സദാചാരത്തിന്റെ പേരില്‍ കോഴിക്കോട് നഗരത്തിലെ ഹോട്ടല്‍ അടിച്ചുതകര്‍ത്ത കേസില്‍ യുവമോര്‍ച്ച മണ്ഡലം പ്രസിഡന്റ് ടി. നിവേദ് പൊലീസ് പിടിയില്‍. അനാശാസ്യം നടക്കുന്നതായി ആരോപിച്ച് കഴിഞ്ഞ ദിവസമാണ് പതിമൂന്നോളം യുവമോര്‍ച്ച പ്രവര്‍ത്തകര്‍ നഗരത്തിലെ ഡൗണ്‍ ടൗണ്‍എന്ന ഹോട്ടല്‍ അടിച്ചുതകര്‍ത്തത്.
ഒളിവില്‍ പോയ പ്രതികളെ കുടുക്കാന്‍ സര്‍ക്കിള്‍ ഇന്‍സ്‌പെക്ടറുടെ നേതൃത്വത്തില്‍ പത്തംഗ സംഘത്തെ നിയോഗിച്ചിരുന്നു. യുവമോര്‍ച്ച നേതാക്കളായ പ്രകാശ് ബാബു, പ്രശോഭ്, ഷൈബു തുടങ്ങി ആറു പേരെ പൊലീസ് കഴിഞ്ഞ ദിവസം തിരിച്ചറിഞ്ഞിരുന്നു. ദൃശ്യമാധ്യമങ്ങള്‍ സംപ്രേഷണം ചെയ്ത അക്രമത്തിന്റെ ദൃശ്യങ്ങള്‍ സൂക്ഷ്മമായി പരിശോധിച്ചാണ് പ്രതികളെ തിരിച്ചറിഞ്ഞത്.സംഘം അരമണിക്കൂറോളം നടത്തിയ ആക്രമണത്തില്‍ വ്യപാരസ്ഥാപനം മുഴുവന്‍ തകര്‍ന്നു.