ശബരിമലയുടെ വിശുദ്ധി കാത്ത് സൂക്ഷിക്കാന്‍ യുവതികള്‍ക്ക് പ്രവേശനം നല്‍കരുതെന്ന് ആവശ്യപ്പെട്ട് ദേവസ്വം ബോര്‍ഡ് പ്രസിഡന്റിന്റെ വീട്ടിലേക്ക് യുവമോര്‍ച്ച നടത്തിയ മാര്‍ച്ചിന് നേരെ പൊലീസ് നരനായാട്ട് നടത്തിയതില്‍ പ്രതിഷേധിച്ച് പത്തനംതിട്ടയില്‍ നാളെ ഹര്‍ത്താല്‍. ഞായറാഴ്ചയാണെങ്കിലും ആയിരക്കണക്കിന് ഭക്തജനങ്ങള്‍ നാളത്തെ ഹര്‍ത്താലിന്റെ ഭാഗമാകുമെന്ന് യുവമോര്‍ച്ച ജില്ലാനേതൃത്വം അറിയിച്ചു. അയ്യപ്പക്ഷേത്രങ്ങളും അയ്യപ്പഭക്തരും ഏറെ നിറഞ്ഞ് നില്‍ക്കുന്ന പത്തനംതിട്ടയിലെ ഹൈന്ദവര്‍ ജാതി ഭേദമന്യേ ഞായറാഴ്ചത്തെ പ്രതിഷേധത്തില്‍ പങ്കാളികളാകും

ശബരിമലയെ തകര്‍ക്കാന്‍ ദേവസ്വം ബോര്‍ഡ് വലിയ ഗൂഢാലോചന നടത്തുന്നുണ്ടെന്ന് യുവമോര്‍ച്ച ആരോപിക്കുന്നു. അതില്‍ പ്രതിഷേധിച്ചാണ് അദ്ദേഹത്തിന്റെ വസതിയിലേക്ക് ശനിയാഴ്ച മാര്‍ച്ച് നടത്തിയത്. സമാധാനപരമായി നടന്ന മാര്‍ച്ചിന് നേരെ പൊലീസ് ലാത്തി വീശുകയായിരുന്നു. നേതാക്കളും പ്രവര്‍ത്തകരും ഉള്‍പ്പെടെ നിരവധി പേര്‍ക്ക് പരിക്ക് പറ്റി. ഇവരെല്ലാം കോഴഞ്ചേരി ജില്ലാ ആശുപത്രിയില്‍ ചികില്‍സയിലാണ്. യുവമോര്‍ച്ച സംസ്ഥാന അധ്യക്ഷന്‍ അഡ്വ. കെ.പി പ്രകാശ് ബാബു, മീഡിയ കണ്‍വീനര്‍ ശ്രീരാജ് തുടങ്ങിയവര്‍ക്ക് ഗുരുതരമായി പരുക്കേറ്റു. 

ആറന്‍മുള ജംഗ്ഷനില്‍ നിന്ന് പാര്‍ത്ഥസാരഥി ക്ഷേത്രത്തിലേക്ക് പോകുന്ന വഴിയിലാണ് ദേവസ്വം ബോര്‍ഡ് പ്രസിഡന്റ് എം.പത്മകുമാറിന്റെ വീട്. നോട്ടീസ് നല്‍കിയാണ് മാര്‍ച്ച് നടത്തിയത്. ജില്ലയുടെ വിവിധ ഭാഗങ്ങളില്‍ നിന്ന് നൂറുകണക്കിന് പ്രവര്‍ത്തകര്‍ മാര്‍ച്ചില്‍ പങ്കെടുക്കാന്‍ എത്തിയിരുന്നു. സമാധാനപരമായി പ്രകടനം നടത്തിയവര്‍ക്ക് നേരെയാണ് അക്രമം അഴിച്ച് വിട്ടതെന്ന് ബിജെപി സംസ്ഥാന വക്താവ് എം.എസ്.കുമാര്‍ പറഞ്ഞു.ജനാധിപത്യപരമായ പ്രതിഷേധങ്ങളെയും ജനകീയ സമരങ്ങളെയും പോലീസിനെ കൊണ്ട് നേരിടാമെന്നാണ് പിണറായി സര്‍ക്കാരിന്റെ വ്യാമോഹമെങ്കില്‍ തീ കൊണ്ട് തലചൊറിയരുതെന്നെ തല്‍ക്കാലം മുഖ്യമന്ത്രിയോട് പറയാനുള്ളൂ എന്നും എം.എസ്.കുമാര്‍ അറിയിച്ചു.

പന്തളം രാജാവ് തങ്കഅങ്കിയുമായി അയ്യപ്പനെ കാണാന്‍ പോകുന്നത് ആറന്‍മുള വഴിയാണ്. ഇവിടെ തിരുവാഭരണ യാത്രയ്ക്ക് സ്വീകരണം നല്‍കുന്നുണ്ട്. കൂടാതെ അയിരൂ പുതിയകാവ്, റാന്നിയിലെ അയ്യപ്പക്ഷേത്രം അങ്ങനെ നിരവധി ക്ഷേത്രങ്ങള്‍ അയ്യപ്പനുമായി ബന്ധപ്പെട്ട് ജില്ലയിലുണ്ട്. അതുകൊണ്ട് അയ്യപ്പനും മണ്ഡലകാലവുമൊക്കെ ഇവിടെ ജാതിമത ഭേദമന്യേ ഒരു വികാരമാണ്.