രാജ്യത്തെ പോലീസ് സംവിധാനത്തെ ഒറ്റ ശൃംഖലയിലാക്കാന്‍ ലക്ഷ്യമിട്ട് ആവിഷ്‌കരിച്ച ക്രൈം ആന്‍ഡ് ക്രിമിനല്‍ ട്രാക്കിങ് സിസ്റ്റം' (സി.സി.ടി..എസ്.) സംസ്ഥാനത്ത് പ്രവര്‍ത്തനക്ഷമമായി. പോലീസ് സേവനങ്ങള്‍ ഡിജിറ്റലാക്കാനും കുറ്റകൃത്യങ്ങളുടെയും കുറ്റവാളികളുടെയും ഡിജിറ്റല്‍ വിവരശേഖരണവും ലക്ഷ്യമിട്ടാണ് ഇത്. ദുരന്തനിവാരണമുള്‍പ്പെടെയുള്ള സന്ദര്‍ഭങ്ങളില്‍ പൊതുജനങ്ങള്‍ക്ക് സേവനങ്ങള്‍ കൂടുതല്‍ ഫലപ്രദമായും വേഗത്തിലുമെത്തിക്കാന്‍ ഇനി സാധിക്കും.

രാജ്യത്തെ എല്ലാ പോലീസ് സ്‌റ്റേഷനുകളെയും ബന്ധിപ്പിക്കാന്‍ കേന്ദ്ര സര്‍ക്കാരിന്റെ നാഷണല്‍ ഇഗവേണന്‍സ് പദ്ധതിയുടെ കീഴില്‍ 2009ല്‍ ആരംഭിച്ച പദ്ധതിയാണ് കേരളത്തില്‍ പൂര്‍ണസജ്ജമാകുന്നത്. സംസ്ഥാനത്ത് സി.സി.ടി.എന്‍.എസ്. വിവിധ ഘട്ടങ്ങളിലായി പൂര്‍ത്തീകരിച്ചുവരുകയായിരുന്നു. പൂര്‍ണമായും പ്രവര്‍ത്തനസജ്ജമായതോടെ സംസ്ഥാനത്തെ 531 പോലീസ് സ്‌റ്റേഷനുകള്‍ ഉള്‍പ്പെടെ 819 പോലീസ് ഓഫീസുകള്‍ ഡിജിറ്റല്‍ ശൃംഖലയിലായിക്കഴിഞ്ഞു.
വിവിധ സംസ്ഥാനങ്ങളിലെ പോലീസ് സ്‌റ്റേഷനുകളും ഈ ശൃംഖലയിലുണ്ട്. കേരളത്തില്‍ വിവിധ കേന്ദ്രങ്ങളിലായി 2641 കംപ്യൂട്ടറുകളും 1211 പ്രിന്ററുകളും ഇതിന്റെ ഭാഗമായി വിതരണം ചെയ്തു. 16 പരിശീലന കേന്ദ്രങ്ങളിലായി 21,440 പോലീസ് ഉദ്യോഗസ്ഥര്‍ക്ക് പരിശീലനം നല്‍കി. 10,22,000 ഫയലുകള്‍ ഡിജിറ്റൈസ് ചെയ്ത് ഇതിലേക്ക് മാറ്റി. ഒരുകോടിയിലധികം ജനറല്‍ ഡയറികളും 35 ലക്ഷത്തോളം പ്രഥമവിവര റിപ്പോര്‍ട്ടുകളും ഡിജിറ്റല്‍ രൂപത്തിലാക്കി. പ്രവര്‍ത്തനങ്ങള്‍ സുഗമമാക്കാന്‍ സ്‌റ്റേറ്റ് ഡേറ്റാസെന്ററും നാഷണല്‍ ഡേറ്റാ സെന്ററും ഡിസാസ്റ്റര്‍ റിക്കവറി സെന്ററും സജ്ജമാക്കി. സംസ്ഥാനത്തിന് ആവശ്യമായ രീതിയില്‍ ഇതിനുള്ള ആപ്ലിക്കേഷനില്‍ മാറ്റംവരുത്താനും റിപ്പോര്‍ട്ടുകള്‍ തയ്യാറാക്കാനും സാധിച്ചിട്ടുണ്ട്.

പൊതുജനങ്ങള്‍ക്ക് പരാതികള്‍ ഓണ്‍ലൈനായി നല്‍കുന്നതുള്‍പ്പെടെയുള്ള സേവനങ്ങള്‍ ലഭ്യമാക്കാന്‍ പൊതുജന സൗഹാര്‍ദ പോര്‍ട്ടലായ 'തുണ' ഈയിടെ പ്രവര്‍ത്തനം തുടങ്ങിയിരുന്നു. കുറ്റകൃത്യങ്ങള്‍ കംപ്യൂട്ടര്‍ സഹായത്തോടെ കണ്ടെത്തല്‍, മുന്‍കരുതല്‍, തടയല്‍ എന്നിവ സുഗമമാക്കാന്‍ ഇതുവഴി കഴിയും. ഒപ്പം കുറ്റവാളികളുടെ പ്രവര്‍ത്തനരീതി, സ്വഭാവം എന്നിവ ക്രോഡീകരിക്കാനും കുറ്റവാളികളെയും കുറ്റകൃത്യങ്ങളെയും കുറിച്ചുള്ള വിവരശേഖരണത്തിനും കൈമാറ്റത്തിനും കേന്ദ്രീകൃതമായി പ്രവര്‍ത്തനവും ഏകോപനവും നടത്താനും കഴിയും. സി.സി.ടി.എന്‍.എസ്. സംവിധാനം ഉടന്‍ ലൈവാകും.