കന്യാസ്ത്രീയെ ബലാല്‍സംഗം ചെയ്ത ജലന്തര്‍ ബിഷപ്പ് ഫ്രാങ്കോമുളയ്ക്കല്‍ അന്വേഷണ സംഘത്തിന് മുന്നില്‍ ഹാജരാകണമെന്ന് ആവശ്യപ്പെട്ട് പൊലീസ് നോട്ടീസ് നല്‍കും. അന്വേഷണ പുരോഗതി റിപ്പോര്‍ട്ട് നാളെ ഹൈക്കോടതിയില്‍ സമര്‍പ്പിക്കും മുമ്പാണ് നിര്‍ണയക തീരുമാനം. അതേസമയം അറസ്റ്റ് വൈകുമെന്നാണ് അറിയുന്നത്. ഇത് സംബന്ധിച്ച വ്യക്തമായ സൂചന കോട്ടയം ഡിവൈ.എസ്.പി നല്‍കിയില്ല.

ഐ.ജി വിജയ് സാഖറയുടെ നേതൃത്വത്തില്‍ തൊളിവുകളും മൊഴികളും ഇന്ന് കൊച്ചിയില്‍ വിശകലനം ചെയ്യുന്നുണ്ട്. ഇതിനായി കോട്ടയം എസ്.പി ഹരിശങ്കര്‍ കൊച്ചിയിലെത്തി. കേസ് സംബന്ധിച്ച് പൊലീസിന് വലിയ സമ്മര്‍ദ്ദമുണ്ട്. ബിഷപ്പും പൊലീസും ഒത്തുകളിക്കുകയാണെന്ന് പരാതിക്കാരിയും അവരോടൊപ്പമുള്ള മറ്റ് കന്യാസ്ത്രീകളും ആരോപിച്ചിരുന്നു.

2014നും 16നും ഇടയില്‍ ബിഷപ്പ് തന്നെ ബലാല്‍സംഗം ചെയ്‌തെന്നാണ് ആരോപണം. എന്നാല്‍ ആദ്യത്തെ ബലാല്‍സംഗം നടന്നെന്ന് പറയുന്ന ദിവസത്തിന് ശേഷം പലപരിപാടികളിലും ബിഷപ്പും പരാതിക്കാരിയും പങ്കെടുത്തിരുന്നെന്ന് ജലന്തര്‍ രൂപത ചൂണ്ടിക്കാട്ടുന്നു. ആദ്യമായി ബലാല്‍സംഗം ചെയ്‌തെന്ന് പറയുന്ന ദിവസം ബിഷപ്പ് കുറവിലങ്ങാട് മഠത്തിലല്ല താമസിച്ചത്. അതിനടുത്ത ദിവസം കന്യാസ്ത്രീയുടെ വീട്ടില്‍ നടന്ന ചടങ്ങില്‍ ബിഷപ്പ് ഫ്രാങ്കോ മുളയ്ക്കല്‍ പങ്കെടുത്തു. അന്ന് കന്യാസ്ത്രീ വളരെ സന്തോഷത്തോടെയാണ് ബിഷപ്പിനെ സ്വീകരിച്ചത്. ബലാല്‍സംഗത്തിനിരയായ ഒരു സ്ത്രീക്ക് ഇങ്ങനെ ചെയ്യാനാവുമോ? കന്യാസ്ത്രീക്കെതിരെ അവരുടെ ബന്ധു പരാതി നല്‍കിയ ശേഷമാണ് ബിഷപ്പിനെതിരെ തിരിഞ്ഞത്. ആ പരാതിയില്‍ കഴമ്പുണ്ടെന്ന് ബിഷപ്പ് കണ്ടെത്തിയിരുന്നു എന്നും രൂപത പുറത്തിറക്കിയ വാര്‍ത്താക്കുറിപ്പില്‍ പറയുന്നു.