ആയിരക്കണക്കിന് അമ്മമാരുടെ ഉള്ളിലാളുന്ന ഭക്തിയില് പ്രതിഷേധം ജ്വലിക്കുന്നു; നിങ്ങള് തകര്ത്തെറിയുന്ന വിശ്വാസങ്ങള് നിങ്ങളെ തകര്ക്കും ; ഇവിടെ തോല്ക്കുന്നത് കേരളമാണ്. അയ്യപ്പനാണ്
നിലയ്ക്കലില് ഉയര്ന്ന അഗ്നിയാളുന്നു. അതു തല്ലിക്കെടുത്താന് ഇനിയത്ര എളുപ്പമല്ല. ആയിരക്കണക്കിന് അമ്മമാരുടെ ഉള്ളിലാളുന്ന ഭക്തിയില് പ്രതിഷേധം ജ്വലിക്കുന്നു. മാധ്യമങ്ങള്ക്ക് ഇത് ദൃശ്യ വിരുന്നാകാം. സര്ക്കാരിന് പോരാട്ടവീര്യത്തിലൂടെ എതിരാളിയെ തളയ്ക്കാനുള്ള യുദ്ധവേദിയാകാം പോലീസിന് കടമയൊരുക്കുന്നതിലെ ശുഷ്കാന്തിയാകാം.
ഇവിടെ തോല്ക്കുന്നത് കേരളമാണ്. നമ്മള് നെഞ്ചേറ്റിയ അയ്യപ്പനുവേണ്ടി പരസ്പരം തലതല്ലി പൊളിക്കുന്ന കാഴ്ച. പ്രതിഷേധക്കാര്ക്ക് ജീവനോളം വിലയുള്ള വിശ്വാസമാണ്, പോലീസിന് തോക്കിന്റെ കാഞ്ചിയമര്ത്താനുള്ള ഒരു നിര്ദേശത്തിന്റെ സമയം മാത്രം മതി പ്രതിഷേധമൊരുക്കാന്. അവിടെ തോല്ക്കുന്നത് വിശ്വാസി സമൂഹമല്ല. കേരളത്തിന്റെ വികാരമായ അയ്യപ്പചിന്തകളാണ്. വിശ്വാസികളെ വെല്ലുവിളിക്കുന്നതിലല്ല സമന്വയത്തിലൂടെ ഒരു ജനതയെ ഒരുമിപ്പിക്കുന്നതിലാകണം സര്ക്കാരിന്റെ ശക്തി.
നമുക്ക് തിരുത്താന് ഇന്നലെകളിലെ വിപ്ലവകഥകള് മാത്രം പോരെ. ചരിത്രം തിരുത്തിയ വിപ്ലവകഥകളും, പിടിച്ചെടുക്കലുകള്ക്കും പിന്നില് പലപ്പോഴും മനുഷത്വമില്ലായ്മയും ഭീകരതയുമുണ്ടായിരുന്നു. മനുഷ്യാവകാശത്തെക്കുറിച്ച് വാതോരാതെ സംസാരിക്കുന്നവര് നവോത്ഥാനം നേടിയ ഇന്നലെയുടെ കഥകള് പൂര്ണ്ണമായും പഠിക്കണം. ഇന്ന് തിരുത്താന്, വിശ്വാസികളുടെ ആചാരങ്ങള് പൊളിച്ചെഴുതാന് കേവലമെതിര്പ്പുകളെ അടിച്ചൊതുക്കിയാല് മാത്രം പോരാ.
ശബരിമല ഒരു വികാരമായി ആളിക്കത്തിയാല് ഒരു പോലീസിനും നിയന്ത്രിക്കാനാകില്ല. സര്ക്കാര് പോലും നോക്കുകുത്തിയായി മാറിയേക്കാം. നിലയ്ക്കലും, പമ്പയും, ശബരിമല പാതയും കടന്ന് പ്രതിഷേധങ്ങള് കേരളമെങ്ങും ആഞ്ഞടിക്കുകയാണ്. പ്രതിഷേധക്കാര്ക്കു പിന്നിലുള്ള ശക്തികള് ആരുമാകട്ടെ അവരില് മഹാഭൂരിപക്ഷവും അവിടെയെത്തിയത് അയ്യപ്പഭക്തിയിലാണ്. അമ്മമാരാണ്, നോമ്പു നോറ്റ് മലയ്ക്കിറങ്ങുന്ന സ്വാമിയായ മകനെയും, ഭര്ത്താവിനെയും കാലില് തൊട്ടുവന്ദിച്ചയയ്ക്കുന്നവരാണ്. സന്നിധാനത്തുനിന്ന് കൊണ്ടുവരുന്ന പ്രസാദം അനുഗൃഹത്തിന്റെ അടയാളമായിക്കരുതുന്നവരാണ്. ഇന്നലകളുടെ അവരുടെ വിശ്വാസം തല്ലിക്കെടുത്തരുത്.
നിങ്ങള് തകര്ത്തെറിയുന്ന വിശ്വാസങ്ങള് നിങ്ങളെ തകര്ത്തെറിയും. അതു ജനാധിപത്യത്തിന്റെ നിയമമാണ്. ക്ഷമയും, സൂക്ഷ്മതയും അതാണ് കാലം നമ്മോടാവശ്യപ്പെടുന്നത്. ഭരണകര്ത്താക്കളും ഭൂരിപക്ഷത്തിന്റെ മനശാസ്ത്രം മനസ്സിലാക്കണം. ഹിറ്റ്ലറിന്റെ കാലഘട്ടമല്ല ഇത്. ഇനിയെങ്കിലും അരുതെന്ന് പറയൂ... ഒരു നിമിഷത്തെ ആവേശത്തിലെറിയരുത് ആയിരക്കണക്കിന് വിശ്വാസികളുടെ ഭക്തിയെ. അവരുടെ വികാരത്തെ.
https://www.facebook.com/Malayalivartha
