നുള്ള കേസുകള്‍ക്കും മറ്റും ആവശ്യമായതിനാലാണിത്. മറ്റുള്ളവരുടെ മരണകാരണം മള്‍ട്ടിപ്പിള്‍ ഇന്‍ജുറിയായി കണക്കാക്കിയാകും സര്‍ട്ടിഫിക്കറ്റ് നല്‍കുക. ഇതെല്ലാം ഈയാഴ്ചതന്നെ പൂര്‍ത്തിയാക്കാനാണു തീരുമാനം. ഇതിനിടെ ഇന്ത്യന്‍ ഹൈക്കമ്മിഷനെ പ്രതിനിധീകരിച്ച് അഡ്മിനിസ്‌ട്രേറ്റീവ് ഓഫിസര്‍ ഹരിദാസ്, പരിക്കേറ്റ് ആശുപത്രിയില്‍ കഴിയുന്നവരെ സന്ദര്‍ശിച്ചു.
ഇപ്പോള്‍ വിവിധ ആശുപത്രികളില്‍ ചികില്‍സയില്‍ കഴിയുന്ന അഞ്ചുവയസുള്ള പെണ്‍കുട്ടിയുള്‍പ്പെടെ എല്ലാവരും അപകടനില തരണം ചെയ്തതായാണ് ആശുപത്രി അധികൃതര്‍ നല്‍കുന്ന വിവരം. മൃതദേഹം വിട്ടുകിട്ടിയാലുടന്‍ നോട്ടിങ്ങാമിലെ വീട്ടിലെത്തിച്ചശേഷം നാട്ടിലേക്കു കൊണ്ടുപോകാനാണു സിറിയക് ജോസഫിന്റെ (ബെന്നി) കുടുംബത്തിന്റെ ആഗ്രഹം. ബെന്നിയുടെ കുടുംബം വക്താവായി ചുമതലപ്പെടുത്തിയിട്ടുള്ള മാത്തുക്കുട്ടി ജോണ്‍ എന്നയാളിനെ നടപടിക്രമങ്ങളുടെ പുരോഗതി അറിയിക്കുന്നുണ്ട്.
https://www.facebook.com/Malayalivartha
