ഇന്ധനവില വര്‍ധനയ്‌ക്കെതിരെ രാജ്യത്ത് വ്യാപക പ്രതിഷേധം അലയടിക്കുമ്പോഴും എക്‌സൈസ് തീരുവ കുറയ്ക്കില്ലെന്ന നിലപാടുമായി കേന്ദ്രസര്‍ക്കാര്‍. എക്‌സൈസ് തീരുവ രണ്ടുരൂപ കുറച്ചാല്‍ 30000 കോടി രൂപയുടെ നഷ്ടമുണ്ടാകുമെന്നാണ് കേന്ദ്രസര്‍ക്കാരിന്റെ അവകാശവാദം. ഇതുകൂടാതെ ധനകമ്മി ഉയരാനും രൂപയുടെ മൂല്യം വീണ്ടും ഇടിയാനും ഇടയാക്കുമെന്നും കേന്ദ്രം വാദിക്കുന്നു. സംസ്ഥാനങ്ങളുടെ വികസനപ്രവര്‍ത്തനങ്ങളെ വരെ ബാധിക്കുമെന്നതിനാല്‍ പ്രതിഷേധത്തില്‍ നിന്ന് വിട്ടുനില്‍ക്കണമെന്ന് കേന്ദ്രം ആവശ്യപ്പെടുന്നത്.

തുടര്‍ച്ചയായി നാല്‍പ്പത്തി മൂന്നാം ദിവസവും റെക്കോഡുകള്‍ ഭേദിച്ച് ഇന്ധനവില കൂടി. കോഴിക്കോട് പെട്രോളിന് മൂന്നു പൈസകൂട്ടി 83രൂപ 24പൈസയാണ് ഇന്നത്തെ വില. ഡീസലിനും സമാനമായ വര്‍ധനയുണ്ടായി. മൂന്നുപൈസകൂട്ടി 77രൂപ 25 പൈസയായി. തിരുവനന്തപുരത്ത് ഇന്ധനവിലയില്‍ മാറ്റമില്ല. ഡല്‍ഹിയില്‍ പെട്രോളിന് 14 പൈസകൂടി 80രൂപ 87 പൈസയായി. ഡീസലിനും 14 പൈസകൂടി 72 രൂപ 97 പൈസയായി. മൂന്നാഴ്ച കൊണ്ട് പെട്രോളിന് മൂന്നുരൂപ നാല്‍പത്തൊന്‍പത് പൈസയും ഡീസലിന് നാലുരൂപ പതിനെട്ട് പൈസയുമാണ് കൂടിയത്.