വളരെ ചെറുപ്പത്തില്‍ തന്നെ സിനിമയില്‍ സംഗീതം ചെയ്യാന്‍ അവസരം ലഭിച്ചയാളാണ് ബാലഭാസ്‌ക്കര്‍. പക്ഷേ, സിനിമയുടെ പ്രഭയില്‍ തന്നിലെ കലാകാരനെ ബലികൊടുക്കാന്‍ അദ്ദേഹം തയ്യാറായിരുന്നില്ല. ചില വിട്ടുവീഴ്ചകള്‍കള്‍ക്ക് തയ്യാറായിരുന്നെങ്കില്‍ തിരക്കുള്ള സിനിമാ സംഗീതക്കാരനാകാമായിരുന്ന ബാലഭാസ്‌കര്‍ അതുപേക്ഷിച്ചു സ്വന്തമായ വഴിയേ സഞ്ചരിക്കുകയായിരുന്നു. ഒരു സിനിമാ ഗായകനോ സംഗീത സംവിധായകനോ ലഭിക്കുന്നതിലും പ്രശസ്തിയും ആരാധകരെയും നേടിയെടുക്കാന്‍ ബാലഭാസ്‌കറിനു കഴിഞ്ഞു. ഗുരുവും വല്ല്യമ്മാവനും പ്രശസ്ത വയലിനിസ്റ്റുമായ ബി. ശശികുമാറാണ് ബാലഭാസ്‌കറിന് വയലിന്റെ ആദ്യപാഠങ്ങള്‍ പകര്‍ന്നു നല്‍കിയത്. എങ്ങനെ ഇത്ര നന്നായി വയലിന്‍ വഴങ്ങുന്നുവെന്നു ചോദിച്ചപ്പോഴെല്ലാം 'എനിക്കു വയലിനെ പേടിയില്ലെന്ന' മറുപടിയായായിരുന്നു അദ്ദേഹം എപ്പോഴും നല്‍കിയിരുന്നത്.ചെറുപ്രായത്തില്‍ തന്നെ വയലിനില്‍ മാസ്മരികത തീര്‍ത്ത ബാലഭാസ്‌കര്‍ പതിനേഴാം വയസ്സില്‍ 'മംഗല്യപ്പല്ലക്ക്' എന്ന സിനിമയ്ക്കു സംഗീതസംവിധാനം നിര്‍വഹിച്ചുകൊണ്ടു ചലച്ചിത്രരംഗത്തേക്കും കടന്നുവന്നു. 'കണ്ണാടിക്കടവത്ത്' ആയിരുന്നു അദ്ദേഹം രണ്ടാമതായി സംഗീതസംവിധാനം നിര്‍വഹിച്ച ചിത്രം.

എന്നാല്‍, സംഗീതസംവിധാന രംഗം തന്റെ തട്ടകമല്ലെന്ന് തിരിച്ചറിഞ്ഞതോടെ പതിയെ പിന്മാറി. പത്തു വര്‍ഷത്തിനു ശേഷം 'മോക്ഷം' എന്ന സിനിമയ്ക്കായി ഈണമൊരുക്കി. ആസ്വാദകരെ കീഴടക്കിയ നൂറുകണക്കിന് ആല്‍ബങ്ങളും സംഗീതപരിപാടികളുമായിരുന്നു ബാലഭാസ്‌കറിനെ അടയാളപ്പെടുത്തിയത്. ദ് ബിഗ് ബാന്‍ഡുമായി ലോകപ്രശസ്തരായ സംഗീതജ്ഞര്‍ക്കൊപ്പം ഫ്യൂഷന്‍ ഒരുക്കി, സംഗീതപ്രേമികളുടെ ഹൃദയത്തില്‍ ബാലഭാസ്‌കര്‍ ചിരപ്രതിഷ്ഠ നേടിയെടുത്തു. കാലം മാറുന്നതിനനുസരിച്ചുള്ള മാറ്റങ്ങള്‍ക്കൊപ്പം നടന്ന അദ്ദേഹം ഇലക്ട്രിക് വയലിനിലൂടെ യുവതലമുറയെ ഹരം കൊള്ളിക്കുകയും ചെയ്തു.
അതേസമയത്തു തന്നെ ശാസ്ത്രീയസംഗീത കച്ചേരികളില്‍ ചിട്ടയായ ശുദ്ധസംഗീതത്തിനൊപ്പവും ബാലയുടെ വയലില്‍ ഈണംപൊഴിച്ചു. അപ്രതീക്ഷിതമായ അപകടം തട്ടിയെടുത്തത് മലയാളി നെഞ്ചേറ്റിയ വയലിന്‍ വാദനത്തിന്റെ നിറ വസന്തത്തെയാണ്. സംഗീതത്തിന്റെ ഏത് രൂപത്തിനുമൊപ്പം വയലിനിലൂടെ ഈണമായി സഞ്ചരിച്ച് അതുല്യ പ്രതിഭയേയാണ്. പകരം വയ്ക്കാനില്ലാത്ത ആ വയലിന്‍ തന്ത്രികള്‍ ഇടയ്ക്ക് വച്ച് മുറിയുമ്പോള്‍ മലയാളിക്ക് തീരാവേദനയാകുന്നു.