സര്‍ക്കാരിന്റെ മദ്യനയത്തെ ചോദ്യം ചെയ്ത് ബാറുടമകള്‍ നല്‍കിയ ഹര്‍ജിയില്‍ ഹൈക്കോടതി ഇന്ന് വിധി പറയും. സര്‍ക്കാരിന്റെ മദ്യനയം റദ്ദാക്കണമെന്നും ബാറുകള്‍ പൂട്ടാനുളള ഉത്തരവ് പിന്‍വലിക്കണമെന്നും ആവശ്യപ്പെട്ട് ബാറുടമകള്‍ നല്‍കിയ 83 ഹര്‍ജികളിലാണ് സിംഗിള്‍ ബെഞ്ചിന്റെ പരിഗണനയിലുളളത്.
വിധി എതിരായാല്‍ ഇപ്പോള്‍ തുറന്നിരിക്കുന്ന 312 ബാറുകള്‍കൂടി പൂട്ടേണ്ടിവരും. ഉച്ചയ്ക്ക് ഒന്നേമുക്കാലിനാണ് ജസ്റ്റീസ് സുരേന്ദ്രമോഹന്‍ വിധി പറയുക.
കോണ്‍ഗ്രസ് നേതാവും രാജ്യത്തെ പ്രമുഖ അഭിഭാഷകനായ കപില്‍ സിബലായിരുന്നു സര്‍ക്കാരിനായി ഹാജരായത്. വാദം പൂര്‍ത്തിയായി ഒരുമാസത്തുനുശേഷമാണ് ഹൈക്കോടതി വിധി പറയുന്നത്. സര്‍ക്കാരിന്റെ മദ്യം നയം കോടതി അംഗീകരിച്ചാല്‍ സംസ്ഥാനത്ത് തുറന്നിരിക്കുന്ന ഫൈവ് സ്റ്റാര്‍ ഒഴികെയുളള മുഴുവന്‍ ബാറുകള്‍ക്കും ഇന്നത്തോടെ പൂട്ടുവീഴും.
ഫൈവ് സ്റ്റാര്‍ ഒഴികെയുളള സംസ്ഥാനത്തെ മുഴുവന്‍ ബാറുകളും പൂട്ടാനായിരുന്നു സര്‍ക്കാര്‍ തീരുമാനം, ഇപ്പോഴത്തെ മദ്യനയം കുത്തകകളെ സഹായിക്കാനാണെന്നും മദ്യവില്‍പ്പനയുടെ മൊത്തക്കച്ചവടം നേടാള്‍ സര്‍ക്കാര്‍ ശ്രമിക്കുകയാണെന്നുമായിരുന്നു ബാറുടമകള്‍ വാദിച്ചത്. എന്നാല്‍ സര്‍ക്കാരിന്റെ മദ്യനയത്തിന്റെ ഭാഗമായിട്ടാണ് നടപടിയെന്നും മദ്യലഭ്യത കുറയ്ക്കുകയാണ് ലക്ഷ്യമെന്നുമാണ് സര്‍ക്കാര്‍ വാദിച്ചത്.
ബാറുകള്‍ പൂട്ടാനുളള തീരുമാനത്തെ ചോദ്യം ചെയ്യാന്‍ ഉടമകള്‍ക്ക് അവകാശമില്ലെന്നും ലഹരിമരുന്ന് വില്‍പ്പന മൗലികാവകാശത്തിന്റെ ലംഘനമല്ലെന്നും വാദമുയര്‍ന്നിരുന്നു.
എന്നാല്‍ വിധി എതിരായാല്‍ ഡിവിഷന്‍ ബെഞ്ചിനെ സമീപിക്കുമെന്നും അതുവരെ തല്‍സ്ഥിതി തുടരണമെന്ന് സിംഗിള്‍ ബെഞ്ചിനോട് ആവശ്യപ്പെടുമെന്നും ബാറുടമകള്‍ അറിയിച്ചു.
നിലവാരമില്ലാത്തതിനെ തുടര്‍ന്ന് 418 ബാറുകളാണ് പൂട്ടിയത്. ശേഷിച്ച 312 ബാറുകള്‍ കൂടി പൂട്ടാന്‍ സര്‍ക്കാര്‍ തീരുമാനിച്ചെങ്കിലും ഹൈക്കോടതിയുടെ അന്തിമ വിധി വരുന്നത് വരെ ബാറുകള്‍ പൂട്ടരുതെന്ന് സുപ്രീംകോടതി ഉത്തരവിട്ടിരുന്നു. തുടര്‍ന്ന് ബാറുകള്‍ പൂട്ടാനുള്ള തീരുമാനത്തില്‍ നിന്ന് സര്‍ക്കാര്‍ പിന്മാറുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha