23 കോടിയുടെ തട്ടിപ്പ് നടത്തിയ മുന്‍ കൊരട്ടി പള്ളി വികാരി മാത്യു മണവാളന്‍ ഒളിവില്‍ ആഘോഷജീവിതം നയിക്കുകയാണെന്നും ഇദ്ദേഹത്തിന് മുന്‍കൂര്‍ ജാമ്യം നിഷേധിച്ചിട്ടും പൊലീസ് ഒളിച്ചുകളിക്കുകയാണെന്നും വിശ്വാസികള്‍ ആരോപിക്കുന്നു. ഇതേക്കുറിച്ച് പരാതിപ്പെടാനെത്തിയ വിശ്വാസികളെ ഉന്നത പൊലീസ് ഉദ്യോഗസ്ഥര്‍ പരിഹസിച്ച് ഇറക്കിവിട്ടെന്നും ആക്ഷേപം. ഒരു കൂട്ടം വിശ്വാസികളുടെ ഫെയിസ്ബുക്ക് പേജായ പാവം കുഞ്ഞാടിലാണ് ഇത് സംബന്ധിച്ച വിവരങ്ങള്‍ വന്നത്. 

ഒളിവില്‍ കഴിയുന്ന പാതാവ് പെരുന്നാള്‍ ആഘോഷം അട്ടിമറിക്കാന്‍ നീക്കം നടത്തുന്നവര്‍ക്ക് ഒത്താശ ചെയ്തു കൊടുക്കുന്നുണ്ടെന്നും സംശയമുണ്ട്. അതിനാല്‍ കൊരട്ടി പള്ളി വിശ്വാസികള്‍ വീണ്ടും കോടതിയെ സമീപിക്കാന്‍ ഒരുങ്ങുകയാണ്. ഫാ.മാത്യൂ മണവാളനും രൂപത നേതൃത്വത്തിലുള്ളവരും എസ്പിയെ കണ്ട് കാര്യങ്ങള്‍ ധരിപ്പിച്ചതായാണ് വിവരം. 23 കോടിരൂപയുടെ തട്ടിപ്പ് നടത്തിയെന്ന് കാട്ടി ഇടവകാംഗമായ റെന്നി ജോര്‍ജ്ജ് ആണ് പരാതി നല്‍കിയത്. എന്നാല്‍ കോടതി നിര്‍ദ്ദേശിച്ച ശേഷമാണ് കൊരട്ടി പൊലീസ് കേസെടുത്ത് അന്വേഷണം ആരംഭിച്ചത്. ഫാ. മാത്യു മണവാളനും മറ്റ് 9 പേര്‍ക്കുമെതിരെ കേസെടുത്തത്.

ഇതോടെ ഫാ.മാത്യുമണവാളന്‍ മുന്‍കൂര്‍ ജാമ്യം തേടിയെങ്കിലും ഹൈക്കോടതി തള്ളി. പള്ളിയില്‍ നേര്‍ച്ചയായി ലഭിച്ച സ്വര്‍ണം വിറ്റതിലും സ്ഥലം വാങ്ങിയതിലും ഭണ്ഡാര തുകയിലും മാത്യു മണവാളനും ചില കമ്മിറ്റിക്കാരും വെട്ടിപ്പ് നടത്തിയതായി പള്ളിയില്‍ നടന്ന തെളിവെടുപ്പില്‍ മനസിലാക്കിയിരുന്നു. 2014 മുതല്‍ 18 വരെയാണ് തട്ടിപ്പ് നടന്നത്. അന്നത്തെ ഭരണസമിതിക്കും വിവിധ കമ്മിറ്റി ഭാരവാഹികള്‍ക്കും പള്ളിക്കമ്മറ്റിയിലേക്ക് മത്സരിക്കുന്നതിന് വിലക്കേര്‍പ്പെടുത്തിയിരുന്നു. അല്ലാതെ രൂപതയില്‍ നിന്ന് മറ്റ് നടപടികളൊന്നും ഉണ്ടായില്ലെന്ന് വിശ്വാസികള്‍ ചൂണ്ടിക്കാണിച്ചു. ഫാ.മാത്യു മണവാളന് കണ്ടനാട് ഉണ്ണിമിശിഹ പള്ളിവികാരിയായി സ്ഥലംമാറ്റി നിയമനവും നല്‍കി. 

ഒക്ടോബര്‍ 10ന് പള്ളി പെരുന്നാള്‍ തുടങ്ങും. ആ സമയത്ത് പള്ളിയിലെ വരവും ചെലവും സംമ്പന്ധിച്ച കണക്കുകള്‍ എടുക്കും. അത് ഭയന്നാണ് ഫാ. മാത്യുമണവാളനും അന്നത്തെ ഭരണസമിതി അംഗങ്ങളും പെരുന്നാള്‍ അലങ്കോലമാക്കാന്‍ നീക്കം നടത്തുന്നതെന്ന് വിശ്വാസികള്‍ ആരോപിക്കുന്നു. കൂടാതെ തന്നെ എതിര്‍ക്കുന്നവര്‍ പള്ളി ഭരണസമിതിയിലേക്ക് കടന്നുവരാതിരിക്കാന്‍ കുടുംബയൂണിറ്റ് അംഗങ്ങളെ സ്വാധീനിക്കാന്‍ നീക്കം നടക്കുന്നതായും ഇവര്‍ ആരോപിക്കുന്നു.