കേരളത്തില്‍ ഇടത്പക്ഷം അധികാരത്തില്‍ വരുമ്പോഴെല്ലാം എഴുത്തുകാര്‍ക്ക് ഭരണാധികാരികളെ വിമര്‍ശിക്കാന്‍ ധൈര്യമില്ലെന്ന് സി.വി ബാലകൃഷ്ണന്‍. ഇവിടെ നടക്കുന്ന ദുരഭിമാന കൊലയോ, കസ്റ്റഡി മരണമോ, ദളിത് പീഡനമോ അവര്‍ കാണുകയില്ല. ഉത്തരേന്ത്യയില്‍ നടക്കുന്ന സംഭവങ്ങള്‍ക്കെതിരെയാണ് അവര്‍ പ്രതികരിക്കുന്നത്. കേരളത്തിന്റെ രാഷ്ട്രീയത്തില്‍ ക്രിയാത്മകമായി ഇടപെടാന്‍ മലയാളത്തിലെ എഴുത്തുകാര്‍ മടിക്കുകയാണെന്നും അദ്ദേഹം കുറ്റപ്പെടുത്തി. ഭാഷാപോഷിണി വാരികയ്ക്ക് നല്‍കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. 

ഇപ്പോഴത്തെ ഭരണാധികാരികള്‍ ജനാധിപത്യവിരുദ്ധരും അസഹിഷ്ണുക്കളുമായി മാറുന്നു. അവര്‍ പ്രീണനങ്ങള്‍ കേള്‍ക്കാന്‍ ഇഷ്ടപ്പെടുന്നു. ഇഎംഎസ് പോലും ഒ.വി വിജയന്‍ എന്ന എഴുത്തുകാരനെ കിറുക്കനെന്നും സിഐഎ ചാരനെന്നും വിളിച്ചിരുന്നു. ധീരതയോടെ മലയാളത്തില്‍ എഴുതിയിട്ടുള്ളത് ഒ.വി വിജയനും വി.കെ.എനും മാത്രമാണ്. രണ്ട് പേരും രാഷ്ട്രീയ പ്രശ്‌നങ്ങളെ സൂഷ്മമായി നിരീക്ഷിക്കുകയും അപഗ്രഥിക്കുകയും ചെയ്തവരാണ്. അതുകൊണ്ട് എല്ലാവര്‍ക്കും ഇവരോട് നീരസവുമായിരുന്നു. ആരും ഇവരെ അംഗീകരിച്ചുമില്ല. കമ്യൂണിസ്റ്റ് പ്രസ്ഥാനവുമായി അര്‍ഥവത്തായ സംവാദങ്ങളില്‍ ഏര്‍പ്പെട്ടിരുന്ന ഒ.വി വിജയനെ കമ്യൂണിസ്റ്റ് പാര്‍ട്ടിക്കാര്‍ എന്നും പുലഭ്യമെ പറഞ്ഞിട്ടുള്ളു. അവര്‍ ആരോഗ്യകകമായ സംവാദം നടത്താന്‍ ഇഷ്ടപ്പെട്ടിരുന്നില്ല.

ഇന്ദിരാഗാന്ധിയുടെ ഏകാധിപത്യത്തോടും വിജയന്‍ ഇതേപോലെ കലഹിച്ചിട്ടുണ്ട്. ഇങ്ങനെ നിശിതമായ രാഷ്ട്രീയ വിമര്‍ശനം നടത്തിയിട്ടുള്ള മറ്റൊരു എഴുത്തുകാരനും ഇന്ത്യന്‍ സാഹിത്യത്തില്‍ ഉണ്ടെന്ന് തോന്നുന്നില്ല. ഇന്ത്യന്‍ രാഷ്ട്രീയത്തെ വിമര്‍ശിച്ചു കൊണ്ട് വിജയന്‍ എഴുതിയിട്ടുള്ള ലേഖനങ്ങളോട് കിടപിടിക്കുന്ന തരത്തില്‍ എഴുതാന്‍ സര്‍ഗാത്മക രംഗത്ത് പ്രവര്‍ത്തിക്കുന്ന മറ്റാര്‍ക്കും കഴിഞ്ഞിട്ടില്ല. ഭരണത്തിലെത്തുന്ന മുന്നണികളോടോ പാര്‍ട്ടികളോടോ ഉള്ള വിധേയത്വമാണ് മിക്ക എഴുത്തുകാരും ഇന്ന് പ്രകടിപ്പിക്കുന്നത്. സ്ഥാനമാനങ്ങള്‍ക്കും പുരസ്‌കാരങ്ങള്‍ക്കും വേണ്ടിയുള്ള വിധേയത്വമാണ് അവര്‍ക്കുള്ളത്. സഭാ നേതൃത്വങ്ങളെയോ പാര്‍ട്ടി നേതൃത്വങ്ങളെയോ വിമര്‍ശിക്കാന്‍ മലയാളത്തിലെ എഴുത്തുകാര്‍ക്ക് മടിയാണ്. പറയുന്നതില്‍ മാത്രമല്ല എഴുത്തിലും ആ ധീരതയില്ല.