കേരളം പ്രളയ ദുരന്തത്തില്‍ വിറങ്ങലിച്ചു നി്ന്ന സാഹചര്യത്തില്‍ വിദേശ സഹായം സ്വീകരിക്കുന്ന കാര്യത്തില്‍ നിയമ പ്രശ്‌നങ്ങളുണ്ടെന്ന് ചൂണ്ടിക്കാട്ടി കേന്ദ്രം രംഗത്തെത്തിയിരുന്നു. കേരളത്തിനു ലഭിക്കേണ്ട പല സഹായങ്ങളും ഈ കുരുക്കില്‍ പെട്ട് കിട്ടാതായി. എന്നാല്‍ അന്ന് പറഞ്ഞത് തിരുത്തി രംഗത്തുവന്നിരിക്കുകയാ കേന്ദ്രം വിദേശ സഹായങ്ങള്‍ വാങ്ങാമെന്നും തടസ്സങ്ങളൊന്നുമില്ലെന്നും പറയുകയാണ് കേന്ദ്രം. ധന സമാഹരണാര്‍ത്ഥം വിദേശത്തേക്ക് മന്ത്രിമാര്‍ പോകാനിരിക്കെ കേന്ദ്രത്തിന്റെ ഈ നിലപാട് സഹായകമാകുമെന്നാണ് കരുതുന്നത്.

പ്രളയദുരന്തത്തില്‍ വിദേശസഹായം സ്വീകരിക്കുന്നതിന് മാനദണ്ഡമൊന്നും തടസമല്ലെന്ന് കേന്ദ്രസര്‍ക്കാര്‍. വിവരാവകാശ അപേക്ഷക്കുള്ള മറുപടിയിലൂടെയാണ് കേന്ദ്രത്തിന്റെ യഥാര്‍ത്ഥ നിലപാട് പുറത്തുവരുന്നത്. കേന്ദ്ര വിദേശകാര്യ മന്ത്രാലയം ഇക്കാര്യം പുറത്തുവിടുന്നു. പ്രളയം തകര്‍ത്ത കേരളത്തിന്റെ പുനരുദ്ധാരണത്തിന് ആദ്യം സഹായം വാഗ്ദാനംചെയ്ത വിദേശ രാജ്യം യുഎഇ ആണ്. എന്നാല്‍ മാനദണ്ഡം പ്രകാരം അത് വാങ്ങാനാകില്ല എന്നായിരുന്നു അന്ന് കേന്ദ്രത്തിന്റെ നിലപാട്.

പിന്നീട് യുഎഇ യും പിന്നോട്ട്‌പോയി. ഐക്യരാഷ്ട്ര സഭയുടേത് അടക്കം വേറെയും സഹായ വാഗ്ദാനങ്ങള്‍ വിദേശത്ത് നിന്നുവന്നു. എന്നാല്‍ അപ്പോഴൊന്നും കേന്ദ്ര മാനദണ്ഡത്തിന്റെ കാര്യത്തില്‍ വ്യക്തത ഉണ്ടായില്ല. ഇനി പക്ഷെ ആര്‍ക്കും തടസം ഉന്നയിക്കാന്‍ കഴിയില്ല എന്ന് ഈ വിവരാവകാശ മറുപടിയിലൂടെ വ്യക്തമാകുന്നു. അങ്ങോട്ട് ആരോടും സഹായം ചോദിച്ച് പോകാന്‍ പാടില്ല, ആവശ്യം കണ്ടറിഞ്ഞ് ഇങ്ങോട്ട് ആര് വാഗ്ദാനം ചെയ്താലും സ്വീകരിക്കാം. അതാണ് നയം. നേരത്തെ പ്രചരിപ്പിക്കപ്പെട്ടത് പോലെ യുപിഎ സര്‍ക്കാര്‍ രൂപീകരിച്ച ഒരു മാനദണ്ഡവും ഇക്കാര്യത്തില്‍ ബാധകമാകില്ല. എന്‍ഡിഎ സര്‍ക്കാര്‍ 2016ല്‍ രൂപീകരിച്ച National Disaster Management Plan തന്നെയാണ് ഇപ്പോള്‍ പ്രസക്തമെന്നും വ്യക്തമാകുന്നു.