കളമശ്ശേരിയില്‍ യുവതിയെ രാസലഹരി നല്‍കി കൂട്ടബലാത്സംഗം ചെയ്ത സംഭവം..രണ്ടു പ്രതികൾ ഇപ്പോഴും കാണാമറയത്ത്..കൂടുതല്‍ ഉപദ്രവിച്ചത് കൂടെയുണ്ടായിരുന്ന സ്ത്രീ..
കളമശ്ശേരിയില്‍ സ്പായില്‍ ജോലി നല്‍കാമെന്ന് വാഗ്ദാനം ചെയ്ത് യുവതിയെ കൂട്ടബലാത്സംഗം ചെയ്ത സംഭവത്തിന് പിന്നില്‍ വന്‍ ആസൂത്രണമെന്ന് പൊലീസ്. യുവതിയുടെ പങ്കാളി ടാക്‌സി ഓടിക്കാന്‍ പോയെന്ന് ഉറപ്പാക്കിയ ശേഷമാണ് അതിജീവിതയെ വാഹനമയച്ച് സ്പായിലേക്ക് വിളിച്ചുവരുത്തിയതെന്നാണ് പൊലീസിന്റെ കണ്ടെത്തല്‍. പീഡനത്തിന് ശേഷം തിരികെ പോകുന്നതിനായി പ്രതികള്‍ യുവതിക്ക് പുതിയ വസ്ത്രങ്ങള്‍ വാങ്ങി നല്‍കിയതായും പൊലീസ് പറഞ്ഞു.തന്നെ ഏറ്റവും കൂടുതല്‍ ഉപദ്രവിച്ചത് കേസിലെ രണ്ടാം പ്രതിയായ യുവതിയാണെന്നാണ് അതിജീവിതയുടെ പ്രാഥമിക മൊഴി.
രാസലഹരി നല്‍കിയ ശേഷമാണ് തന്നെ ബലാത്സംഗം ചെയ്തതെന്നും യുവതി മൊഴി നല്‍കിയിട്ടുണ്ട്. സ്പായുടെ മറവില്‍ പ്രതികള്‍ നേരത്തെയും യുവതികളെ ഉപദ്രവിച്ചിട്ടുണ്ടോയെന്നും സെക്‌സ് റാക്കറ്റുമായി ബന്ധമുണ്ടോയെന്നും പൊലീസ് അന്വേഷിക്കുന്നുണ്ട്.സംഭവത്തിന് പിന്നാലെ യുവതിക്ക് ആരെയും തിരിച്ചറിയാൻ കഴിയാത്ത അവസ്ഥയാണെന്നും ഭർത്താവ് പറഞ്ഞു. യുവതിയെ റൂമിൽ തടഞ്ഞുവച്ച് ക്രൂരമായി ഉപദ്രവിച്ചെന്നും കൊല്ലുമെന്ന് ഭീഷണിപ്പെടുത്തിയെന്നും അദ്ദേഹം വ്യക്തമാക്കി.
ഐസ്ക്രീമിലാണ് ആദ്യം മയക്കുമരുന്ന് കലർത്തി നൽകിയതെന്നാണ് ഭർത്താവിന്റെ വെളിപ്പെടുത്തൽ. മയക്കുമരുന്ന് നൽകിയ ശേഷം യുവതിയെ റൂമിൽ തടഞ്ഞുവച്ച് ക്രൂരമായി പീഡിപ്പിക്കുകയായിരുന്നു.കേസില്‍ രണ്ട് പേരെ പൊലീസ് അറസ്റ്റ് ചെയ്തു. ആലപ്പുഴ സ്വദേശി ശ്രീരാജ്, എറണാകുളം സ്വദേശി ജിത്ത് മാര്‍ട്ടിന്‍ എന്നിവരാണ് അറസ്റ്റിലായത്. കേസിലെ രണ്ടാം പ്രതിയായ യുവതിയും നാലാം പ്രതിയും നിലവില്‍ ഒളിവിലാണ്. ഇവര്‍ക്കായി പൊലീസ് അന്വേഷണം ഊര്‍ജിതമാക്കി.
അതിജീവിത ഇപ്പോഴും ആശുപത്രിയില്‍ ചികിത്സയിലാണ്. ശരീരത്തില്‍ മുറിവുകളുണ്ടെന്നാണ് പൊലീസ് വ്യക്തമാക്കിയത്. ആരോഗ്യനില മെച്ചപ്പെട്ട ശേഷം യുവതിയുടെ വിശദമായ മൊഴി രേഖപ്പെടുത്തും. സംഭവത്തിന് പിന്നില്‍ സെക്‌സ് റാക്കറ്റ് പ്രവര്‍ത്തിച്ചിരുന്നോയെന്നതും അന്വേഷിക്കുന്നതായി സിറ്റി പൊലീസ് കമ്മീഷണര്‍ അറിയിച്ചു.കൊച്ചിയിലെ സ്പായില്‍ മാനേജരെ ആവശ്യമുണ്ടെന്ന ഒഎല്‍എക്‌സ് പരസ്യം കണ്ടാണ് യുവതി പ്രതികളെ ഫോണില്‍ ബന്ധപ്പെട്ടത്. ഈ മാസം രണ്ടിന് പത്തടിപ്പാലത്തെ സ്പായില്‍ അഭിമുഖത്തിനായി എത്താന്‍ പ്രതികള്‍ ആവശ്യപ്പെട്ടു.
അഭിമുഖത്തിന് ശേഷം വീട്ടിലേക്ക് മടങ്ങിയ യുവതിയെ വൈകുന്നേരം ഇടപ്പള്ളിയിലെ ലോഡ്ജിലേക്ക് വീണ്ടും വിളിച്ചുവരുത്തുകയായിരുന്നു.ലോഡ്ജിലെത്തിയ യുവതിക്ക് ആദ്യം മദ്യം നല്‍കിയതായും പിന്നീട് നിര്‍ബന്ധിച്ച് ലഹരിമരുന്ന് നല്‍കിയതായുമാണ് പരാതി.
https://www.facebook.com/Malayalivartha
