സ്വന്തം പാര്‍ട്ടി പ്രഖ്യാപിച്ച്് രാഷ്ട്രീയത്തില്‍ ഇറങ്ങാനുള്ള തീരുമാനത്തിനിടെ ലഷ്‌കര്‍ ഭീകരന്‍ ഹാഫിസ് സയ്യിദിനെ പാക്കിസ്ഥാന്‍ തീവ്രവാദിയായി പ്രഖ്യാപിച്ചു. മുംബൈ ഭീകരാക്രമണത്തിന്റെ സൂത്രധാരന്‍ ഹഫീസ് സയ്യിദിനെ തീവ്രവാദിയായി പ്രഖ്യാപിക്കണമെന്നും തങ്ങള്‍ക്ക് കൈമാറണമെന്നും ഇന്ത്യ ആവശ്യപ്പെടാന്‍ തുടങ്ങിയിട്ട് വര്‍ഷങ്ങളായി. തീവ്രവാദ വിരുദ്ധനിയമം ഭേദഗതി ചെയ്താണ് പാക് സര്‍ക്കാര്‍ പുതിയ നടപടി സ്വീകരിച്ചത്. ഭേദഗതിയില്‍ പാക് പ്രസിഡന്റ് മംമ്‌നൂണ്‍ ഹുസൈന്‍ ഒപ്പിട്ടു. ഇതോടെ യു.എന്‍ നിരോധിച്ച സംഘടനകള്‍ക്കും നിരോധനം ബാധകമാകും. അന്താരാഷ്ട്ര സമ്മര്‍ദ്ദത്തെ തുടര്‍ന്നാണ് പാകിസ്ഥാന്‍ പുതിയ തീരുമാനം എടുത്തത്. ഇത് പ്രകാരം യു.എന്‍ രക്ഷാസമിതിയുടെ നിരോധിത പട്ടികയിലുള്ള സംഘടനകളെയും വ്യക്തികളെയും 1997ലെ ഭീകരവിരുദ്ധ നിയമത്തിന്റെ പരിധിയിലാകും.

2008ല്‍ അമേരിക്ക സയ്യിദിനെ അന്താരാഷ്ട്ര ഭീകരനായി പ്രഖ്യാപിച്ചിരുന്നു. അവര്‍ ഒരു കോടി ഡോളറാണ് സയ്യിദിന്റെ തലയ്ക്ക് പ്രഖ്യാപിച്ചിട്ടുണ്ട്. ഇതേ തുടര്‍ന്ന് വീട്ടുതടങ്കലിലായിരുന്ന സയ്യിദിനെതിരെ തെളിവുകള്‍ ഇല്ലെന്ന് പറഞ്ഞ് പാക് സര്‍ക്കാര്‍ കഴിഞ്ഞ മാസം മോചിപ്പിക്കുകയായിരുന്നു.
പുതിയ നിയമം കൊണ്ട് ഹാഫിസ് സയ്യദിന് എന്ത് സംഭവിക്കുമെന്നതാണ് ഇന്ത്യ ഉള്‍പ്പെടെയുള്ള ലോകരാഷ്ട്രങ്ങള്‍ കാത്തിരിക്കുന്നത്. പാകിസ്ഥാന്‍ ഭീകരര്‍ക്ക് സഹായം ചെയ്യുന്നെന്ന് കണ്ടെത്തിയതിനെ തുടര്‍ന്ന് അമേരിക്ക സാമ്പത്തിക സഹായം നിര്‍ത്തലാക്കിയിരുന്നു. അതാണ് പെട്ടെന്ന് ഇങ്ങിനെയൊരു തീരുമാനം എടുക്കാനുള്ള കാരണമെന്ന് അറിയുന്നു. 2008ലെ മുംബയ് ഭീകരാക്രമണത്തിന്റെ മുഖ്യസൂത്രധാരനാണ് ഹാഫിസ് സയ്യിദ്. ആക്രമണത്തില്‍ വിദേശികള്‍ ഉള്‍പ്പെടെ 166 പേരാണ് കൊല്ലപ്പെട്ടത്.