സ്ത്രീ പ്രവേശന വിധിക്ക് ശേഷം ആദ്യമായാണ് ശബരിമല നട തുറക്കുന്നത്. പ്രതിഷേധ സാധ്യത കണക്കിലെടുത്ത് പൊലീസ് സുരക്ഷ ശക്തമാക്കിയിട്ടുണ്ട്. അതെ സമയം ശബരിമലയില്‍ എല്ലാ പ്രായത്തിലുമുള്ള സ്ത്രീകള്‍ക്കും പ്രവേശിക്കാം എന്ന സുപ്രീം കോടതി വിധിയുടെ പശ്ചാത്തലത്തില്‍ ശബരിമല കയറാനെത്തിയ ലിബി സിഎസ് എന്ന യുവതിയെ തടഞ്ഞിരുന്നു.

പത്തനംതിട്ട കെഎസ്‌ആര്‍ടിസി സ്റ്റാന്‍ഡിലാണ് അവരെ ഭക്തര്‍ തടഞ്ഞത്. ഇതിന് പിന്നാലെ ലിബിയുടെ ഫേസ്ബുക്ക് പോസ്റ്റില്‍ പൂരത്തെറിവിളിയാണ് നടക്കുന്നത്. 'നമ്മൾ വിജയിക്കുക തന്നെ ചെയ്യും... പോലീസ് ഒപ്പമുണ്ട്.. ഉച്ചയ്ക്ക് ശബരിമല കയറുമെന്ന' ലിബിയുടെ പോസ്റ്റിന് താഴെയാണ് പൂരത്തെറിയുടെ പൊങ്കാലയെത്തുന്നത്. നേരത്തെ തന്നെ ശബരിമലയില്‍ കയറുമെന്ന് ഫേസ്ബുക്കിലൂടെ ലിബി വ്യക്തമാക്കിയിരുന്നു.

തുടര്‍ന്ന് ശബരിമലയില്‍ പോകാനായി പത്തനംതിട്ടയിലെത്തിയ ലിബിയെ ആള്‍ക്കൂട്ടം തടയുകയും കയ്യേറ്റശ്രമം നടത്തുകയും ചെയ്തു. പിന്നീട് പോലീസ് സുരക്ഷയിലാണ് ലിബിയെ ഇവിടെ നിന്നും മാറ്റിയത്. അതസമയം ഇത്തരത്തില്‍ സ്ത്രീകള്‍ക്കെതിരെ തെറി വിളി നടത്തുന്നവരുടെ അയ്യപ്പ ഭക്തി ചോദ്യം ചെയ്ത് മറ്റ് ചിലരും രംഗത്തെത്തിയിട്ടുണ്ട്. ലിബിയ്‌ക്കെതിരെ വധ ഭീഷണി മുഴക്കിയും ചിലര്‍ രംഗത്തെത്തിയിട്ടുണ്ട്.