ഭീകരരുടെ പിടിയില്‍നിന്നും മോചിതനായ ഫാ.ടോം ഉഴുന്നാലില്‍ ഭീകരരോടൊപ്പമുള്ള ആ 18 മാസം നിറഞ്ഞ ചിരിയോടെയാണ് പറഞ്ഞത്. 18 മാസം ദുരിതാനുഭവങ്ങള്‍ സമ്മാനിച്ച ഭീകരര്‍ക്ക് വേണ്ടി താന്‍ പ്രാര്‍ത്ഥിക്കുന്നുവെന്ന് ഫാ.ടോം പറഞ്ഞു. ഭീകരര്‍ തന്നെ ഉപദ്രവിച്ചിട്ടില്ല. തനിക്ക് പനി വന്നപ്പോള്‍ പാരസറ്റമോള്‍ നല്‍കിയെന്നും ഫാ.ടോം പറഞ്ഞു.
ചെറിയൊരു മുറിയിലായിരുന്നു താന്‍ കിടന്നിരുന്നത്. ക്യത്യസമയങ്ങളില്‍ തന്നെ ഭീകരര്‍ ഭക്ഷണം നല്‍കിയിരുന്നു. കുബ്ബൂസും ബിരിയാണിയുമാണ് അവര്‍ തനിക്ക് ദിവസവും നല്‍കിയിരുന്നത്. കഴിക്കുമ്പോള്‍ കണ്ണ് ചെറുതായൊന്ന് പൊക്കി നോക്കാന്‍ അനുവദിക്കുമായിരുന്നുവെന്ന് ഫാ ടോം പറഞ്ഞു.
ചില ദിവസങ്ങളില്‍ മുട്ട പുഴുങ്ങിയതും ഭീകരര്‍ തരാറുണ്ടായിരുന്നു.മുറികളില്‍ പറ്റുന്ന വ്യായാമമൊക്കെ ചെയ്യാനും അവര്‍ സമ്മതിച്ചിരുന്നു.ഭീകരര്‍ തന്നെ വേദനിപ്പിച്ചില്ല.ശത്രുക്കളെ പോലും സ്‌നേഹിക്കണമെന്നാണ് ക്രിസ്തു പഠിപ്പിച്ചിട്ടുള്ള ഭീകരരോട് ക്ഷമിക്കുക എന്നത് സ്വാഭാവികമല്ല. ആദ്യദിവസം മുതലെ അവര്‍ക്ക് വേണ്ടി പ്രാര്‍ത്ഥിക്കുന്നുവെന്നും ഫാ ടോം പറഞ്ഞു.