ജാനിമോളും ബാലുവും നമ്മളെവിട്ട് പോയ് മോളേ... ഇതെങ്ങനെ പറയും? പൊന്നുമോളെ കാണമെന്നുള്ള ആഗ്രഹത്തിന് മുമ്പില് ഉത്തരംമുട്ടി ബന്ധുക്കള്; ഭര്ത്താവും കുഞ്ഞുമായുള്ള അടിച്ചുപൊളി യാത്ര; യാത്രയുടെ അവസാനം എല്ലാവരും പലവഴിക്ക്; ബാലഭാസ്കറും കുഞ്ഞും മറ്റൊരു ലോകത്തേയ്ക്ക് യാത്രയായപ്പോള് ലക്ഷ്മിയുടെ യാത്ര കണ്ണീരില് കുതിര്ന്ന ജീവിതത്തിലേക്ക്
ജാനിമോളും ബാലഭാസ്കറും നമ്മളെവിട്ട് പോയ് മോളേ... ജീവിതത്തിലേക്ക് തിരികെ വന്നുകൊണ്ടിരിക്കുന്ന ബാലഭാസ്കറിന്റെ ഭാര്യ ലക്ഷ്മിയോട് ഇതാര് പറയുമെന്ന് ഒരു നിശ്ചയവുമില്ല. ഇടയ്ക്ക് ബോധം വരുമ്പോള് ആദ്യം അന്വേഷിക്കുന്നത് ജാനിമോളെയാണ്. ഐസിയുവിലായതിനാല് അടുത്ത ഒന്നുരണ്ട് പേരെ മാത്രമാണ് കയറ്റുന്നത്. കയറുന്നവരാകട്ടെ ദു:ഖം ഒരു തരത്തിലും മുഖത്ത് പ്രകടമാകാത്ത തരത്തിലാണ് പെരുമാറുന്നത്. പൊന്നുമോളും ഭര്ത്താവും പോയത് ലക്ഷ്മിക്ക് താങ്ങാനാവില്ല. തിരികെ അബോധാവസ്ഥയിലേക്ക് പോയാല് പിന്നെ ജീവിതത്തിലേക്ക് വരാന് വളരെ കടുപ്പമാണ്. അതിനാല് ലക്ഷ്മിയുടെ മുമ്പില് വല്ലാത്തൊരഭിനയത്തിലാണ് ബന്ധുക്കളും സുഹൃത്തുക്കളും.
ലക്ഷ്മിയെ സംബന്ധിച്ച് ലോകത്ത് മറ്റെന്തിനേക്കാളും വിലപ്പെട്ടതാണ് പൊന്നുമോള് ജാനി. 16 വര്ഷത്തെ കാത്തിരിപ്പിന് ശേഷം കിട്ടിയതാണ് ജാനിയെ. ഒന്ന് സ്നേഹിച്ച്, ലാളിച്ച് കൊതിതീരും മുമ്പ് മൂവരേയും വിധി വേര്പെടുത്തി. മാതൃസ്നേഹം ലക്ഷ്മിയെ വല്ലാതെ അലട്ടുകയാണ്. തന്റെ പൊന്നുമോള് കരയുകയാണോ. എന്നെക്കാണാതെ ഒരുനിമിഷം അവള് മാറിനില്ക്കില്ല. ഇതിന് ഉത്തരം പറയാന് ഡോക്ടര്മാരും ബന്ധുക്കളും പാടു പെടുകയാണ്. ഐസിയുവില് മോളെ കയറ്റിയാല് മോള്ക്ക് ഇന്ഫക്ഷന് വരും. അവള് തൊട്ടടുത്ത മുറിയിലുണ്ട്. അല്പം കൂടി നേരെയായാല് പിന്നെ കുഴപ്പമില്ലല്ലോ... വല്ലാത്തൊരു അന്തരീക്ഷമാണത്. സ്വന്തം ചോര പോയല്ലോ മോളെ... എന്ന് എങ്ങനെ പറയും.
അപടത്തില് പരുക്കേറ്റ് സ്വകാര്യആശുപത്രിയില് ചികിത്സയില് കഴിയുന്ന, ബാലഭാസ്കറിന്റെ ഭാര്യ ലക്ഷ്മി അപകടനില തരണം ചെയ്യുകയാണെന്ന് ഡോ. മാര്ത്താണ്ഡന്പിള്ള അറിയിച്ചു. ലക്ഷ്മിയെ വെന്റിലേറ്ററില് നിന്നു മാറ്റി. ലക്ഷ്മിയുടെ ബോധം പൂര്ണ്ണമായും തെളിഞ്ഞതായും ദ്രവരൂപത്തിലുള്ള ഭക്ഷണം കഴിക്കുന്നതായും ഡോക്ടര് അറിയിച്ചു. വെന്റിലേറ്റര് നീക്കം ചെയ്തുവെങ്കിലും ഐസിയുവില് തുടരും. ലക്ഷ്മിയുടെ ആന്തരിക പരിക്കുകളെല്ലാം ഭേദമായി,
ഈ ആഴ്ച അവസാനത്തോടെ വാര്ഡിലേക്ക് മാറ്റുന്ന കാര്യം പരിഗണിക്കും.
പരുക്കുകള് ഭേദപ്പെട്ടു വരുന്നതായും ആശുപത്രി അധികൃതര് അറിയിച്ചു. ആരോഗ്യസ്ഥിതിയില് മികച്ച പുരോഗതിയുണ്ട്. കഴിഞ്ഞ ആഴ്ചയാണ് ബാലഭാസ്കറും കുടുംബവും സഞ്ചരിച്ച കാര് പള്ളിപ്പുറത്ത് മരത്തില് ഇടിച്ചത്. ഗുരുതര പരുക്കേറ്റ മകള് തേജസ്വിനി ആശുപത്രിയില് എത്തിക്കുന്നതിന് മുന്പ് മരിച്ചു. ചികിത്സയില് തുടരവേ ബാലഭാസ്കറും മരിച്ചിരുന്നു. ബാലയും മകളും മരിച്ചത് ഇനിയും ലക്ഷ്മിയെ അറിയിച്ചിട്ടില്ല. ഓര്മ്മ വന്നതു മുതല് ഭര്ത്താവിനേയും മകളേയും തിരിക്കുന്നുണ്ട്. അവരും ചികില്സയിലാണെന്ന സൂചനയാണ് ബന്ധുക്കള് നല്കുന്നത്. ലക്ഷ്മി പൂര്ണ്ണ ആരോഗ്യം വീണ്ടെടുത്താല് മാത്രമേ ഉണ്ടായ ദുരന്തം അവരെ അറിയിക്കൂ. അതുവരെ കാത്തിരിക്കാനാണ് തീരുമാനം.
2000 നവംബര് 18 നാണ് ആരോരുമറിയാതെ ബാലുവും ലക്ഷ്മിയും വിവാഹിതരായത്. പിജി വിദ്യാര്ത്ഥികളായിരുന്ന രണ്ടാളും വീടുവിട്ടിറങ്ങി ഒരുമിച്ചു ജീവിച്ചത് പിന്നെയും ഒരു മാസത്തിനു ശേഷം. ജോലിയോ വരുമാനമോ ഇല്ലാതെ, പഠനം പൂര്ത്തിയാക്കാതെ, അവര്ക്ക് ഒരുമിച്ചു ജീവിക്കാന് ആകെയുള്ള തണല് സ്നേഹവും സുഹൃത്തുക്കളുമായിരുന്നു വീട്ടുകാരുടെ പിന്തുണയില്ലാതെ നടന്ന രജിസ്റ്റര് വിവാഹത്തിനും അനുനയ ചര്ച്ചകള്ക്കും ബാലുവിന്റെ ട്യൂഷന് ടീച്ചറായിരുന്ന വിജയമോഹനായിരുന്നു തുണ. ബാലഭാസ്കറിന്റെയും ലക്ഷ്മിയുടെയും ജീവിതത്തിലേക്ക് തേജസ്വിനി വന്നത് ഒന്നരവര്ഷം മുന്പാണ്. ജാനിക്കുട്ടി എത്തിയതോടെ ജീവിതം വീണ്ടും സന്തോഷത്തിന്റെ പുതിയ തലത്തിലെത്തി. ഇതിനിടെയാണ് അപ്രതീക്ഷിതമായി അപകടത്തിന്റെ ദൂരത്തില് ദുരന്തമെത്തുന്നത്.
https://www.facebook.com/Malayalivartha
