പ്രതിശ്രുത വധുവിനെ കാണാന്‍ ഷാര്‍ജ വിമാനത്താവളത്തില്‍ നുഴഞ്ഞു കയറിയ ഇന്ത്യക്കാരൻ പിടിയിൽ. വിമാനത്താവളത്തിന്റെ മതില്‍ ചാടികടന്ന് റണ്‍വെയിലുണ്ടായ വിമാനത്തില്‍ കയറാന്‍ ശ്രമിക്കുകയായിരുന്നു. തന്റെ പ്രതിശ്രുത വധുവിനെ കാണാന്‍ വേണ്ടിയാണ് ഇത്തരത്തില്‍ വിമാനത്തില്‍ കയറാന്‍ ശ്രമിച്ചതെന്നാണ് യുവാവ് പറയുന്നത്.

26 കാരനായ ആര്‍കെയാണ് ഷാര്‍ജ പോലീസ് പിടിയിലായത്. ഇയാളുടെ പക്കല്‍ പാസ്പോര്‍ട്ടും ഉണ്ടായിരുന്നില്ല. ആയതിനാൽ സുരക്ഷ ഉദ്യോഗസ്ഥര്‍ യുവാവിനെ പിടികൂടുകയായിരുന്നു.

എന്നാല്‍ തന്റെ നടപടിയില്‍ ഒട്ടും ഖേദമില്ലെന്നും സ്നേഹപ്രകടനത്തിന്റെ ഭാഗമാണെന്നും യുവാവ് അധികൃതരോട് വ്യക്തമാക്കി. തന്റെ പ്രതിശ്രുത വധുവിനെ കാണാനായി ഇന്ത്യയിലേക്ക് മടങ്ങാന്‍ വേണ്ടിയാണ് താന്‍ ഇത്തരത്തില്‍ പ്രവര്‍ത്തിച്ചതെന്ന് ആര്‍കെ പറയുന്നു. ഇതിന് എന്ത് പിഴ വേണമെങ്കിലും താന്‍ അടയ്ക്കാമെന്നും യുവാവ് കൂട്ടിക്കിച്ചേർത്തു.

തന്റെ കൂടെ ഉണ്ടായിരുന്നവരെ അറിയിക്കാതെ ഇന്ത്യയില്‍ പോകാനാണ് തീരുമാനിച്ചത്. ഇതിനായി ആരുമറിയാതെ ഇറങ്ങിയപ്പോള്‍ പേഴ്സ് മാത്രമാണ് എടുത്തതെന്ന് വിചാരണയ്ക്കിടെ ഇയാള്‍ കോടതിയില്‍ പറഞ്ഞു. വിമാനത്താവളത്തിന്റെ മതില്‍ ചാടിക്കടന്ന് റണ്‍വേയില്‍ പുറപ്പെടാന്‍ നിന്ന വിമാനത്തിലാണ് യുവാവ് കയറാന്‍ ശ്രമിച്ചത്. ഇയാളുടെ പാസ്പോര്‍ട്ട് ജോലി ചെയ്യുന്ന സ്ഥാപനത്തിലാണെന്നും വിവരമുണ്ട്.

പ്രതിശ്രുതവധുവും എഞ്ചിനീയറും യുഎഇയിലായിരുന്നെങ്കിലും ഇരുവര്‍ക്കും പരസ്പരം കാണാനുള്ള സാഹചര്യമുണ്ടായിരുന്നില്ല. പ്രതിശ്രുത വധുവിനൊപ്പം നാട്ടിലേക്ക് തിരിക്കാന്‍ ബന്ധുക്കളുടെ ഉടമസ്ഥതയിലുള്ള ജോലി ചെയ്യുന്ന സ്ഥാപനത്തോട് നിരവധി തവണ അനുമതി തേടിയെങ്കിലും ലീവ് നല്‍കിയിരുന്നില്ല.

തുടര്‍ന്നാണ് യുവാവ് സാഹസത്തിന് തയ്യാറായത്. അതേ സമയം ഇരുവരും തമ്മിലുള്ള വിവാഹത്തിന് യുവാവിന്റെ വീട്ടുകാര്‍ക്ക് താത്പര്യമില്ലെന്നും ഇയാള്‍ സൂചിപ്പിച്ചു. ഇതേ തുടര്‍ന്നാണ് തന്നെ നാട്ടിലേക്ക് വിടാതെ തടഞ്ഞുവെച്ചിരിക്കുന്നതെന്നും ഇയാള്‍ പോലീസിനോട് പറഞ്ഞു.