കാനഡയിലെ ഏറ്റവും വലിയ മൂന്ന് രാഷ്ട്രീയ പാര്‍ട്ടികളിലൊന്നിന്റെ നേതാവായി സിക്ക് വംശജനെ തിരഞ്ഞെടുത്തു. ജഗ്മീത് സിംഗ് (38) എന്ന അഭിഭാഷകനാണ് കാനഡയിലെ ന്യൂഡെമോക്രാറ്റിക് പാര്‍ട്ടിയുടെ തലപ്പത്തെത്തിയത്. ഇതോടെ 2019ല്‍ നടക്കുന്ന ഫെഡറല്‍ തിരഞ്ഞെടുപ്പില്‍ ജഗ്മീത് ആയിരിക്കും എന്‍.ഡി.പിയുടെ പ്രധാനമന്ത്രി സ്ഥാനാര്‍ത്ഥിയായി മത്സരിക്കുക.

എന്‍ഡി.പിയുടെ നേതൃത്വത്തിലെത്തുന്ന ആദ്യ ഇന്ത്യാക്കാരനും ന്യൂനപക്ഷ വിഭാഗക്കാരനും ജഗ്മീത് സിംഗാണ്. പാര്‍ട്ടിയുടെ നേതാവായി തിരഞ്ഞെടുക്കപ്പെടുന്നതിനായുള്ള വോട്ടെടുപ്പിന്റെ ആദ്യ റൗണ്ടില്‍ തന്നെ ജഗ്മീത് വിജയിച്ചിരുന്നു. പാര്‍ട്ടിയുടെ നേതൃത്വ പദവിയില്‍ എത്തുന്നതിനായി 50 ശതമാനം വോട്ടാണ് വേണ്ടിയിരുന്നത്.

എന്നാല്‍, ആദ്യ റൗണ്ടില്‍ തന്നെ ജഗ്മീത് 50 ശതമാനത്തിലേറെ നേടുകയായിരുന്നു. അതിനാല്‍ തന്നെ ഒക്ടോബര്‍ 8ന് നടക്കുന്ന രണ്ടാംഘട്ട വോട്ടെടുപ്പിന്റെ ആവശ്യം ഉണ്ടാവില്ല. സിംഗിനെ കൂടാതെ മൂന്ന് പേരാണ് മത്സരരംഗത്തുണ്ടായിരുന്നത്. 65,000 പേര്‍ വോട്ട് രേഖപ്പെടുത്തിയതില്‍ 35,000ലേറെ വോട്ടുകള്‍ സിംഗിന് ലഭിച്ചു.

തനിക്ക് ലഭിച്ച ഏറ്റവും വലിയ ബഹുമതിയാണ് ഇതെന്ന് ജഗ്മീത് സിംഗ് പ്രതികരിച്ചു. 2019ല്‍ കാനഡയെ നയിക്കാനുള്ള മത്സരം താന്‍ ഇവിടെ നിന്ന് തുടങ്ങുകയാണെന്നും അദ്ദേഹം പറഞ്ഞു. ജനങ്ങള്‍ അനുഭവിക്കുന്ന പ്രശ്‌നങ്ങള്‍ മനസിലാക്കുന്ന ഒരു സര്‍ക്കാരാണ് കാനഡയ്ക്ക് ആവശ്യം. ഈ ഒരു സാഹചര്യത്തിലാണ് താന്‍ പ്രചാരണം തുടങ്ങുന്നതെന്നും അദ്ദേഹം പറഞ്ഞു.