ശബരിമല കോണ്ഗ്രസ് ഏറ്റെടുത്തത് രാഹുലിന്റെ നിര്ദേശത്തോടെ; വരുന്ന ലോക്സഭാ തെരഞ്ഞടുപ്പില് കോണ്ഗ്രസിന് പതിനാല് മുതല് പതിനാറ് സീറ്റ് വരെ കിട്ടാനിടയുണ്ടെന്ന് ഡല്ഹിയില് നിന്നും രഹസ്യ റിപ്പോര്ട്ട്; മുല്ലപ്പള്ളി രാമചന്ദ്രന് തെരഞ്ഞടുപ്പിന്റെ പൂര്ണ ചുമതല പ്രവര്ത്തനം; ഊര്ജിതമാക്കാന് രാഹുല് നേരിട്ട് കേരളത്തില്
വിവാദങ്ങള് സര്ക്കാരിനെതിരെ കത്തിപടരുന്ന സാഹചര്യത്തില് വരുന്ന ലോക്സഭാ തെരഞ്ഞടുപ്പില് കോണ്ഗ്രസിന് പതിനാല് മുതല് പതിനാറ് സീറ്റ് വരെ കിട്ടാനിടയുണ്ടെന്ന് ഡല്ഹിയില് നിന്നും രഹസ്യ റിപ്പോര്ട്ട്. ഇതിന്റെ അടിസ്ഥാനത്തില് ജില്ലാ, മണ്ഡലം തലങ്ങളില് കോണ്ഗ്രസിന്റെ പ്രവര്ത്തനം ഊര്ജിതമാക്കണമെന്ന് ഹൈക്കമാന്റ് നിര്ദ്ദേശിച്ചു.
മുല്ലപ്പള്ളി രാമചന്ദ്രനാണ് തെരഞ്ഞടുപ്പിന്റെ പൂര്ണ ചുമതല കോണ്ഗ്രസ് ഹൈക്കമാന്റ് നല്കിയിരിക്കുന്നത്. പിണറായി സര്ക്കാരിന്റെ ജനവിരുദ്ധ നയങ്ങള് ഭംഗിയായി മുതലെടുക്കണമെന്നാണ് നിര്ദ്ദേശം. ശബരിമല വിഷയത്തില് വിശ്വാസികള്ക്കൊപ്പം നിന്ന് പോരാടാനുള്ള തീരുമാനം ഇതിന്റെ ഭാഗമാണ്. കോണ്ഗ്രസ് സമര രംഗത്ത് സജീവമാകുന്നതോടൊപ്പം ലീഗിനെയും കേരള കോണ്ഗ്രസിനെയും രംഗത്തിറക്കാന് നിര്ദ്ദേശിച്ചതും ഹൈക്കമാന്റാണ്.
മുസ്ലീം ലീഗും മാണിയും ശബരിമലക്ക് വേണ്ടി രംഗത്തെത്തുമ്പോള് അത് കോണ്ഗ്രസിന്റെ മതേതര കാഴ്ചപ്പാടില് ചന്തം പകരുമെന്നാണ് ഹൈക്കമാന്റിന്റെ വിശ്വാസം. മാണിയെ ശബരിമലക്ക് വേണ്ടി ഉപവാസ പ്രാര്ത്ഥനക്ക് ഹൈക്കമാന്റ് നിയോഗിച്ചപ്പോള് ലീഗിനെ ഹിന്ദുമത വിശ്വാസികള്ക്കെപ്പം നിന്ന് വഴി തടയാനും നിര്ദ്ദേശിച്ചു. ശബരിമലയില് സ്ത്രീകള് പ്രവേശിക്കുന്നത് വിശ്വാസികള് തടയുകയാണെങ്കില് പത്തനംതിട്ടയില് ശക്തരായ മാണിയും വിശ്വാസികള്ക്ക് ഒപ്പം കൂടാനാണ് കോണ്ഗ്രസ് നിര്ദ്ദേശിച്ചിരിക്കുന്നത്. ഇത്തരത്തില് കോണ്ഗ്രസില് നിന്ന് അകന്നുപോയ ഹിന്ദുമത വിശ്വാസികളെ പാര്ട്ടിയില് തിരികെയെത്തിക്കും.
ലീഗിന്റെ പ്രവര്ത്തനം അതിശക്തമായ തരത്തിലാണ്. കോണ്ഗ്രസിന്റെ മതേതര കാഴ്ചപാട് തിരികെ കൊണ്ടുവരാനാണ് ലീഗും ശ്രമിക്കുന്നത്. കഴിഞ്ഞ ഉമ്മന്ചാണ്ടി സര്ക്കാരിന്റെ കാലത്ത് മതേതര കാഴ്ചപ്പാട് നഷ്ടമായതാണ് ഹിന്ദുവോട്ടുകള് സിപി എമ്മില് ഏകീകരിക്കപ്പെട്ടത്. എന്നാല് അധികാരത്തിലെത്തിയ സിപിഎം അക്കാര്യങ്ങളൊക്കെ വിസ്മരിച്ച് ഹിന്ദുക്കള്ക്കെതിരെ നിലപാട് എടുത്തു. ഇടതുപക്ഷത്തിനൊപ്പം നിന്ന എന് എസ് എസിനെയും എസ്എന് ഡി പിയെയും പിണക്കി. മാതൃഭൂമിയുടെ നോവല് വിവാദത്തില് പുരോഗമന വാദികള്ക്കൊപ്പം നില കൊണ്ടതും വിനയായി. ഹൈന്ദവരെ പിണക്കാനുള്ള പ്രധാന കാര്യങ്ങള് ഇവയാണ്.
അതേസമയം പള്ളി വിവാദങ്ങളില് സുപ്രീം കോടതി നിര്ദ്ദേശിച്ചിട്ടുള്ള ഒന്നും സര്ക്കാര് നടപ്പാക്കിയില്ല. ഇക്കാര്യം ചെന്നിത്തല തുറന്നു പറഞ്ഞത് ബോധപൂര്വം തന്നെയാണ്. കോണ്ഗ്രസ് ഹൈക്കമാന്റിന്റെ അറിവോടെ തന്നെയാണ് ഇത്. രമേശിനെ മുന്നില് നിര്ത്തി ഹിന്ദുക്കള്ക്കു വേണ്ടിയും ഉമ്മന് ചാണ്ടിയെയും കെ.എം മാണിയെയും മുന്നില് നിര്ത്തി ക്രൈസ്തവര്ക്ക് വേണ്ടിയും കുഞ്ഞാലിക്കുട്ടിയെ മുന്നില് നിര്ത്തി മുസ്ലീങ്ങള്ക്ക് വേണ്ടിയും വാദിക്കും. എന്നിട്ട് മുല്ലപ്പള്ളി ,സുധാകരന്, കൊടിക്കുന്നില്, മുരളി എന്നിവരെ തിരുത്തി കോണ്ഗ്രസിന്റെ പ്രഖ്യാപിത മതേതരവീക്ഷണം പ്രചരിപ്പിക്കുകയും ചെയ്യും.
ബിഷപ്പ് ഫ്രാങ്കോയെ കാണാന് മാണിയെ അയച്ചതും ഇതേ തന്ത്രം തന്നെയാണ്. മാണിയുടെ നീക്കം കോണ്ഗ്രസിന്റെ അറിവോടെയാണ്. കാരണം ബിഷപ്പിനൊപ്പമാണ് ക്രൈസ്തവ സമൂഹം മൊത്തത്തില് നില കൊള്ളുന്നത്. കേരളത്തിലെ പ്രധാന പിതാക്കന്മാരെല്ലാം ഫ്രാങ്കോയെ കാണാന് ജയിലില് എത്തിയിരുന്നു.
കോണ്ഗ്രസില് ഇത് ഉണര്വിന്റെ കാലമാണ്. പിണറായിയുമായി ഉടക്കി നില്ക്കുന്ന വിവിധ ജാതിമതസ്ഥരെ തങ്ങളുടെ പ്ലാറ്റ് ഫോമിലെത്തിക്കാനാണ് കോണ്ഗ്രസിന്റെ നീക്കം. മുല്ലപ്പള്ളി അതിന് ഇന്ധനം പകരും. ബി ജെ പിയുടെ തകര്ച്ചയും കോണ്ഗ്രസിനെ ആനന്ദിപ്പിക്കുന്നു.
https://www.facebook.com/Malayalivartha
