ജലന്തര്‍ ബിഷപ്പ് ഫ്രാങ്കോ മുളയ്ക്കലിനെതിരെ പീഡനത്തിനിരയായ കന്യാസ്ത്രീ ആദ്യം നല്‍കിയ പരാതി മാര്‍പ്പാപ്പയുടെ ശ്രദ്ധയില്‍ പെട്ടെട്ടില്ലെന്ന് വ്യക്തം. പരാതിയില്‍ നടപടി ഉണ്ടാകാത്തതിനെ തുടര്‍ന്നാണ് ഇരയായ കന്യാസ്ത്രീ വീണ്ടും ഫ്രാന്‍സിസ് മാര്‍പ്പാപ്പയ്ക്ക് കത്ത് നല്‍കിയത്. ഭഗല്‍പൂര്‍ ബിഷപ്പ് വഴിയാണ് ആദ്യം പരാതി നല്‍കിയത്. താനത് ഇന്ത്യയിലെ വത്തിക്കാന്‍ സ്ഥാനപതിക്ക് കൈമാറിയെന്ന് അദ്ദേഹവും സ്ഥിരീകരിച്ചിരുന്നു. അന്താരാഷ്ട്ര മാധ്യമങ്ങളിലടക്കം കന്യാസ്ത്രീകളുടെ സമരം വാര്‍ത്തയായതോടെ മാര്‍പ്പാപ്പയുടെ ശ്രദ്ധയില്‍പ്പെടുമെന്നാണ് പരാതിക്കാരിയും ജോയിന്റ് ചര്‍ച്ച് കൗണ്‍സിലും വിശ്വസിക്കുന്നത്. ഇതേ തുടര്‍ന്നാണ് കഴിഞ്ഞ ദിവസം വീണ്ടും പരാതി നല്‍കിയത്. 

ലത്തീന്‍ ബിഷപ്പുമായി ബന്ധപ്പെട്ട കാര്യങ്ങള്‍ നിയന്ത്രിക്കുന്ന, വത്തിക്കാനിലെ കര്‍ദ്ദിനാളും ബിഷപ്പ് ഫ്രാങ്കോ മുളയ്ക്കലും തമ്മില്‍ വളരെ അടുപ്പമാണ്. അദ്ദേഹമാണ് ഫ്രാങ്കോയ്ക്ക് സംരക്ഷണ കവചമൊരുക്കുന്നതെന്ന് ചില ക്രൈസ്തവ നേതാക്കള്‍ തന്നെ സൂചിപ്പിക്കുന്നു. ഇന്ത്യയിലെ കാര്യങ്ങള്‍ മാര്‍പ്പാപ്പയെ ധരിപ്പിക്കേണ്ടതും ഇതേ കര്‍ദ്ദിനാളാണ് എന്നത് ഫ്രാങ്കോയ്ക്ക് അനുഗ്രഹമായി. ഭാരതത്തിലുള്ള വത്തിക്കാന്‍ പ്രതിനിധി അപ്പോസ്തലിക് നൂഷ്യൊ മാര്‍പ്പാപ്പയുമായി ബന്ധപ്പെടുന്നതും ഇതേ കര്‍ദ്ദിനാള്‍ വഴിയാണ്. അതിനാലാണ് കന്യാസ്ത്രീ ആദ്യം നല്‍കിയ പരാതി മാര്‍പ്പാപ്പയ്ക്ക് മുന്നില്‍ എത്താത്തതെന്ന് അവരും അവര്‍ക്കൊപ്പം നില്‍ക്കുന്നവരും വിശ്വസിക്കുന്നു. 

കന്യാസ്ത്രീകള്‍ സമരത്തിനിറങ്ങിയതോടെ കാര്യങ്ങള്‍ കൈവിട്ട് പോകുമെന്ന് ഏതാണ്ട് ഉറപ്പായതായി മിഷനറീസ് ഓഫ് ജീസസിലെ തന്നെ ചിലര്‍ സൂചിപ്പിക്കുന്നു. ഉത്തര്‍പ്രദേശിലെ സെന്റ്‌മേരീസ് കോണ്‍വെന്റ് കൊള്ളയടിച്ചവര്‍ രണ്ട് കന്യാസ്ത്രീമാരെ ബലാല്‍സംഗം ചെയ്തിരുന്നു. 1990ലായിരുന്നു സംഭവം. അന്ന് രാജ്യമാകെ ക്രൈസ്തവസഭകള്‍ പ്രതിഷേധവുമായി തെരുവിലിറങ്ങിയിരുന്നു. ഇന്നിപ്പോള്‍ സഭയിലെ ഒരു സഹോദരിയെ ബിഷപ്പ് തന്നെ ബലാല്‍സംഗം ചെയ്തിട്ടും കന്യാസ്ത്രീകളില്‍ ഭൂരിപക്ഷവും മൗനംപാലിക്കുകയാണ്. മിഷണറീസ് ഓഫ് ജീസസിലെ സിസ്റ്റര്‍ റജീന പരാതിക്കാരിയായ കന്യാസ്ത്രിക്കും അവര്‍ക്കൊപ്പം നില്‍ക്കുന്ന കന്യാസ്ത്രീകള്‍ക്കുമെതിരെ വാര്‍ത്താക്കുറിപ്പ് വരെ ഇറക്കി.