ശബരിമല യുവതീ പ്രവേശം അനുവദിച്ച സുപ്രീംകോടതി ഉത്തരവിനെതിരെ എന്തുകൊണ്ട് റിവ്യൂഹര്‍ജി നല്‍കിയില്ല എന്ന ചോദ്യം ഉയരുന്ന പശ്ചാത്തലത്തില്‍ മുഖ്യമന്ത്രി പിണറായി വിജയന്‍ നയം വ്യക്തമാക്കുന്നു. സര്‍ക്കാര്‍ സ്ത്രീപ്രവേശനത്തിന് എതിരല്ല, സാമൂഹ്യനീതിയാണ് സര്‍ക്കാരിന്റെ ലക്ഷ്യം, ഒരു വിഭാഗത്തിനും സര്‍ക്കാര്‍ എതിര്‍ നില്‍ക്കില്ലെന്നും മുഖ്യമന്ത്രി വ്യക്തമാക്കി. സ്ത്രീപ്രവേശനം സംബന്ധിച്ച് ചരിത്രപരമായ കാര്യങ്ങളുണ്ട്. തിരുവിതാംകൂര്‍ മഹാരാജാവും മഹാറാണിയും ദിവാനും ശബരിമലയില്‍ ദര്‍ശനം നടത്തിയിട്ടുണ്ട്. ഹിന്ദുമത ആചാരത്തിലും ദൈവത്തിലും വിശ്വസിക്കുന്ന ഏതൊരാള്‍ക്കും ആരാധന നടത്തുവാന്‍ പ്രായവ്യത്യാസമില്ലാതെ പ്രവേശിക്കാം. ശബരിമലയിലെ സ്ത്രീപ്രവേശനം നിയന്ത്രിച്ചത് വര്‍ഷങ്ങളായുള്ള ആചാരവും വിശ്വാസവും മൂല്യവുമായി ബന്ധപ്പെട്ടതാണ്. ജനം അത് സ്വീകരിച്ചതുമാണ്. അത് ഹൈക്കോടതി വിധിയിലൂടെയാണ് ഉണ്ടായതെന്നും മുഖ്യമന്ത്രി ഓര്‍മിപ്പിച്ചു. 

വിധി വരും മുമ്പ് സര്‍ക്കാര്‍ സുപ്രീംകോടതിയില്‍ സമര്‍പ്പിച്ച അപേക്ഷയില്‍ പറയുന്നത് യുവതിപ്രവേശനം നടത്തും മുമ്പ് പ്രമുഖ ഹിന്ദുമത പണ്ഡിതരും സാമൂൂഹ്യപരിഷ്‌ക്കര്‍ത്താക്കളും അടങ്ങുന്ന കമ്മീഷനെ നിയമിച്ച് , എല്ലാ വിഭാഗം സ്ത്രീകള്‍ക്കും ശബരിമലയില്‍ ആരാധന അനുവദിക്കാമോ എന്ന് ചോദിക്കണമെന്നാണ് നിര്‍ദ്ദേശിച്ചതെന്നും മുഖ്യമന്ത്രി വ്യക്തമാക്കി. സ്ത്രീപ്രവേശനം നിയമവിരുദ്ധപ്രവര്‍ത്തനങ്ങളും ക്രമസമാധാന പ്രശ്‌നങ്ങളും ഉണ്ടാക്കുമെന്ന് ഭയമുണ്ടെന്ന ആരോപണവും ഉയരുന്നുണ്ട്. അങ്ങനെയെങ്കില്‍ സ്ത്രീകള്‍ക്ക് പ്രത്യേക ദര്‍ശന സമയം ഒരുക്കണം. ആചാരമാറ്റങ്ങള്‍ ശബരിമലയില്‍ ഇതിന് മുമ്പും ഉണ്ടായിട്ടുണ്ട്. എല്ലാ മലയാള മാസത്തിലെയും ആദ്യത്തെ അഞ്ച് ദിവസം പൂജ ആരംഭിച്ചത് ജനത്തിരക്ക് നിയന്ത്രിക്കാനാണ്. തുലാഭാരം ഇപ്പോള്‍ തുടങ്ങിയതാണെന്നും മുഖ്യമന്ത്രി ചൂണ്ടിക്കാട്ടി.

സര്‍ഡക്കാരിന് ഇക്കാര്യത്തില്‍ വിവാദമുണ്ടാക്കാന്‍ താല്‍പര്യമില്ലെന്നും മുഖ്യമന്ത്രി പറഞ്ഞു. സര്‍ക്കാരിന്റെ കാഴ്ചപ്പാട് അവതരിപ്പിക്കണമെന്ന് കോടതി പറഞ്ഞത് കൊണ്ടാണ് സത്യവാങ്മൂലം നല്‍കിയത്. പത്ത് വയസ് മുതല്‍ 50 വയസ് വരെയുള്ള സ്ത്രീകള്‍ ശബരിമലയില്‍ ദര്‍ശനം നടത്താന്‍ വന്നാല്‍ അവര്‍ക്ക് വേണ്ട സൗകര്യം ഒരുക്കും. കോടതി വിധിയനുസരിച്ച് സര്‍ക്കാര്‍ പ്രവര്‍ത്തിക്കും. ഭരണഘടനാപരമായി പ്രവര്‍ത്താക്കാന്‍ ബാധ്യസ്ഥതയുള്ള സര്‍ക്കാരിന് അതിന് വിരുദ്ധമായി പ്രവര്‍ത്തിക്കാനാവില്ലെന്നും മുഖ്യമന്ത്രി വ്യക്തമാക്കി.