വിഴിഞ്ഞം തുറമുഖ പദ്ധതിക്ക് സംരഭക മൂലധനത്തിന് ഉപരിയായുള്ള തുക (വയബിലിറ്റി ഗ്യാപ് ഫണ്ട് അഥവാ വി.ജി.എഫ്) കേന്ദ്ര സര്‍ക്കാര്‍ അനുവദിച്ചു. ഇതോടെ 800 കോടി രൂപ കേന്ദ്ര സര്‍ക്കാരില്‍ നിന്ന് വിഴിഞ്ഞം പദ്ധതിക്ക് ലഭിക്കും. ധനസെക്രട്ടറി അരവിന്ദ് മായാറാമിന്റെ അദ്ധ്യക്ഷതയിലുള്ള ഉന്നതാധികാര സമിതിയാണ് വി.ജി.എഫ് അനുവദിച്ചത്. തീരുമാനം ധനമന്ത്രി അംഗീകരിക്കുന്നതോടെ തുക അനുവദിക്കും. രാജ്യത്ത് ഇതാദ്യമായാണ് ഒരു തുറമുഖത്തിന് വി.ജി.എഫ് ലഭിക്കുന്നത്. പദ്ധതിയ്ക്കുള്ള സ്വകാര്യ പങ്കാളി മുടക്കുന്നതിന്റെ 40% വരെയാണ് വി.ജി.എഫ് ആയി അനുവദിക്കുക. ഇതില്‍ ആദ്യ 20 ശതമാനമാണ് കേന്ദ്ര സര്‍ക്കാര്‍ അനുവദിച്ചിരിക്കുന്നത്.
വി.ജി.എഫ് നടപടികള്‍ വൈകിയതിനെ തുടര്‍ന്ന് വിഴിഞ്ഞം പദ്ധതിയുടെ ടെണ്ടര്‍ നടപടികള്‍ മാറ്റിവച്ചിരുന്നു.സംസ്ഥാനവും കേന്ദ്രവും തമ്മില്‍ നിലനിന്നിരുന്ന അഭിപ്രായ വ്യത്യാസങ്ങള്‍ പരിഹരിച്ചാണ് ഇപ്പോള്‍ തുക അനുവദിച്ചിരിക്കുന്നത്. നേരത്തേ കേന്ദ്ര ധനകാര്യ മന്ത്രാലയവും സംസ്ഥാനും നിരവധി ചര്‍ച്ചകള്‍ നടത്തിയിരുന്നെങ്കിലും ഭിന്നതകള്‍ക്ക് പരിഹാരം കണ്ടെത്താന്‍ കഴിഞ്ഞിരുന്നില്ല. കേന്ദ്ര സഹായം ലഭിച്ച സാഹചര്യത്തില്‍ അടുത്ത മാസം 30നകം തന്നെ ടെണ്ടര്‍ നടപടികള്‍ പൂര്‍ത്തിയാവും.
ധനവിനിയോഗ വകുപ്പ് സെക്രട്ടറി, ആസൂത്രണ മന്ത്രാലയ സെക്രട്ടറി, ഷിപ്പിങ് മന്ത്രാലയ സെക്രട്ടറി എന്നിവരാണ് ഉന്നതാധികാര സമിതിയിലുണ്ടായിരുന്നത്. കേരളത്തെ പ്രതിനിധീകരിച്ച് ചീഫ് സെക്രട്ടറി ഇ.കെ.ഭരത് ഭൂഷണ്‍, പ്രിന്‍സിപ്പല്‍ സെക്രട്ടറി ജയിംസ് വര്‍ഗീസ്, തുറമുഖ കമ്പനി മാനേജിങ് ഡയറക്ടര്‍ എ.എസ്. സുരേഷ് ബാബു എന്നിവരാണ് ചര്‍ച്ചകളില്‍ പങ്കെടുത്തത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha