പ്രതിപക്ഷനേതാവ് രമേശ്‌ചെന്നിത്തലയ്‌ക്കെതിരെ പരിഹാസവുമായി സംസ്ഥാന വൈദ്യുതി വകുപ്പ് മന്ത്രി എം.എം.മണി. ഫേസ്ബുക്ക് പോസ്റ്റിലൂടെയാണ് മന്ത്രി പ്രതിപക്ഷനേതാവിനെതിരെ രൂക്ഷമായ ഭാഷയിൽ പരിഹസിച്ചത്.ജനാധിപത്യ മുന്നണി സർക്കാരിന്റെ മികച്ച പ്രവർത്തനങ്ങൾ കണ്ട് മനോനില തെറ്റിയ രീതിയിലാണ് പ്രതിപക്ഷ നേതാവിന്റെ പെരുമാറ്റമെന്ന് മന്ത്രിയുടെ പോസ്റ്റിൽ പറയുന്നു .

മന്ത്രി എം .എം മണിയുടെ ഫേസ്ബുക്ക് പോസ്റ്റ്

കേരളത്തിലെ സമസ്ത മേഖലകളിലും വികസന, ക്ഷേമ പദ്ധതികൾ ‍‍ നടപ്പാക്കി, ജനസ്വാധീനം വർദ്ധിപ്പിച്ച്, രാജ്യത്തെ ഒന്നാം നമ്പർ സംസ്ഥാനമായി മുന്നേറുന്ന ശ്രീ. പിണറായി വിജയന്റെ നേതൃത്വത്തിലുള്ള ഇടതുപക്ഷ ജനാധിപത്യ മുന്നണി സർക്കാരിന്റെ മികച്ച പ്രവർത്തനങ്ങൾ കണ്ട് മനോനില തെറ്റിയ പ്രതിപക്ഷനേതാവ് ഇപ്പോൾ മദ്യത്തിന്റെ പേര് പറഞ്ഞും, ശബരിമല വിഷയത്തിലുണ്ടായ സുപ്രീം കോടതി വിധി മറച്ചുവച്ചും, പിച്ചും പേയും പറയുന്നതു പോലെയാണ് പ്രതികരിക്കുന്നത്. ഏത് വിഷയത്തിലും “കേന്ദ്ര സർക്കാർ ഇടപെടണം” എന്ന അദ്ദേഹത്തിന്റെ അഭിപ്രായപ്രകടനങ്ങളിൽ കാണുന്നത് സമനില തെറ്റിയതിന്റെ ലക്ഷണമാണ്. ഇത് പരിഹാസ്യവുമാണ്.