മോട്ടോര്‍വാഹന വകുപ്പിന്റെ സേവനങ്ങള്‍ക്കുള്ള നിരക്കുകളില്‍ അഞ്ച് ശതമാനം വര്‍ധന. 54 സേവനങ്ങള്‍ക്കാണ് വരര്‍ദ്ധനവുള്ളത്. ഇപ്പോഴുളള ചാര്‍ജിനെ അടിസ്ഥാനപ്പെടുത്തിയാണ് അഞ്ച് ശതമാനത്തിന്റെ വര്‍ധന. 54 സേവനങ്ങളില്‍ ഭൂരിഭാഗത്തിനും നിലവിലേതിനെക്കാള്‍ അഞ്ച് രൂപയാണ് വര്‍ധിപ്പിച്ചത്. ഇത് സംബന്ധിച്ച് സര്‍ക്കാര്‍ ഉത്തരവിറക്കി.ലേണേഴ്‌സ് ലൈസന്‍സ്, ലേണേഴ്‌സ് ലൈസന്‍സ് പുതുക്കല്‍, ഡ്രൈവിങ്‌ ലൈസന്‍സ് പുതുക്കല്‍ എന്നിവക്ക് അഞ്ചുരൂപയുടെ വര്‍ധനയുമുണ്ട്. 

ബൈക്കുകള്‍ രജിസ്റ്റര്‍ ചെയ്യുന്നതിനും അഞ്ച് രൂപയാണ് വര്‍ധിപ്പിച്ചത്. ഇന്റര്‍നാഷനല്‍ െ്രെഡവിങ് പെര്‍മിറ്റ്, മീഡിയം മോട്ടോര്‍ വാഹനങ്ങളുടെ രജിസ്‌ട്രേഷന്‍, ഹെവി വാഹനങ്ങളുടെ രജിസ്‌ട്രേഷന്‍, ഹെവി വാഹനങ്ങളുടെ ഉടമസ്ഥതാമാറ്റം, മീഡിയംഹെവി വാഹനങ്ങളുടെ ഫിറ്റ്‌നസ് സര്‍ട്ടിഫിക്കറ്റ്, ലൈറ്റ് വാഹനങ്ങളുടെ പെര്‍മിറ്റ് സേവനങ്ങള്‍ എന്നിവക്ക് 10 രൂപ കൂടി. ഹെവി മോട്ടോര്‍ വാഹനങ്ങളുടെ പെര്‍മിറ്റ് സേവനങ്ങള്‍ക്ക് 20 രൂപയും പെര്‍മിറ്റുമായി ബന്ധപ്പെട്ട കൗണ്ടര്‍ സിഗ്‌നേച്ചറിന് 25 രൂപയുമാണ് വര്‍ധന.

2017 ജനുവരിയിലാണ് മോട്ടോര്‍വാഹനസേവനങ്ങള്‍ക്ക് കേന്ദ്രസര്‍ക്കാര്‍ നിരക്കുകള്‍ വര്‍ധിപ്പിച്ചത്. 2016 ഡിസംബര്‍ 29 മുതലുള്ള പ്രാബല്യത്തോടെയായിരുന്നു വര്‍ധന. പക്ഷേ, അന്ന് സംസ്ഥാനം നിരക്ക് വര്‍ധിപ്പിച്ചിരുന്നില്ല. സംസ്ഥാനസര്‍ക്കാര്‍ വിവിധ സേവനങ്ങള്‍ക്ക് 50 രൂപ മുതല്‍ 240 രൂപ വരെ ഫീസ് ഈടാക്കുന്നുണ്ട്. നിലവില്‍ അഞ്ച് ശതമാനമാണ് സംസ്ഥാന സര്‍ക്കാര്‍ വര്‍ധിപ്പിച്ചതെങ്കിലും കേന്ദ്രനിരക്കിന്റെ ഭാരം കൂടിയാകുമ്പോള്‍  വാഹന ഉടമകള്‍ക്കുണ്ടാകുന്നത് വലിയ ബാധ്യതയാണ്.