മോസ്കോയിലെ ദോമോദെദോവ് വിമാനത്താവളത്തില്നിന്ന് പറന്നുയര്ന്ന റഷ്യന്വിമാനം തകര്ന്നുവീണ് 65 യാത്രക്കാരും ആറ് ജീവനക്കാരും ഉള്പ്പെടെ 71 മരണം
മോസ്കോയിലെ ദോമോദെദോവ് വിമാനത്താവളത്തില്നിന്ന് പറന്നുയര്ന്ന റഷ്യന് വിമാനം തകര്ന്നുവീണ് 65 യാത്രക്കാരും ആറ് ജീവനക്കാരുമുള്പ്പെടെ 71 പേര് മരിച്ചു. മോസ്കോയില്നിന്ന് 80 കി.മീറ്റര് അകലെ അര്ഗുനോവോ ഗ്രാമത്തിലാണ് വിമാനം പതിച്ചത്. പറന്നുപൊങ്ങി അഞ്ചുമിനിറ്റിനുശേഷം 3000 അടി ഉയരത്തില്വെച്ചാണ് വിമാനം തകര്ന്നതെന്ന് റിപ്പോര്ട്ട്.
ഉയര്ന്ന് രണ്ടു മിനിറ്റിനകംതന്നെ വിമാനം റഡാറില് നിന്ന് അപ്രത്യക്ഷമായതായും ഔദ്യോഗിക വൃത്തങ്ങള് അറിയിച്ചു. സംഭവത്തില് റഷ്യന് സര്ക്കാര് അന്വേഷണം ആരംഭിച്ചു. സരാദോവ് എയര്ലൈന്സിന്റ പ്രദേശിക സര്വിസ് നടത്തുന്ന അന്േറാനോവ് എ.എന്148 ജെറ്റ് വിമാനം ഉരാല്സ് നഗരത്തിലെ ഒര്സ്കിലേക്കുള്ള യാത്രയിലായിരുന്നു. മഞ്ഞില് വീണുകിടക്കുന്ന വിമാനാവശിഷ്ടങ്ങളുടെ ദൃശ്യങ്ങള് റഷ്യന് ടെലിവിഷന് പുറത്തുവിട്ടു.
കത്തിക്കരിഞ്ഞ വിമാനം കണ്ടതായി പ്രദേശവാസികളും സാക്ഷ്യപ്പെടുത്തുന്നു. ദിവസങ്ങളായി കനത്ത മഞ്ഞുവീഴ്ചയുടെ പിടിയിലാണ് റഷ്യ. അന്തരീക്ഷത്തിലെ കാഴ്ച മങ്ങിയിരിക്കുകയാണ്. അപകടത്തിലേക്ക് നയിച്ചത് ഇതോ മാനുഷികമായി സംഭവിച്ച തെറ്റോ ആയിരിക്കാമെന്ന കണക്കുകൂട്ടലിലാണ് അധികൃതര്.
അപകടസ്ഥലത്തേക്ക് റോഡ് മാര്ഗം എത്തിപ്പെടാന് പ്രയാസമായതിനാല് കാല്നടയായാണ് രക്ഷാപ്രവര്ത്തകര് എത്തിയതെന്ന് റഷ്യന് മാധ്യമങ്ങള് റിപ്പോര്ട്ട് ചെയ്തു. വിമാനാപകടങ്ങള് റഷ്യയില് പതിവായിരിക്കുകയാണ്. നവംബറിലുണ്ടായ അപകടത്തില് ആറുപേര് കൊല്ലപ്പെട്ടിരുന്നു. 2016 ഡിസംബറില് സൈനികവിമാനം തകര്ന്നുവീണ് 92 പേരും കൊല്ലപ്പെട്ടു.
https://www.facebook.com/Malayalivartha
