മതവിശ്വാസത്തിന്റെയോ വംശീയതയുടേയോ പേരില്‍ മ്യാന്‍മറിനെ ഭിന്നിപ്പിക്കാന്‍ അനുവദിക്കില്ലെന്ന് ഓങ് സാന്‍ സ്യൂകി . ചെറിയൊരു ഭാഗത്തെ പ്രശ്‌നങ്ങളുടെ പേരില്‍ രാജ്യത്തെ മുഴുവനായും വിലയിരുത്തരുതെന്നും മ്യാന്‍മര്‍ നേതാവ് ലോകത്തോട് അഭ്യര്‍ഥിച്ചു. 

നിരവധി മുസ്‌ലിങ്ങള്‍ ഇപ്പോഴും മ്യാന്‍മറില്‍ തുടരുന്നുണ്ട്. രാജ്യത്തെ സ്ഥിതിഗതികള്‍ നേരിട്ട് മനസിലാക്കാന്‍ രാജ്യാന്തര സമൂഹത്തെ ഇവിടേക്ക് സ്വാഗതം ചെയ്യുകയാണ്. ഡോ. കോഫി അന്നന്‍ കമ്മീഷനെ രോഹിംഗ്യന്‍ പ്രശ്‌ന പരിഹാരത്തിനായി സ്വാഗതം ചെയ്യുന്നു. രാജ്യാന്തര ഇടപെടലിനെ മ്യാന്‍മര്‍ ഭയപ്പെടുന്നില്ല. രോഹിംഗ്യ പ്രശ്‌നത്തില്‍ സ്ഥായിയായ പരിഹാരമാണ് രാജ്യം ആഗ്രഹിക്കുന്നതെന്നും സ്യൂകി പറഞ്ഞു. 

പലായനം ചെയ്ത രോഹിംഗ്യ അഭയാര്‍ഥികളുടെ ദുരിതത്തില്‍ രാജ്യം ദുഃഖിക്കുകയാണ്. രോഹിംഗ്യ മുസ്‌ലിങ്ങള്‍ക്കെതിരായ മനുഷ്യാവകാശ ലംഘനത്തെ അപലപിക്കുന്നു. മ്യാന്‍മര്‍ ഒരു സങ്കീര്‍ണ രാജ്യമാണ്. കുറഞ്ഞ സമയത്തിനുള്ളില്‍ എല്ലാ പ്രശ്‌നങ്ങളും പരിഹരിക്കപ്പെടുമെന്നാണ് ജനങ്ങള്‍ പ്രതീക്ഷിക്കുന്നത്. എന്തുകൊണ്ടാണ് കൂട്ടപലായനം ഉണ്ടായതെന്ന് അന്വേഷിച്ച് കണ്ടെത്തും. അഭയാര്‍ഥികളുമായും ചര്‍ച്ചയ്ക്കു തയാറാണെന്നും സ്യൂകി പറഞ്ഞു.

രോഹിംഗ്യ മുസ്‌ലിങ്ങളുടെ വികസനത്തിനായി കേന്ദ്രകമ്മിറ്റിയെ നിയോഗിച്ചിട്ടുണ്ട്. ആരോപണപ്രത്യാരോപണങ്ങള്‍ പൂര്‍ണമായും കേള്‍ക്കും. മതവും വംശവും പരിഗണിക്കാതെ കുറ്റക്കാരെ കര്‍ശനമായും ശിക്ഷിക്കുമെന്നും സ്യൂകി കൂട്ടിച്ചേര്‍ത്തു.

രോഹിംഗ്യ തീവ്രവാദികള്‍ ഓഗസ്റ്റ് 25ന് റാഖൈനിലെ പോലീസ് ചെക്ക്‌പോസ്റ്റുകള്‍ ആക്രമിച്ചതിനെത്തുടര്‍ന്നാണ് ഇപ്പോഴത്തെ സംഘര്‍ഷം ഉടലെടുത്തത്. സൈന്യവും ഭൂരിപക്ഷ സമുദായക്കാരും ചേര്‍ന്ന് രോഹിംഗ്യകളെ വേട്ടയാടാന്‍ തുടങ്ങി. നിരവധി ഗ്രാമങ്ങള്‍ സൈന്യം ചുട്ടെരിച്ചു. സ്ത്രീകളെയും കുട്ടികളെയും ആക്രമിക്കുകയും പലരെയും കൊലപ്പെടുത്തുകയും ചെയ്തിരുന്നു .