കന്യാസ്ത്രീയെ ബലാല്‍സംഗം ചെയ്ത കേസില്‍ കുറ്റാരോപിതനായ മിഷണറീസ് ഓഫ് ജീസസ് ബിഷപ്പ് ഫ്രാങ്കോ മുളയ്ക്കലിന് പരസ്യപിന്തുണയുമായി ചങ്ങനാശേരി സഹായ മെത്രാന്‍ തോമസ് തറയില്‍ എത്തി. തന്റെ ഔദ്യോഗിക ഫെയിസ്ബുക്ക് പേജിലൂടെയാണ് അദ്ദേഹം ഫ്രാങ്കോയുടെ പേരെടുത്ത് പറയാതെ പിന്തുണ അറിയിച്ചത്. കുറ്റവാളിയെന്ന് തെളിയും വരെ ഏതൊരാളെയും നിരപരാധിയെന്ന് കരുതണമെന്നാണ് സഹായമെത്രാന്റെ ആവശ്യം. കുറ്റാരോപിതന്‍ വൈദികനും കത്തോലിക്കാ മെത്രാനും ആയത് കൊണ്ടാണ് കുറ്റംതെളിയിക്കും മുമ്പ് കുറ്റവാളിയെന്ന് മുദ്രകുത്തുന്നതെന്നും അദ്ദേഹം പറയാതെ പറയുന്നു. 

ഫെയിസ്ബുക്ക് പോസ്റ്റ് പൂര്‍ണമായി വായിക്കാം...

കുറ്റവാളിയെന്ന് തെളിയിക്കപ്പെടുന്നതുവരെ കുറ്റാരോപിതനെ നിരപരാധിയെന്ന് കരുതണം എന്നാണ് ഇതുവരെ പഠിച്ചിട്ടുള്ളത്. എന്നാല്‍ ഇപ്പോള്‍ ഒരു കാര്യം മനസിലായി: കുറ്റാരോപിതന്‍ ഒരു വൈദികനോ കത്തോലിക്ക മെത്രാനോ ആണെങ്കില്‍ നിരപരാധിയെന്ന് തെളിയിക്കുന്നതുവരെ അയാള്‍ കുറ്റവാളിയെന്ന് കണക്കാക്കപ്പെടും!!! ഇത് കാലത്തിന്റെ മാറ്റമാണോ അതോ നീതിബോധത്തിന്റെ പരിണാമമാണോയെന്നു എനിക്ക് നിശ്ചയം ഇല്ല.... പലരും സഭയുടെ മൗനത്തെക്കുറിച്ചു എന്നോട് ചോദിച്ചു. എനിക്കൊരുത്തരം മാത്രമേ ഉള്ളു...സത്യം അറിയാതെ നിലപാടെടുക്കാന്‍ സഭക്ക് സാധിക്കില്ല. അന്വേഷണവും വിചാരണയും കഴിയാതെ കുറ്റവാളിയെ പ്രഖ്യാപിക്കാന്‍ കഴിയുമെന്നതും കേരളം മോഡലിന്റെ പുതിയ സംഭാവനയായി കാണാവുന്നതാണ്.