കേരളത്തിൽ തുലാവർഷം നാളെ എത്തും . സാധാരണ ഒക്‌ടോബർ പകുതിക്കു ശേഷമാണ് എത്തുന്നതെങ്കിലും കേരള – തമിഴ്‌നാട് തീരത്തെ കനത്ത മഴമേഘങ്ങളുടെ സാന്നിധ്യമാണ് ഇത്തവണ തുലാവർഷം നേരത്തെ എത്തുന്നതിനു കാരണമെന്ന് ചെന്നൈ കാലാവസ്ഥാ കേന്ദ്രം അറിയിച്ചു.

ഇപ്പോൾ അറബിക്കടലിൽ ശക്‌തിപ്പെടുന്ന അതിതീവ്ര ന്യൂനമർദം ചുഴലിക്കാറ്റായാലും ഇല്ലെങ്കിലും കേരള തീരത്ത് ആശങ്കക്ക് ഇടയില്ല. ലുബാൻ ചുഴലി ഒമാനിലേക്കോ ഏദൻ ഉൾക്കടലിലേക്കോ പോകാനാണു സാധ്യത. എന്നിരുന്നാലും ഇന്നും നാളെയും കേരളത്തിൽ ശക്തമായ മഴക്ക് സാധ്യതയുണ്ട്.

ലുബാൻ ചുഴലി കാറ്റഗറി 5 സൂപ്പർ സൈക്ലോണായി മാറിയേക്കാമെന്നു ചില വിദേശ കാലാവസ്‌ഥാ നിരീക്ഷകർ പറയുന്നു. അങ്ങിനെ ആണെങ്കിലും കേരളത്തിൽ പ്രശനങ്ങളുണ്ടാകാൻ ഇടയില്ല.ഓഖിയിൽ സംഭവിച്ചതുപോലെ അപ്രതീക്ഷിത ഗതിമാറ്റം ഉണ്ടാകില്ലെന്നാണ് പ്രതീക്ഷിക്കുന്നത് .

തുലാവർഷം ശക്തി പ്രാപിക്കുന്ന സാഹചര്യത്തിൽ അടുത്ത വെള്ളി വരെ കേരളത്തിൽ ഉച്ചകഴിഞ്ഞുള്ള മഴ ഉണ്ടാകുമെന്നു കരുതുന്നു. വയനാട്, മലപ്പുറം, പാലക്കാട്‌, ഇടുക്കി, പത്തനംതിട്ട ജില്ലകളിൽ ഇന്ന് അതിശക്തമായ മഴ പെയ്യുമെന്നു കാലാവസ്ഥ നിരീക്ഷണകേന്ദ്രം അറിയിച്ചിട്ടുണ്ട്