വിവാദ പ്രസ്താവന നിരസിച്ച് തന്ത്രി കണ്ഠര് രാജീവര് സന്നിധാനത്ത് യുവതീപ്രവേശമുണ്ടായാല്‍ ക്ഷേത്രം അടച്ചിടുമെന്ന വാര്‍ത്തകള്‍ ശെരിയല്ലെന്നാണ് തന്ത്രി കണ്ഠര് രാജീവര് പറയുന്നത്. ശബരിമലയില്‍ യുവതീപ്രവേശമുണ്ടായാല്‍ തന്ത്രി ക്ഷേത്രം അടച്ച് താക്കോല്‍ പന്തളം കൊട്ടാരത്തില്‍ എല്‍പ്പിക്കുമെന്ന വാര്‍ത്തകളോട് പ്രതികരിക്കുകയായിരുന്നു അദ്ദേഹം.

''അമ്പലം അടച്ചിടുമെന്നാണ് പറയുന്നത്. എന്നാല്‍ അമ്പലം അടച്ചിടാന്‍ പറ്റത്തില്ല. അമ്പലം അടച്ചിടുന്നത് ആചാരങ്ങള്‍ക്കു ലംഘനമാണ്. മാസത്തില്‍ അഞ്ചു ദിവസം പൂജ നടത്തുന്നതും നിവേദ്യം നല്‍കുന്നതും ഇവിടുത്തെ ആചാരങ്ങളുടെ ഭാഗമാണ്. അതിനാല്‍ തന്നെ എനിക്ക് അത് മുടക്കാനോ അടച്ചിടാനോ സാധിക്കില്ല.'' - തന്ത്രി കണ്ഠര് രാജീവര് വ്യക്തമാക്കുന്നു.

എന്നാല്‍ ശബരിമലയില്‍ ദര്‍ശനത്തിനായി എത്തുന്ന സ്ത്രീകളെ തടയുന്നത് ഇപ്പോഴും തുടരുകയാണ്. 40 വയസ്സു കഴിഞ്ഞ ആന്ധ്ര ഗോദാവരി സ്വദേശിയുള്‍പ്പെട്ട സ്ത്രീകളുടെ സംഘത്തിന് പ്രതിഷേധക്കാര്‍ക്കിടയിലൂടെ പൊലീസ് ആദ്യം സംരക്ഷണമൊരുക്കിയെങ്കിലും. പമ്പ കടന്ന് സ്വാമി അയ്യപ്പന്‍ റോഡിലേക്കു പ്രവേശിച്ചെങ്കിലും പൊലീസ് പിന്മാറിയയുടന്‍ തന്നെ ഭീഷണിപ്പെടുത്തി യുവതിയെ പ്രതിഷേധക്കാര്‍ പിന്തിരിപ്പിച്ചു. 41 വയസ്സുള്ള മാധവിയാണ് മലകയറാനെത്തിയത്.

എന്നാല്‍ ദേവസ്വം ബോര്‍ഡും, സര്‍ക്കാരും അനുവദിച്ച് സ്ത്രീകള്‍ ദര്‍ശനം നടത്തിയാല്‍ അവരെ അവഗണിക്കില്ലെന്നാണ് മാളികപ്പുറം മേല്‍ശാന്തി നേരത്തേ വ്യക്തമാക്കിയിരുന്നു. പൂജകള്‍ കൃത്യമായി നടത്തി അവര്‍ക്ക് പ്രസാദം നല്‍കുമെന്നും മാളികപ്പുറം മേല്‍ശാന്തിയായ അനീഷ് നമ്പൂതിരി പറഞ്ഞത്.