ശബരിമലയില്‍ പ്രായഭേദമന്യേ പ്രവേശനം അനുവദിക്കണമെന്ന സൂപ്രീം കോടതി വിധിക്കെതിരെ കേരളത്തില്‍ വിവിധ സംഘടനകളുടെ പ്രതിഷേധം ശക്തമായിരിക്കെ വിധിയെ ന്യായീകരിച്ച്‌ ദീപക് മിശ്ര. ക്ഷേത്രങ്ങളില്‍ പ്രവേശിക്കുന്നതില്‍ സ്ത്രീകളെ തടയാനാവില്ലെന്നും അവര്‍ ബഹുമാനിക്കപ്പെടണമെന്നും അദ്ദേഹം പറഞ്ഞു. ഡല്‍ഹിയില്‍ ഹിന്ദുസ്ഥാന്‍ ടെെംസ് സംഘടിപ്പിച്ച പരിപാടിയില്‍ സംസാരിക്കുകയായിരുന്നു അദ്ദേഹം. ചരിത്ര വിധിക്ക് ശേഷം ഇത് ആദ്യമായാണ് ഒരു പൊതുവേദിയിയില്‍ ഭരണഘടനാ ബെഞ്ചിന്റെ തലവനായിരുന്ന ദീപക് മിശ്ര അഭിപ്രായം വ്യക്തമാക്കുന്നത്.

''പുരുഷന് എത്ര ബഹുമാനം ലഭിക്കുന്നോ അതുപോലെ തന്നെ സ്ത്രീക്കും ലഭിക്കേണ്ടതുണ്ട്. സ്ത്രീക്കും പുരുഷനും തുല്യ അവകാശമാണ് ഉള്ളത്. സ്ത്രീകള്‍ ബഹുമാനിക്കപ്പെടുന്ന ഇടമാണ് യഥാര്‍ത്ഥ വീട്. ഒരു വിഭാഗം സ്ത്രകളെ ക്ഷേത്രത്തില്‍ പ്രവേശിപ്പിക്കുന്നതില്‍ നിന്ന് തടയുന്നത് നീതീകരിക്കാനാവില്ല.
കരുത്തേറിയതും സ്വതന്ത്രവുമായ ഒരു നിയമസംവിധാനമാണ് നമ്മുടെ രാജ്യത്ത് നിലനില്‍ക്കുന്നത്. ഭരണഘടനയുടെ അന്തസത്ത ഉള്‍ക്കൊണ്ട് പ്രവര്‍ത്തിക്കാന്‍ നിയസഭയ്‌ക്കും സര്‍ക്കാരിനും കോടതിക്കും ഉത്തരവാദിത്വമുണ്ട്.ഭരണഘടന തനിക്ക് അപ്രാപ്യമാണെന്നും താനതിനു പുറത്താണെന്നും ഒരു പൗരനും തോന്നലുണ്ടാവരുത്''- അദ്ദേഹം പറഞ്ഞു.