ശബരിമലയില്‍ എല്ലാ സ്ത്രീകളേയും പ്രവേശിപ്പിക്കാമെന്ന സുപ്രീകോടതി വിധി നടപ്പാക്കാനുള്ള സര്‍ക്കാര്‍ നിലപാടിനെതിരേ വന്‍ പ്രതിഷേധാഗ്‌നി ജ്വലിക്കവേ, തുലാമാസ പൂജകള്‍ക്കായി ശബരിമല നട 17 ന് തുറക്കും. സന്നിധാനത്ത് യുവതികള്‍ എത്തുമെന്ന് ഉറപ്പായി. തീര്‍ഥാടകരായി യുവതികള്‍ എത്തിയില്ലെങ്കില്‍ പോലും സര്‍ക്കാര്‍ നിര്‍ദേശപ്രകാരം വനിത പൊലീസുകാര്‍ അന്ന് സന്നിധാനത്തെത്തും. തുലാമാസ പൂജാസമയത്ത് സന്നിധാനത്ത് 100 വനിത പൊലീസുകാരെങ്കിലും ഉണ്ടാകുമെന്നാണ് പൊലീസ് വൃത്തങ്ങള്‍ നല്‍കുന്ന സൂചന. അതോടെ നൂറ്റാണ്ടുകളായി തുടരുന്ന ആചാരത്തിന് വിരുദ്ധമായി സ്ത്രീ പ്രവേശനം നടക്കും.
സുപ്രീംകോടതി വിധിക്കെതിരെ റിവ്യൂ ഹരജി നല്‍കുമെന്ന് വിവിധ സംഘടനകള്‍ പറയുന്നുണ്ടെങ്കിലും അതിന് സമയമെടുക്കും. 17 മുതല്‍ 22വരെ നട തുറക്കുമ്പോള്‍ സ്ത്രീ പ്രവേശനം തടയാന്‍ ഇതുകൊണ്ട് കഴിയാന്‍ ഇടയില്ല. യുവതികള്‍ വന്നാല്‍ അവരുടെ സുരക്ഷക്കായി 600 വനിത പൊലീസുകാരെയാകും നിയോഗിക്കുക.

ആയിരക്കണക്കിന് തീര്‍ഥാടകരെത്തുന്ന ശബരിമലയില്‍ യുവതികള്‍ക്ക് സുരക്ഷയൊരുക്കലാണ് വലിയ വെല്ലുവിളി. ഇതിനിടെ പുരുഷന്മാരായ തീര്‍ഥാടകര്‍ സംഘടിച്ച് യുവതികള്‍ക്കെതിര പ്രതിഷേധം ഉയര്‍ത്തുമോ എന്ന ആശങ്കയുമുണ്ട്. ശബരിമലയെ കലാപഭൂമിയാക്കില്ലെന്ന പ്രതിഷേധക്കാരുടെ പ്രഖ്യാപനമാണ് പൊലീസിനുള്ള ഏകആശ്വാസം. നവംബര്‍ 17മുതല്‍ മണ്ഡലമകരവിളക്ക് തീര്‍ഥാടനകാലം തുടങ്ങും. ഈസമയത്ത് ഇതര സംസ്ഥാനങ്ങളില്‍നിന്നടക്കം യുവതികള്‍ എത്താന്‍ സാധ്യതയേറുന്നു.