ജലന്തര്‍ ബിഷപ്പ് ഫ്രാങ്കോ മുളയ്ക്കല്‍ കഴുകന്റെ കണ്ണുകളുമായാണ് കന്യാസ്ത്രീകളെ സമീപിക്കുന്നതെന്നും വനിതകളോട് സഭയ്ക്ക് ചിറ്റമ്മ നയമാണെന്നും ബലാല്‍സംഗത്തിനിരയായ കന്യാസ്ത്രീ ഫ്രാന്‍സിസ് മാര്‍പ്പാപ്പയ്ക്ക് അയച്ച രണ്ടാമത്തെ കത്തില്‍ വ്യക്തമാക്കുന്നു. അഞ്ച് മാസം മുമ്പാണ് ആദ്യം കത്ത് നല്‍കിയത്. അതില്‍ നടപടിയുണ്ടാകാത്തതിനെ തുടര്‍ന്നാണ് ഇന്നലെ വീണ്ടും കത്തയച്ചത്. തനിക്ക് നീതി കിട്ടണമെന്നും വത്തിക്കാന്‍ അടിയന്തരമായി ഇടപെടണമെന്നും കത്തില്‍ പറയുന്നു.

പണവും സ്വാധീനവും അധികാരവും ഉപയോഗിച്ച് ബിഷപ്പ് കേസും തന്റെ പരാതിയും അട്ടിമറിക്കാന്‍ ശ്രമിക്കുന്നു. തനിക്കും കുടുംബത്തിനും വധഭീഷണിയുണ്ട്. ഇക്കാര്യങ്ങള്‍ അറിയിച്ച് സംസ്ഥാനത്തെ സഭാമേലധികാരികള്‍ക്ക് പരാതി നല്‍കിയപ്പോള്‍ തന്നെ അപമാനിക്കുകയും ബിഷപ്പിനെ സഹായിക്കുകയും ചെയ്യുന്ന സമീപനമാണ് സ്വീകരിക്കുന്നത്. 

സഭയുടെ എല്ലാ വാതിലുകളിലും മുട്ടിയെങ്കിലും തുറക്കാത്തതിനെ തുടര്‍ന്നാണ് നീതിതേടി പൊലീസിനെ സമീപിച്ചത്. യാതൊരു കരുണയും ഇല്ലാത്തയാളാണ് ബിഷപ്പ് ഫ്രാങ്കോ. അദ്ദേഹത്തിന്റെ ഇരകളായ ഇരുപതോളം കന്യാസ്ത്രീകളെ പലസ്ഥലങ്ങളിലേക്ക് സ്ഥലംമാറ്റി പ്രതികാരദാഹം തീര്‍ക്കുകയാണ്. അധികാരവും പണവും സ്വാധീനവും ഉള്ള ബിഷപ്പ് ഫ്രാങ്കോയ്ക്ക് ഒപ്പമാണ് സഭയും അധികാരികളും. തനിക്കെതിരായ കേസുകളും പരാതികളും അട്ടിമറിക്കാന്‍ സഭാസ്വത്തുക്കള്‍ വരെ അദ്ദേഹം ഉപയോഗിക്കുന്നു.

ഇക്കാര്യങ്ങളെല്ലാം ചൂണ്ടിക്കാട്ടി കര്‍ദിനാള്‍ മാര്‍ ജോര്‍ജ് ആലഞ്ചേരിക്ക് പരാതി നല്‍കിയിരുന്നെന്നും കത്തില്‍ പറയുന്നുണ്ട്. കന്യാസ്ത്രീയുടെ പരാതി തനിക്ക് ലഭിച്ചില്ലെന്നാണ് ആലഞ്ചേരി ഇപ്പോഴും ആവര്‍ത്തിക്കുന്നത്. ഇന്ത്യയിലെ വത്തിക്കാന്‍ സ്ഥാനപതിക്ക് ഭഗല്‍പ്പൂര്‍ ബിഷപ്പ് കുര്യന്‍ കണ്ടത്തില്‍ വഴിയാണ് കന്യാസ്ത്രീ ആദ്യം കത്ത് നല്‍കിയത്. അദ്ദേഹം ഇക്കാര്യം സ്ഥിരീകരിച്ചിരുന്നു. എന്നാല്‍ കത്തിലെ ഉള്ളടക്കം എന്താണെന്ന് തനിക്കറിയില്ലെന്നും വ്യക്തമാക്കിയിരുന്നു.