ദര്‍ശനം നടത്താനെത്തുന്ന യുവതികളെ തടഞ്ഞ പ്രതിഷേധക്കാരെ പമ്പയില്‍ നിന്ന് പൊലീസ് അറസ്റ്റ് ചെയ്ത് നീക്കം ചെയ്ത് തുടങ്ങി. താഴമണ്‍ കുടുംബത്തിലെ അംഗങ്ങളെയും പന്തളം രാജകുടുംബാംഗങ്ങളെയും അറസ്റ്റ് ചെയ്ത് നീക്കി. മുന്‍ ദേവസ്വം ബോര്‍ഡ് പ്രസിഡന്റ് പ്രയാര്‍ ഗോപാലകൃഷ്ണന്‍ അടക്കമുള്ളവരെ അറസ്റ്റ് ചെയ്ത് പമ്പ സ്റ്റേഷനിലേക്ക് മാറ്റി. ദര്‍ശനത്തിനെത്തുന്ന സ്ത്രീകളുടെ സര്‍ട്ടിഫിക്കറ്റ് പരിശോധിച്ച ശേഷമേ കടത്തി വിടാനാകൂ എന്ന് തടയാനെത്തിയവര്‍ വാശിപിടിച്ചതോടെയാണ് പൊലീസ് കര്‍ശന നടപടി സ്വീകരിച്ചത്. സേവ് ശബരിമല എന്ന പേരിലും നാമജപം എന്ന പേരിലുമാണ് പ്രാര്‍ത്ഥനാ യഞ്ജം നടത്തുന്നത്. പന്തളം കൊട്ടാരത്തിലെ അംഗങ്ങളും ഇവിടെ കുത്തിയിരുന്ന് പ്രതിഷേധിക്കുന്നുണ്ട്. ഇവരെ മറികടന്ന് വേണം ദര്‍ശനം നടത്തുന്നവര്‍ക്ക് പോകാനാകൂ. 

അതേസമയം നിലയ്ക്കലില്‍ യുദ്ധസമാനമായ അന്തരീക്ഷമാണ് നിലവിലുള്ളത്. പ്രതിഷേധക്കാര്‍ നിരവധി വാഹനങ്ങള്‍ അടിച്ചു തകര്‍ക്കുകയും തടയുകയും ചെയ്യുന്നു. പൊലീസിന്റെ കയ്യില്‍ നിന്ന് കാര്യങ്ങള്‍ കൈവിട്ട് പോകുന്ന സ്ഥിതിയാണുള്ളത്. രാഹുല്‍ ഈശ്വറിന്റെ നേതൃത്വത്തില്‍ ഗാന്ധിയന്‍ സമരമാണെന്ന് നടത്തുന്നതെന്ന് അറിയിച്ചെങ്കിലും യുവതികള്‍ എത്തിയതോടെ ഇവരുടെ സ്വഭാവം മാറി. നിലയ്ക്കലിലേക്കും പമ്പയിലേക്കും കൂടുതല്‍ ഭക്തര്‍ കടന്ന് വരുന്നുണ്ട്. ദേശീയ മാധ്യമങ്ങളുടേതടക്കം വാഹനങ്ങള്‍ ഇവര്‍ തല്ലിത്തകര്‍ത്തു. ഒരു മാധ്യമപ്രവര്‍ത്തകയ്ക്ക് നേരെ കയ്യേറ്റം നടത്തി. വിധി നടപ്പാക്കാന്‍ തയ്യാറാകുന്ന സര്‍ക്കാരിനൊപ്പം മാധ്യമങ്ങള്‍ നില്‍ക്കുന്നെന്ന് ആരോപിച്ചാണ് ആക്രമണം. 

ബി.ജെ.പി നേതാക്കളായ എം.ടി രമേശ്, കെ. സുരേന്ദ്രന്‍ എന്നിവരുടെ നേതൃത്വത്തില്‍ പമ്പയില്‍ പ്രതിഷേധം തുടരുന്നു. ആയിരക്കണക്കിന് ഭക്തജനങ്ങളാണ് പ്രതിഷേധവുമായി രംഗത്തെത്തുന്നത്. ശബരിമലയിലേക്ക് പോകാനെത്തിയ ചേര്‍്ത്തല സ്വദേശിയെ പത്തനംതിട്ടയില്‍ തടഞ്ഞിരുന്നു. ഇവര്‍ പൊലീസ് സംരക്ഷണയിലാണ്. എന്ത് വന്നാലും ദര്‍ശനം നടത്തി മടങ്ങുമെന്ന നിലപാടിലാണ് ഇവര്‍. അതേസമയം ഇവര്‍ വിശ്വാസിയല്ല, നിരീശ്വരവാദിയാണെന്ന് അവരുടെ ഫെയിസ്ബുക്ക് പോസ്റ്റ് തന്നെ വ്യക്തമാക്കുന്നു. അതാണ് ഭക്തരെ പ്രകോപിപ്പിച്ചതെന്ന് അറിയുന്നു.