കോണ്‍ഗ്രസിലെ നാലാം ഗ്രൂപ്പായ വയലാര്‍ രവി വിഭാഗം ഐ വിഭാഗത്തിന്റെ ലയിച്ചു. ഐയുമായി ചേര്‍ന്നു പ്രവര്‍ത്തിക്കാന്‍ കഴിഞ്ഞ ദിവസം ചേര്‍ന്ന വയലാര്‍ രവിയുടെ ഗ്രൂപ്പ് തീരുമാനിച്ചു. ഇക്കാര്യം വയലാര്‍ രവിയും ഐ ഗ്രൂപ്പ് നേതാവായ ആഭ്യന്തര മന്ത്രി രമേശ് ചെന്നിത്തലയും തമ്മില്‍ സംസാരിച്ചു ധാരണയായി. ഗ്രൂപ്പുകള്‍ക്ക് അതീതമായി പ്രവര്‍ത്തിക്കുന്ന കെപിസിസി പ്രസിഡന്റ് വി എം സുധീരകനെ പുകച്ച് പുറത്ത്ചാടിക്കാനുള്ള നീക്കവും കോണ്‍ഗ്രസില്‍ ശക്തമാണ്.
മുതിര്‍ന്ന നേതാവ് എന്ന നിലയില്‍ ഇനി ഗ്രൂപ്പ് പ്രവര്‍ത്തനങ്ങള്‍ക്കില്ലെന്ന നിലപാടാണ് കുറേക്കാലമായി വയലാര്‍ രവി സ്വീകരിച്ച് പോരുന്നത്. തനിക്കൊപ്പമുള്ളവര്‍ ഏകീകൃത ഐയുമായി സഹകരിക്കുന്നതില്‍ എതിര്‍പ്പില്ലെന്ന് അദ്ദേഹം വ്യക്തമാക്കി. സംഘടനാ തെരഞ്ഞെടുപ്പ് മുന്നില്‍ കണ്ടാണ് വയലാര്‍ രവിയുടെ നീക്കമെന്ന് കരുതുന്നവരും കോണ്‍ഗ്രസിലുണ്ട്. സംഘടനാ തെരഞ്ഞെടുപ്പില്‍ ഐ ഗ്രൂപ്പില്‍ ചേര്‍ന്ന് കൊണ്ട് തനിക്ക് ഒപ്പമുള്ളവര്‍ക്ക് പരമാവധി സ്ഥാനങ്ങള്‍ നേടിക്കൊടുക്കാനാണ് വയലാര്‍ രവിയുടെ നീക്കം.
വയലലാര്‍ രവിയുടെ നേതൃത്വത്തിലുള്ള നാലാം ഗ്രൂപ്പ് സമീപകാലത്തു സജീവമായിരുന്നില്ല. രമേശ് ചെന്നിത്തലയുടെ നേതൃത്വത്തിലുള്ള മൂന്നാം ഗ്രൂപ്പ് തന്നെ ഐ ആയി പരിണമിക്കുകയും എ-ഐ എന്ന നിലയിലേക്കു ഗ്രൂപ്പ് സമവാക്യങ്ങള്‍ മാറുകയും ചെയ്തതോടെ, നാലാം ഗ്രൂപ്പിന്റെ പ്രാധാന്യം കുറഞ്ഞ് വന്നിരുന്നു.
ശക്തമായ എ വിഭാഗത്തെ ചെറുക്കാന്‍ മറ്റു വിഭാഗങ്ങളുടെ സഹകരണം തേടാനുള്ള ഐയുടെ താല്‍പര്യവും നാലാം ഗ്രൂപ്പിനു പ്രചോദനമായി. ഇതോടെ കോണ്‍ഗ്രസില്‍ ഗ്രൂപ്പുകള്‍ എയും ഐയും മാത്രമായി ചുരുങ്ങുന്ന സ്ഥിതിയാണ് നിലവില്‍.എഐസിസി സംഘടനാ തിരഞ്ഞെടുപ്പു പ്രഖ്യാപിച്ചതോടെ എങ്ങനെ നീങ്ങണം എന്നതു ചര്‍ച്ച ചെയ്യാന്‍ ചേര്‍ന്ന നേതൃയോഗമാണ് ഐയുമായി ചേര്‍ന്നു പ്രവര്‍ത്തിക്കാന്‍ നിശ്ചയിച്ചത്. ഏതാനും ദിവസം മുന്‍പു വയലാര്‍ രവിയെ വസതിയിലെത്തി രമേശ് ചെന്നിത്തല കണ്ടിരുന്നു. എ.കെ. ആന്റണിയെപ്പോലെ ഗ്രൂപ്പ് പ്രവര്‍ത്തനങ്ങളില്‍ നിന്നു മാറിനില്‍ക്കാനുള്ള താല്‍പര്യം അദ്ദേഹം വ്യക്തമാക്കി. അതേസമയം ദീര്‍ഘകാലമായി തനിക്കൊപ്പം നില്‍ക്കുന്നവര്‍ക്കു സംരക്ഷണം ഉറപ്പാക്കുകയും വേണം. ഗ്രൂപ്പ് നീക്കങ്ങള്‍ക്കില്ലെന്നും എന്നാല്‍ നേതാക്കള്‍ എന്ന നിലയില്‍ സഹകരിച്ചു നീങ്ങാമെന്നുമാണ് ഇരുവര്‍ക്കുമിടയിലെ ധാരണ. എന്നാല്‍ ഐ ഗ്രൂപ്പില്‍ ചേരുന്നതിനോട് ഒരു വിഭാഗം നോതാക്കള്‍ക്ക് വിയോചിപ്പുണ്ട്.
കെപിസിസി മുന്‍ ജനറല്‍ സെക്രട്ടറി അജയ് തറയില്‍, യൂത്ത് കോണ്‍ഗ്രസ് അഖിലേന്ത്യാ സെക്രട്ടറി മാത്യു കുഴല്‍നാടന്‍ തുടങ്ങിയവരെല്ലാം ഐയുമായി ചേരണമെന്ന തീരുമാനത്തിലാണ്.എന്നാല്‍ കെപിസിസി വൈസ് പ്രസിഡന്റ് ഭാരതീപുരം ശശി നേതൃത്വത്തിന്റെ തീരുമാനത്തോട് വിയോജിപ്പു വ്യക്തമാക്കിയിട്ടുണ്ട്. കെ. മുരളീധരന്റെയും പത്മജ വേണുഗോപാലിന്റെയും നേതൃത്വത്തിലുള്ള പഴയ കരുണാകര അനുകൂലികളും രമേശിന്റെ നേതൃത്വം അംഗീകരിച്ചു ഗ്രൂപ്പിന്റെ ഭാഗമായി പ്രവര്‍ത്തിക്കാന്‍ തീരുമാനിച്ചിരുന്നു. ഗ്രൂപ്പ് നേതാവായ രമേശ് ചെന്നിത്തലയുടെ നേതൃത്വത്തില്‍ സംസ്ഥാനതലത്തില്‍ യോഗം ചേര്‍ന്ന് ഒരുമിച്ചു നീങ്ങാനാണു ധാരണ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha