പ്രളയ ധനശേഖരണത്തിനായി നാലു ദിവസത്തെ സന്ദർശനത്തിനായി യൂ.എ ഇ യിലെത്തിയ മുഖ്യമന്ത്രി പിണറായി വിജയന് അബുദാബിയിൽ വൻ സ്വീകരണം.അബുദാബി രാജ്യാന്തര വിമാനത്താവളത്തിൽ രാവിലെ ഏഴിന്എത്തിഹാദ് വിമാനത്തിലെത്തിയ മുഖ്യമന്ത്രിയെ വിഐപി ലോഞ്ചിൽ നോർക്ക വൈസ് ചെയർമാൻ എം.എ. യൂസഫലി, ഡയറക്ടർ ഡോ. ആസാദ് മൂപ്പൻ, ഇന്ത്യൻ എംബസി കോൺസൽ രാജമുരുകൻ, അബുദാബിയിലെ പ്രോട്ടോകോൾ ഓഫിസർ തുടങ്ങിയവർ സ്വീകരിച്ചു. നോർക്ക പ്രിൻസിപ്പൽ സെക്രട്ടറി ഇളങ്കോവനും കുടുംബാംഗങ്ങളും മുഖ്യമന്ത്രിക്കൊപ്പമുണ്ടായിരുന്നു.

തുടർന്ന് ദുസിത് താനിയിലെത്തിയെ മുഖ്യമന്ത്രിയെ മാധ്യമ ഉപദേഷ്ടാവ് ജോൺ ബ്രിട്ടാസ്, ലോക കേരളാ സഭാംഗം കെ.ബി. മുരളി, നോർക്ക ഡയറക്ടർ ഒ.വി മുസ്തഫ, ഇന്ത്യാ സോഷ്യൽ ആന്‍ഡ് കൾചറൽ സെന്‍റർ പ്രസിഡന്‍റ് രമേഷ് വി.പണിക്കർ, കേരള സോഷ്യൽ സെന്‍റർ പ്രസിഡന്‍റ് എ.കെ ബീരാൻകുട്ടി എന്നിവർ ചേർന്ന് സ്വീകരിച്ചു. കൂടാതെ നിരവധിയാളുകൾ മുഖ്യമന്ത്രിയെ നേരിൽ കാണാനായി ഹോട്ടൽ പരിസരത്ത് എത്തിയിരുന്നു.

കഴിഞ്ഞ ദിവസം,സംസ്ഥാന പുനർനിർമാണത്തിനുള്ള ധനസമാഹരണത്തിനായി മന്ത്രിമാർ വിദേശത്തേക്കു പോകുന്നതിനു കേന്ദ്ര സർക്കാർ അനുമതി നിഷേധിച്ചിരുന്നു. മുഖ്യമന്ത്രി ഒഴികെയുള്ള എല്ലാവരുടെയും യാത്രാനുമതി നിഷേധിച്ച കാര്യം ചൊവ്വാഴ്ച വൈകിട്ടു ചീഫ് സെക്രട്ടറി ടോം ജോസിനെ കേന്ദ്ര വിദേശകാര്യ മന്ത്രാലയത്തിൽ നിന്നു ഫോണിൽ അറിയിക്കുകയായിരുന്നു.