സാധാരണ രോമം വളരാറുള്ള ശരീരഭാഗത്തോ ഭാഗങ്ങളിലോ, പ്രത്യേകിച്ച് തലയിൽ, രോമം ഇല്ലാതിരിക്കുന്ന അവസ്ഥയാണ് കഷണ്ടി. ഇതിൻറെ ഏറ്റവും സാധാരണമായ പ്രത്യക്ഷം, തലയിൽ ക്രമേണ മുടി നഷ്ടപ്പെടുന്ന ആൺ മാതൃക കഷണ്ടി ആണ്. മനുഷ്യരിൽ, പ്രായപൂർത്തിയായ പുരുഷന്മാരിലാണ് ഈ അവസ്ഥ കൂടുതലും കണ്ടുവരുന്നത്. വ്യാപ്തിയിലും രൂപത്തിലും വ്യത്യസ്തമായ ഇനം കഷണ്ടികളുണ്ട്.

ഏതുതരം കഷണ്ടിയാണെങ്കിലും അത് ആളുകളെ വിഷമത്തിലാക്കും. കഷണ്ടി ഒരു സിനിമാതാരത്തിനായാലോ...പിന്നെ പറയുകയും വേണ്ട. ഈ പ്രശ്‌നം സദാ അലട്ടിക്കൊണ്ടിരിക്കും. ഇന്ന് പലരും കഷണ്ടി മാറാൻ സർജറി ചെയ്യാറുണ്ട്. അതുപോലെ സർജറി ചെയ്തു ആകെ പ്രശ്നത്തിലായിരിക്കുകയാണ് പ്രശസ്ത പാക് സിനിമാതാരവും എഴുത്തുകാരനുമായ സയീദ് സാജിദ് ഹസന്‍. തലമുടി വച്ചുപിടിപ്പിക്കല്‍ ശസ്ത്രക്രിയയ്ക്കു ശേഷമുള്ള അനുഭവം സയീദ് ഈയടുത്ത് സമൂഹ മാധ്യമങ്ങളിലൂടെ പങ്കുവെച്ചിരുന്നു. ശസ്ത്രക്രിയയ്ക്ക് പിന്നാലെ തന്റെ തലയില്‍ അണുബാധ ഉണ്ടായെന്നും എന്നാല്‍ അത് ചികിത്സിച്ചു മാറ്റാനാവശ്യമായ ചികിത്സകള്‍ നടത്താന്‍ തന്റെ ഡോക്ടര്‍ തയ്യാറായില്ലെന്നും ഹസന്‍ വീഡിയോ സന്ദേശത്തില്‍ ആരോപിക്കുന്നു.

"ഒൻപത് വര്‍ഷം മുമ്പാണ് തന്റെ പരിചയത്തിലുളള ഒരു ഡോക്ടര്‍ ഹെയര്‍ ട്രാന്‍സ്പ്ലാന്റ് ചെയ്യട്ടെ എന്ന് തന്നോട് ചോദിച്ചത്. ഇതിന് വേണ്ടി ഡോക്ടര്‍ തന്നെ നിരന്തരം നിര്‍ബന്ധിച്ചിരുന്നു. അന്ന് തനിക്ക് താല്‍പര്യമുണ്ടായിരുന്നില്ല. എന്നാല്‍ രണ്ട് മാസം മുന്‍പ് ശസ്ത്രക്രിയ ചെയ്യാന്‍ തയ്യാറാണെന്ന് ഡോക്ടറെ അറിയിച്ചു. ശസ്ത്രക്രിയ ആരംഭിച്ചു. എന്നാല്‍ ശസ്ത്രക്രിയയ്ക്ക് മുന്‍പ് യാതൊരു വിധത്തിലുള്ള മെഡിക്കല്‍ പരിശോധനകളും ഡോക്ടര്‍ നടത്തിയിരുന്നില്ല. ശസ്ത്രക്രിയയുടെ ആദ്യഘട്ടം കഴിഞ്ഞതിനു പിന്നാലെ തലയില്‍ വളരെ ഗുരുതരമായ അണുബാധ ഉണ്ടായി. അതുകഴിഞ്ഞ് കടുത്ത പനിമൂലം പത്ത് ദിവസത്തോളം ആശുപത്രിയില്‍ ചികിത്സയില്‍ കിടന്നു. പനി ഗുരുതരമായിട്ടും അത് സ്വാഭാവികമാണെന്നായിരുന്നു ഡോക്ടറുടെ പ്രതികരണം.

അണുബാധയ്ക്ക് വിദഗ്ധ ചികിത്സ ലഭ്യമാക്കുന്നതിന് പകരം ഉപ്പു കലര്‍ന്ന വെള്ളം കൊണ്ട് കഴുകുക മാത്രമാണ് ചെയ്തത്. അണുബാധയേറ്റ തലയുടെ ഭാഗം ഹസന്‍ വീഡിയോയില്‍ കാണിക്കുന്നുണ്ട്. ഇത് മൂലം താന്‍ ഏറെ ദുരിതം അനുഭവിച്ചു.ഡോക്ടറുടെ അവഗണന തന്നെയാണ് അണുബാധ ഇത്രയും രൂക്ഷമാവാന്‍ കാരണം.ഇതുമൂലം കഴിഞ്ഞ രണ്ട് മാസമായി തന്റെ ജോലിയിലും ജീവിതത്തിലും വലിയ ദുരിതമാണ് അനുഭവിക്കുന്നത്. ഹെയര്‍ ട്രാന്‍സ്പ്ലാന്റ് ചെയ്യാന്‍ ആഗ്രഹിക്കുന്നവര്‍ നല്ല ഡോക്ടറെ തന്നെ സമീപിക്കണം. ശസ്ത്രക്രിയയ്ക്ക് മുന്‍പ് ഇതിനെ കുറിച്ച്‌ വിശദമായി പഠിക്കണം. തെറ്റായ ഡോക്ടറെ ഹെയര്‍ ട്രാന്‍സ്പ്ലാന്റിനു വേണ്ടി തിരഞ്ഞെടുത്താല്‍ പിന്നീടുള്ള അവസ്ഥ ഇങ്ങനെയായിരിക്കും."- സയീദ് പറഞ്ഞു.