റോഡപകടങ്ങളില്‍ പരിക്കേറ്റവരെ കണ്ട് പലരും തിരിഞ്ഞു നോക്കാതെ പോകുന്നതിന് പിന്നില്‍ തന്റെ തലയിലാകുമെന്ന തോന്നലുകളാണ്. എന്നാല്‍ ഇനി ആ പേടി വേണ്ട. 1099 എന്ന ടോള്‍ ഫ്രീ നമ്പരിലേക്ക് വിളിച്ചാല്‍ മതി. ബാക്കി കാര്യം പോലീസ് നോക്കിക്കൊള്ളും. ഇനി വിളിക്കാന്‍ ബുദ്ധിമുട്ടാണെങ്കില്‍ 9497900000 എന്ന നമ്പരിലേക്ക് എസ്എംഎസ് അയച്ചാലും മതി. തിരിച്ചു വിളിച്ച് വിവരങ്ങള്‍ ശേഖരിച്ച് രക്ഷാ പ്രവര്‍ത്തകര്‍ എത്തിക്കൊള്ളും. 
ആഭ്യന്തര മന്ത്രി രമേശ് ചെന്നിത്തലയാണ് ഫേസ്ബുക്ക് പേജിലൂടെ ഇക്കാര്യം അറിയിച്ചത്. സംസ്ഥാനത്ത് വിവിധ പ്രദേശങ്ങളില്‍ വാഹനാപകടങ്ങള്‍ സംഭവിക്കുമ്പോള്‍ ചില പ്രത്യക സാഹചര്യത്തില്‍ ജനങ്ങള്‍ക്കും വഴിയാത്രക്കാര്‍ക്കും അപകടത്തില്‍ പെട്ടവരെ ആശുപത്രിയിലെത്തിക്കാന്‍ കഴിഞ്ഞെന്ന് വരില്ല. അതു കൊണ്ട് വഴിയാത്രക്കാര്‍ക്കും , നാട്ടുകാര്‍ക്കും പൊലീസില്‍ വിവരമറിയിക്കാന്‍ കഴിയുന്ന തരത്തിലുള്ള നാലക്ക ടോള്‍ ഫ്രീ നമ്പര്‍ (1099) ജനങ്ങളുടെ അറിവിലേക്കായി പ്രസിദ്ധപ്പെടുത്താന്‍ ഈ യോഗത്തില്‍ തീരുമാനമായതായാണ് അദ്ദേഹം ഫേസ്ബുക്കിലൂടെ അറിയിച്ചിരിക്കുന്നത്.
അപകടത്തിന് ദൃക്‌സാക്ഷികളാകുന്നവര്‍ ഉടന്‍ തന്നെ ഈ നമ്പറില്‍ ബന്ധപ്പെടുകയും, അപകടസ്ഥലം ഏതെന്ന് വ്യക്തമാക്കുകയും ചെയ്താല്‍ ഉടന്‍ പൊലീസ് എത്തി അപകടത്തില്‍ പെട്ടവരെ യഥാസമയം ആശുപത്രിയിലെത്തിക്കും. ആദ്യ ഘട്ടത്തില്‍ കൊച്ചി, തിരുവനന്തപുരം എന്നീ നഗരങ്ങളിലും പിന്നീട് ഘട്ടം ഘട്ടമായി ഒരു മാസത്തിനുള്ളില്‍ സംസ്ഥാനത്തെ എല്ലാ ജില്ലകളിലും ഈ സേവനം ലഭ്യമാക്കും.
ഓര്‍ക്കുക, ഭൂമിയില്‍ ഏറ്റവും വിലപ്പെട്ടത് മനുഷ്യജീവനാണ്, നിങ്ങളുടെ സന്‍മനസ് നിരവധി വിലപ്പെട്ട ജീവനുകള്‍ സംരക്ഷിച്ചേക്കാം, മടിക്കാതെ ഈ സേവനം ഉപയോഗപ്പെടുത്തുക.
ഓര്‍ത്തുവയ്ക്കുക 1099

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha