കേരളവും എബോള ഭീതിയില്‍… എബോള മുന്‍കരുതലിന് ഡോക്ടര്‍മാരെ ട്രെയ്‌നിംഗിനയച്ചു; അടുത്തറിയാം, എന്താണ് എബോള?
രാജ്യാതിര്‍ത്തികള്‍ കടന്ന് എബോള ഭീതി വിതയ്ക്കുമ്പോള്‍ കേരളവും മുന്‍ കരുതലെടുക്കാന്‍ തീരുമാനിച്ചു. ഇതിന്റെ ഭാഗമായി, എബോള പ്രതിരോധിക്കാനുള്ള പരിശീലനം നേടാന്‍ ഡോക്റ്റര്‍മാരെ ഡല്‍ഹിയിലേക്കയച്ചു. മൂന്നു ദിവസത്തെ പ്രത്യേക പരിശീലനം പൂര്‍ത്തിയാക്കി മടങ്ങുന്ന ഡോക്ടര്‍മാര്‍ സംസ്ഥാനത്തെ ആരോഗ്യ പ്രവര്‍ത്തകര്‍ക്ക് രോഗപ്രതിരോധ മാര്‍ഗങ്ങള്‍ പകര്‍ന്നു നല്‍കും.
ഇന്ത്യയിലെ മറ്റു സംസ്ഥാനങ്ങളെ അപേക്ഷിച്ച് പ്രവാസികള്‍ ഏറെയുള്ളത് കേരളത്തിലാണ്. അതു കൊണ്ട് തന്നെ വൈറസ് പടരുന്നു എന്ന വാര്‍ത്ത കേരളത്തെ സംബന്ധിച്ച് ഭീതിജനകമാണ്. മറ്റു രാജ്യങ്ങളില്‍ നിന്ന് നിരവധി പേരാണ് ദിനവും ഇവിടെ എത്തുന്നത്. അതിനാല്‍ വൈറസ് പടരുന്നതിന് സാധ്യതയുമുണ്ട്. ഈ സാഹചര്യത്തില്‍ രോഗമെന്ത്, അതിനെ പ്രതിരോധിക്കേണ്ടത് എങ്ങിനെ എന്ന് നാം അറിഞ്ഞിരിക്കണം.
എന്താണ് എബോള?
എബോള വൈറസ് ഡിസീസ് (ഇവിഡി) -എബോള ഹെമറോജിക് ഫീവര്‍ എന്നാണ് അറിയപ്പെടുന്നത്. മൃഗങ്ങളില്‍ നിന്നാണ് വൈറസ് മനുഷ്യരിലേക്ക് പടരുന്നത്. വൈറസ് ബാധിച്ച മനുഷ്യരുമായോ മൃഗങ്ങളുമായോ നേരിട്ടുള്ള സംസര്‍ഗം വഴിയാണ് രോഗം പടരുന്നത്.
പനി, തലവേദന, ശരീരത്തിലെ തിണര്‍പ്പ്, വയറുവേദന, വയറിളക്കം, ഛര്‍ദ്ദി, മനംപുരട്ടല്‍, നടുവേദന, തൊണ്ടവേദന എന്നിവയാണ് പ്രാഥമിക രോഗ ലക്ഷണങ്ങള്‍.
രോഗം മൂര്‍ഛിച്ചു കഴിഞ്ഞാല്‍
.മൂക്ക്, ചെവി, വായ എന്നിവയിലൂടെയുള്ള രക്തസ്രാവം
.തൊലിപ്പുറത്ത് അസഹ്യമായ വേദന
.ജനനേന്ദ്രിയത്തില്‍ വീക്കം
.ചെങ്കണ്ണ്
.ശരീരമാസകലം കുമിളകള്‍ പൊങ്ങും
.വായുടെ മുകള്‍ഭാഗം ചുവക്കും
രോഗം എങ്ങനെ പകരും
.വൈറസ് ബാധയുള്ളവരുമായുള്ള നേരിട്ടുള്ള സംസര്‍ഗം. രക്തം, ശരീരസ്രവങ്ങള്‍ എന്നിവയുമായിട്ടുള്ള സംസര്‍ഗം.
.രോഗികളുമായി സംസര്‍ഗം പുലര്‍ത്തുന്ന ആരോഗ്യ പ്രവര്‍ത്തകര്‍ വഴി
.വൈറസ് ബാധയുള്ള മൃഗങ്ങളുടെ മാംസം കൈകാര്യം ചെയ്യുക വഴി
.രോഗം വന്ന് മരണപ്പെട്ടവരെ സംസ്‌ക്കരിക്കുമ്പോള്‍ അവരുടെ ശരീര സ്രവങ്ങള്‍ വഴി.
എബോള പ്രതിരോധിക്കാന്‍ ആരോഗ്യവകുപ്പ് മുന്‍കൈ എടുത്തു കഴിഞ്ഞു. സംസ്ഥാനത്തെ നാലു മെഡിക്കല്‍ കോളേജുകളില്‍ നിന്നും തെരഞ്ഞെടുത്ത ഡോക്ടര്‍മാരെയാണ് പരിശീലനത്തിനയച്ചിരിക്കുന്നതെന്ന് ആരോഗ്യ വകുപ്പ് അഡിഷണല്‍ ഡയറക്റ്റര്‍ എ.എസ്.പ്രദീപ് കുമാര്‍ പറഞ്ഞു. ഡല്‍ഹിയിലെ നാഷണല്‍ ഇന്‍സ്റ്റിറ്റിയൂട്ട് ഓഫ് ഹെല്‍ത്ത് ആന്റ് ഫാമിലി വെല്‍ഫെയറിലാണ് പരിശീലനം. ഓഗസ്റ്റ് 11 മുതല്‍ സംസ്ഥാനത്തെ എയര്‍പ്പോര്‍ട്ടുകളില്‍ നിരീക്ഷണം ശക്തമാക്കയിട്ടുണ്ട്.നൂറോളം പേരുടെ രക്ത സാമ്പിളുകള്‍ ഇതിനകം തന്നെ പൂനെയിലെ നാഷണല്‍ ഇന്‍സ്റ്റിറ്റിയൂട്ട് ഓഫ് വൈറേളജിയിലേക്ക് അയച്ചിരുന്നു. എന്നാല്‍ എല്ലാ റിപ്പോര്‍ട്ടുകളും നെഗറ്റീവ് ആയിരുന്നു.
ഇപ്പോഴത്തെ സാഹചര്യത്തില്‍ കേരളം എബോളയെ ഭയക്കേണ്ടതില്ലെന്നും അദ്ദേഹം പറഞ്ഞു. എബോള വൈറസ് ബാധയുടെ സ്ഥിരീകരണം വന്നാല്‍ രോഗികളെ പാര്‍പ്പിക്കാന്‍ മുഴുവന്‍ സൗകര്യങ്ങളുമുള്ള പ്രത്യേക വാര്‍ഡുകള്‍ എല്ലാ മെഡിക്കല്‍ കോളേജിലും സജീകരിച്ചിട്ടുണ്ട്. എയര്‍പോര്‍ട്ടിലെ നിരീക്ഷണത്തിനിടെ രോഗലക്ഷണങ്ങള്‍ കണ്ടവരെ ആരോഗ്യ വകുപ്പ് പ്രത്യേകം ശ്രദ്ധിച്ചിരുന്നു. എന്നാല്‍ ആര്‍ക്കും തന്നെ വൈറസ് ബാധ സ്ഥിരീകരിച്ചിട്ടില്ല.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
