കേരളത്തില്‍ നിന്നും 4 എംപിമാര്‍ സ്വത്ത് വിവരം വെളിപ്പെടുത്തിയില്ല. കോണ്‍ഗ്രസ് എംപി കെ.സി. വേണുഗോപാല്‍, ആന്റോ ആന്റണി ആര്‍എസ്പിയുടെ എന്‍.കെ. പ്രേമചന്ദ്രന്‍ സിപിഎമ്മിന്റെ പി.കെ.ബിജു എന്നിവരാണ് പാര്‍ലമെന്റില്‍ സ്വത്ത് വിവരം വെളിപ്പെടുത്താത്തവര്‍. മനോരമയ്ക്ക് ലഭിച്ച വിവരാവകാശ നിയമപ്രകാരം ലഭിച്ച ഉത്തരവിലാണ് ഇക്കാര്യം വ്യക്തമാക്കുന്നത്.

401 ലോക്‌സഭാ എംപിമാരാണ് സ്വത്ത് വിവരം വെളിപ്പെടുത്തിയിട്ടില്ലാത്തത്. കോണ്‍ഗ്രസ് അധ്യക്ഷ സോണിയ ഗാന്ധി, ഉപാധ്യക്ഷന്‍ രാഹുല്‍ ഗാന്ധി, ബിജെപി നേതാക്കളായ എല്‍.കെ. അദ്ധ്വാനി, രാജ് നാഥ് സിങ്, സുഷമസ്വരാജ്, ഉമഭാരതി, നിതിന്‍ ഗഡ്ഗരി എന്നിവരും സ്വത്ത് വിവരങ്ങള്‍ വെളിപ്പെടുത്തിയിട്ടില്ല. സെപ്റ്റംബര്‍ 26 വരെ ആരും സ്വത്ത് വിവരവുമായി ബന്ധപ്പെട്ട ആശയ വിനിമയം നടത്തിയിട്ടില്ല എന്നാണ് പാര്‍ലമെന്റ് സെക്രട്ടറിയേറ്റ് പറയുന്നത്. 
2004ലെ ലോക്‌സഭാ സ്വത്ത് നിയമം അനുസരിച്ച് സത്യപ്രതിജ്ഞ കഴിഞ്ഞ് 90 ദിവസത്തിനുള്ളില്‍ സ്വത്ത് സംബന്ധിച്ച വിവരം വ്യക്തമാക്കണമെന്നാണ്. എന്നാല്‍ 401 പാര്‍ലമെന്റ് അംഗങ്ങള്‍ ഇക്കാര്യം നല്‍കിയിട്ടില്ലെന്നാണ് വിവരാവകാശ നിയമ പ്രകാരം ലഭിച്ച ഉത്തരം. പ്രാദേശിക പാര്‍ട്ടികളുടെ പല പ്രമുഖ നേതാക്കളും സ്വത്ത് വിവരം അറിയിക്കാത്തവരുടെ പട്ടികയിലുണ്ട്. സ്വത്ത് വിവരം നല്‍കാത്തവരുടെ എണ്ണം: ബിജെപി 209, കോണ്‍ഗ്രസ് 31, തൃണമൂല്‍ കോണ്‍ഗ്രസ് 27, ബിജെഡി 18, ശിവസേന 15, ടിഡിപി 14, എഐഡിഎംകെ 9, ടിആര്‍എസ് 8, വൈ എസ് ആര്‍ കോണ്‍ഗ്രസ് 7, എല്‍ജെപി 6, എന്‍സിപി 4, സിപിഎം 3, എസ്പി 3, അകാലി ദള്‍ 3, ആര്‍ജെഡി 3, ആംആദ്മി പാര്‍ട്ടി 3, ജെഡിയു 2, അപ്ന ദള്‍ 2, എന്നിങ്ങനെയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha