സുഹൃത്തിനെ കാണാനായി ബംഗളൂരുവിലെത്തിയ മലയാളി ഗതാഗതകുരുക്കിൽപ്പെട്ട് ചികിത്സ ലഭിക്കാതെ മരിച്ചു. കണ്ണൂർ മട്ടന്നൂർ ഉളിയിൽ സ്വദേശി കെകെ സാജിർ (51) ആണ് മരിച്ചത്.

ചൊവ്വാഴ്ചയായിരുന്നു സംഭവം. ജോലിയുമായി ബന്ധപ്പെട്ട് സുഹൃത്തിനെ കാണാനാണ് സാജിർ ബംഗളൂരുവിലെത്തിയത്. തുടർന്ന് ഇലക്ട്രോണികസിറ്രി ഫ്ലൈഓവറിൽ സാജിറും സുഹൃത്തും സഞ്ചരിച്ചിരുന്ന ജീപ്പ് ഗതാഗതക്കുരുക്കിൽപ്പെടുകയായിരുന്നു. അരമണിക്കൂറോളം വാഹനത്തിലിരുന്നതിന് പിന്നാലെ സാജിറിന് ദേഹാസ്വാസ്ഥ്യം അനുഭവപ്പെടുകയായിരുന്നു.

ഒപ്പമുണ്ടായിരുന്ന സുഹൃത്ത് ഓൾ ഇന്ത്യ കെഎംസിസി പ്രവർത്തകരെ വിവരമറിയിച്ചെങ്കിലും ഗതാഗതക്കുരുക്കിനിടെ അവർക്കും സഹായവുമായി എത്താൻ കഴിഞ്ഞില്ല. മൂന്ന് കിലോമീറ്ററിൽ നൂറുകണക്കിന് വാഹനങ്ങൾ കുടുങ്ങിക്കിടന്നതിനാൽ സന്നദ്ധ പ്രവർത്തകർ നടന്ന് എത്തിയപ്പോഴേക്കും ഒരുപാട് താമസിച്ചുപോയി. തുടർന്ന് സാജുവിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. അദ്ദേഹത്തിന്റെ മൃതദേഹം പോസ്റ്റുമോർട്ടം നടപടികൾക്ക് ശേഷം നാട്ടിലെത്തിക്കുകയായിരുന്നു.