കേന്ദ്ര സർക്കാർ ഇന്ധന വില കുറച്ച തീരുമാനം അറിയിച്ചെങ്കിലും സംസ്ഥാന സർക്കാർ പെട്രോള്‍, ഡീസല്‍ നികുതി കുറയ്ക്കില്ലെന്ന് ധനമന്ത്രി ടി എം തോമസ് ഐസക് അറിയിച്ചു. വർധിപ്പിച്ച എക്സൈസ് തീരുവ മുഴുവനായി കേന്ദ്ര സർക്കാർ കുറയ്ക്കുമ്പോൾ സംസ്ഥാനം വില കുറയ്ക്കുന്ന കാര്യം പരിഗണിക്കാമെന്നായിരുന്നു മന്ത്രിയുടെ പ്രതികരണം.

"ഡീസൽ 14 രൂപ കൂട്ടിയിട്ട് രണ്ടര രൂപ കുറച്ചാൽ മതിയാകില്ല. . രാജസ്ഥാൻ തെരഞ്ഞെടുപ്പ് മുന്നിൽ കണ്ടുള്ള നടപടിയാണിത്. പെട്രോളിന് 9 രൂപ കുറയ്ക്കണം. വർദ്ധിപ്പിച്ച തുക കുറയ്ക്കാൻ കേന്ദ്രം തയ്യാറായാൽ സംസ്ഥാനവും നികുതി കുറയ്ക്കുന്ന കാര്യം ആലോചിക്കും", മന്ത്രി തോമസ് ഐസക് പറഞ്ഞു

അതേസമയം കേന്ദ്ര സർക്കാരിനു പിന്നാലെ ബിജെപി ഭരിക്കുന്ന മഹാരാഷ്ട്രയിലും ഗുജറാത്തിലും ഇന്ധന വില കുറച്ചു. പെട്രോളിനും ഡീസലിനും രണ്ടര രൂപ വീതമാണ് കുറച്ചത്. ഇതോടെ ഇരു സംസ്ഥാനങ്ങളിലും പെട്രോൾ, ഡീസൽ വിലയിൽ അഞ്ച് രൂപയുടെ വീതം കുറവുണ്ടാകും.

1.50 രൂപ എക്സൈസ് തീരുവയും ഒരു രൂപ എണ്ണക്കമ്പനികളും കുറച്ച് ഇന്ധന വില ലിറ്ററിന് 2.50 രൂപ കേന്ദ്രം കുറച്ചതിന് പിന്നാലെയാണ് കേരള സർക്കാർ നിലപാട് വ്യക്തമാക്കിയത്. കേന്ദ്രം തീരുവ കുറച്ച മാതൃകയിൽ സംസ്ഥാനങ്ങളും നികുതി കുറയ്ക്കണമെന്ന് കേന്ദ്ര ധനമന്ത്രി അരുണ്‍ ജയ്റ്റ്ലി ആവശ്യപ്പെട്ടിരുന്നു.