രാജ്യതലസ്ഥാനത്ത് പ്രതിപക്ഷ പ്രതിഷേധത്തിനിടെ രാഹുലും പ്രിയങ്കയും അറസ്റ്റില്‍
മുഖ്യ തിരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് ഡല്‍ഹിയില്‍ നടന്ന പ്രതിപക്ഷ പ്രതിഷേധത്തിനിടെ കോണ്‍ഗ്രസ് നേതാക്കളായ രാഹുല്‍ ഗാന്ധിയെയും പ്രിയങ്ക ഗാന്ധിയെയും പൊലീസ് കസ്റ്റഡിയിലെടുത്തു. തിരഞ്ഞെടുപ്പ് കമ്മീഷന്‍ ആസ്ഥാനത്തിന് സമീപം നടന്ന പ്രതിഷേധം മണിക്കൂറുകള്‍ നീണ്ടതോടെ പ്രദേശത്ത് സംഘര്‍ഷാവസ്ഥയാണ്. പൊലീസ് വാഹനത്തില്‍ കയറ്റിയ പ്രിയങ്ക എന്നാല്‍ വാഹനത്തില്‍ നിന്ന് പുറത്തിറങ്ങി പ്രതിഷേധസ്ഥലത്തേക്ക് മടങ്ങിയെത്തി. ആകാശവാണി ഭവന് സമീപമാണ് പ്രതിഷേധത്തിനിടെ നാടകീയ രംഗങ്ങള്‍ അരങ്ങേറിയത്.
കോണ്‍ഗ്രസ് നേതൃത്വത്തില്‍ നടന്ന മാര്‍ച്ചില്‍ വോട്ടര്‍പട്ടികയുമായി ബന്ധപ്പെട്ട ക്രമക്കേടുകള്‍ ആരോപിച്ചാണ് പ്രതിഷേധം സംഘടിപ്പിച്ചത്. പ്രതിഷേധക്കാരെ പൊലീസ് സ്ഥലത്തുനിന്ന് നീക്കുന്നതിനിടെയാണ് രാഹുലിനെയും പ്രിയങ്കയെയും കസ്റ്റഡിയിലെടുത്തത്. നിരവധി പ്രതിപക്ഷ എം.പിമാരെയും പൊലീസ് കസ്റ്റഡിയിലെടുത്തു.
പ്രതിഷേധത്തിനിടെ പൊലീസ് സ്ഥാപിച്ച ബാരിക്കേഡിന് മുകളിലേക്ക് രാഹുല്‍ ഗാന്ധി കയറി. ദേശീയപതാകയുമായി പ്രതിഷേധക്കാര്‍ക്ക് അഭിവാദ്യം ചെയ്ത ശേഷം അദ്ദേഹം സമരസ്ഥലത്ത് തുടരുകയായിരുന്നു. പൊലീസ് രാഹുലിനെ കസ്റ്റഡിയിലെടുത്ത് വാഹനത്തില്‍ കയറ്റിയെങ്കിലും പിന്നീട് അദ്ദേഹം വാഹനത്തില്‍ നിന്ന് പുറത്തിറങ്ങി വീണ്ടും പ്രതിഷേധസ്ഥലത്തെത്തി. തുടര്‍ന്ന് വീണ്ടും പൊലീസ് കസ്റ്റഡിയിലെടുത്തു. രാഹുലിനെ അറസ്റ്റുചെയ്ത് നീക്കുന്നത് തടയാന്‍ പ്രതിപക്ഷ എം.പിമാര്‍ അദ്ദേഹത്തിന് ചുറ്റും നിലയുറപ്പിച്ചെങ്കിലും പൊലീസ് ഇടപെട്ട് എം.പിമാരെയും വാഹനത്തില്‍ കയറ്റുകയായിരുന്നു.
https://www.facebook.com/Malayalivartha
