ചൈനയിലെ നിരവധി യുഎസ് നയതന്ത്രജ്ഞര്‍ക്ക് അജ്ഞാതരോഗം ബാധിച്ചു. ഇവരെ കൂടുതല്‍ നിരീക്ഷണത്തിനായി യുഎസിലേക്കു മടക്കിവിളിക്കുകയാണെന്നുസ്‌റ്റേറ്റ് ഡിപ്പാര്‍ട്ടുമെന്റ് അറിയിച്ചു. കഴിഞ്ഞവര്‍ഷം ക്യൂബയിലെ യുഎസ് നയതന്ത്രജ്ഞര്‍ക്കു ബാധിച്ച തരത്തിലുള്ള രോഗമാണു ചൈനയിലും കാണപ്പെട്ടത്. ശബ്ദവീചികള്‍ ഉപയോഗിച്ചു നടത്തിയ ആക്രമണത്തിന്റെ ഫലമാണു രോഗബാധയെന്ന് ആരോപണം ഉയര്‍ന്നിട്ടുണ്ട്.

തെക്കന്‍ ചൈനയിലെ ഗുവാംഗ്ഷുവിലെ ഒരു അമേരിക്കന്‍ നയതന്ത്ര ഉദ്യോഗസ്ഥനാണ് കഴിഞ്ഞമാസം ആദ്യം രോഗം പിടിപെട്ടത്. ഇതെത്തുടര്‍ന്ന് സ്‌റ്റേറ്റ് ഡിപ്പാര്‍ട്ടുമെന്റ് പ്രത്യേക മെഡിക്കല്‍ ടീമിനെ ചൈനയിലേക്ക് അയച്ചു. ഇവരുടെ റിപ്പോര്‍ട്ടിന്റെ അടിസ്ഥാനത്തിലാണു കൂടുതല്‍ പേരെ വിശദ പരിശോധനയ് ക്കായി അമേരിക്കയിലേക്ക് മടക്കിക്കൊണ്ടുവരുന്നതെന്ന് സ്‌റ്റേറ്റ് ഡിപ്പാര്‍ട്ടുമെന്റ് വക്താവ് ഹെദര്‍ ന്യുയര്‍ട്ട് വ്യക്തമാക്കി. തലവേദന, ക്ഷീണം, തലയ്ക്കു ഭാരം, കാഴ്ചത്തകരാര്‍, കേള്‍വിത്തകരാര്‍, ഉറങ്ങാന്‍ ബുദ്ധിമുട്ട് തുടങ്ങിയ ലക്ഷണങ്ങളാണ് പലരിലും കാണപ്പെട്ടത്. ഇത്തരം ലക്ഷണങ്ങള്‍ കണ്ടാലുടന്‍ മെഡിക്കല്‍ ടീമുമായി ബന്ധപ്പെടണമെന്നു നയതന്ത്രജ്ഞരോട് വാഷിംഗ്ടണ്‍ ആവശ്യപ്പെട്ടു.
ഇതേസമയം, ഗുവാംഗ്ഷുവിലെ അമേരിക്കന്‍ ഉദ്യോഗസ്ഥന്റെ രോഗത്തെക്കുറിച്ച് പ്രാഥമികാന്വേഷണം നടത്തിയെന്നും എന്നാല്‍ രോഗത്തിനു കാരണം കണ്ടെത്താനായില്ലെന്നും ചൈനീസ് സര്‍ക്കാര്‍ വ്യക്തമാക്കി. കഴിഞ്ഞവര്‍ഷം ക്യൂബയില്‍ 24 യുഎസ് നയതന്ത്ര ഉദ്യോഗസ്ഥര്‍ക്കും കുടുംബാംഗങ്ങള്‍ക്കും ഇത്തരം രോഗം പിടിപെട്ടു. പത്തു കനേഡിയന്‍ നയതന്ത്രജ്ഞര്‍ക്കും രോഗബാധ അനുഭവപ്പെട്ടു. യുഎസ് ഉദ്യോഗസ്ഥരുടെ സുരക്ഷയുടെ ഉത്തരവാദിത്വം ക്യൂബ ഏറ്റെടുക്കണമെന്ന് അമേരിക്ക ആവശ്യപ്പെടുകയുണ്ടായി. യുഎസ് ഉദ്യോഗസ്ഥരെ ലക്ഷ്യമിട്ട് ഒരു തരത്തിലുള്ള ആക്രമണവും നടത്തിയിട്ടില്ലെന്ന് ഇതേത്തുടര്‍ന്നു ഹവാന ഭരണകൂടം വ്യക്തമാക്കി.