ശബരിമല സ്ത്രീ പ്രവേശനത്തിനെതിരേ നടത്തുന്ന പ്രതിഷേധ സമരത്തില്‍ വ്യാപക അക്രമം. ശബരിമലയിലേയ്ക്ക് കൂടുതല്‍ കമാന്റോകളെ വിന്യസിക്കുമെന്ന് ഡിജിപി. നിലവിലെ 700 പൊലീസുകാരെ കൂടാതെ 300 പൊലീസിനെ കൂടി വിന്യസിക്കുമെന്ന് അദ്ദേഹം വ്യക്തമാക്കി.

കമാന്‍ഡോകള്‍ ഇന്ന് വൈകുന്നേരത്തിനകം നിലയ്ക്കലിലും പന്പയിലും എത്തും. രണ്ട് എസ്പിമാരുടെയും നാല് ഡിവൈഎസ്പിമാരുടെയും നേതൃത്വത്തിലാണ് പോലീസിനെ വിന്യസിക്കുന്നതെന്നും ഡിജിപി അറിയിച്ചു.
പോലീസിന്‍റെ നിയന്ത്രണം കൈവിട്ടു പോകുന്ന നിലയിലാണ് പ്രതിഷേധങ്ങള്‍ അരങ്ങേറുന്നത്. നിലയ്ക്കലിലും പന്പയിലുമാണ് വ്യാപക അക്രമങ്ങള്‍ അരങ്ങേറിയത്. വനിതാ മാധ്യമ പ്രവര്‍ത്തകരെ ഉള്‍പ്പെടെ സമരാനുകൂലികള്‍ കൈയേറ്റം ചെയ്തു.

ബുധനാഴ്ച രാവിലെ നിലയ്ക്കലും പന്പയും പോലീസ് നിയന്ത്രണത്തിലായിരുന്നു. എന്നാല്‍ ഉച്ചയോടെ മൂവായിരത്തോളം വരുന്ന സമരക്കാര്‍ സമരപന്തലിലേക്ക് ഇരച്ചു കയറുകയും വഴി തടയുകയുമായിരുന്നു. പിന്നീട് പോലീസ് വാഹനങ്ങള്‍ക്കുനേരെയും മാധ്യമ വാഹനങ്ങള്‍ക്കുനേരെയും വ്യാപക കല്ലേറും അക്രമവുമാണ് അരങ്ങേറിയത്. പൊലീസിന് നേരെ പ്രതിഷേധക്കാര്‍ കല്ലെറിഞ്ഞു. കെഎസ്‌ആര്‍ടിസി ബസിനു നേരെയും കല്ലേറുണ്ടായിട്ടുണ്ട്. പൊലീസിനെ പ്രതിഷേധക്കാര്‍ വളയുകയും ചെയ്തു. തുടര്‍ന്ന് പ്രതിഷേധക്കാര്‍ക്ക് നേരെ പൊലീസ് ലാത്തിവീശി. കെഎസ്‌ആര്‍ടിസി അടക്കമുള്ള വാഹനങ്ങള്‍ സമരക്കാര്‍ പരിശോധിക്കുന്നുണ്ട്.