പങ്കാളിത്ത പെന്ഷന്റെ കാറ്റു തീര്ന്നു
സര്ക്കാര് ജീവനക്കാരുടെ പെന്ഷന് താളം തെറ്റുന്നു. ജീവനക്കാര്ക്ക് ശമ്പളം നല്കാന് പെടാപാട് പെടുന്ന സര്ക്കാര് പെന്ഷന് അനിയന്ത്രിതമായി വര്ദ്ധിക്കുന്ന പശ്ചാത്തലത്തിലാണ് പങ്കാളിത്ത പെന്ഷന് പദ്ധതിയെക്കുറിച്ച് ആലോചിച്ചതും നടപ്പിലാക്കിയതും. എന്നാല് പങ്കാളിത്ത പെന്ഷന് പദ്ധതി തുടക്കത്തിലേ താളം തെറ്റി. സര്ക്കാര് തീരുമാനം അതേപടി നടപ്പിലാക്കാനുള്ള ഉദ്യോഗസ്ഥരുടെ ശ്രദ്ധക്കുറവാണ് പെന്ഷന് പദ്ധതി അട്ടിമറിക്കപ്പെടാന് കാരണം. പങ്കാളിത്ത പെന്ഷനോട് എതിര്പ്പുള്ള ഇടതുയൂണിയന്കാരാണ് പദ്ധതി അട്ടിമറിച്ചതെന്ന് കരുതുന്നു.
പങ്കാളിത്ത പെന്ഷന് നടപ്പിലാക്കി ഒമ്പത് മാസമായിട്ടും ജീവനക്കാരുടെ വിഹിതമോ സര്ക്കാര് വിഹിതമോ അടച്ചു തുടങ്ങിയിട്ടില്ല. 20,000 ത്തോളം ജീവനക്കാര് പദ്ധതിയില് അംഗങ്ങളാണ്. ഇവരുടെ പെന്ഷനാണ് നടുകടലിലായത്. അടിസ്ഥാന ശമ്പളം, ഡി.എ എന്നിവ ചേരുന്ന തുകയുടെ പത്തു ശതമാനം ജീവനക്കാരന്റെ ശമ്പളത്തില് നിന്നും മാസാമാസം പിടിച്ച് പെന്ഷന് ഫണ്ടിലേയ്ക്ക് അടയ്ക്കണമെന്നാണ് നിയമം. എന്നാല് ഒരു രൂപ പോലും ഇതുവരെ അടച്ചിട്ടില്ല. തുക പിടിച്ചിട്ടുണ്ടോ എന്നും വ്യക്തമല്ല. കുടിശ്ശിക സര്ക്കാരിന് ബാധ്യതയായി മാറും.
2004 ല് പങ്കാളിത്ത പെന്ഷന് നടപ്പിലാക്കിയ ചില സംസ്ഥാനങ്ങളില് പദ്ധതി താളം തെറ്റി. എന്നാല് കേന്ദ്ര സര്ക്കാര് പങ്കാളിത്ത പെന്ഷന് നല്ല രീതിയില് നടപ്പിലാക്കുന്നുണ്ട്. കര്ണ്ണാടകത്തില് പങ്കാളിത്ത പെന്ഷന് നടപ്പിലാക്കിയെങ്കിലും സര്ക്കാര് വിഹിതം കുടിശ്ശികയായതിനെതുടര്ന്ന് പിടിച്ച തുക ജീവനക്കാര്ക്ക് തിരികെ നല്കി.
കേരളത്തില് പദ്ധതിക്കെതിരെ സര്ക്കാര് ജീവനക്കാര് തുടക്കം മുതല് രംഗത്തുണ്ട്. സര്ക്കാര് വിഹിതവും ജീവനക്കാരുടെ വിഹിതവും അടയ്ക്കാത്ത പശ്ചാത്തലത്തില് പങ്കാളിത്ത പെന്ഷന് പദ്ധതി അട്ടിമറിക്കപ്പെടാനാണ് സാധ്യത.
https://www.facebook.com/Malayalivartha
