രാത്രിയോടെ കൂടുതല്‍ പോലീസെത്തും, ഭക്തരും അണമുറിയാത്ത ഭക്തജനപ്രവാഹം. നിലയ്ക്കാതെ ഉയരുന്ന നാമജപ മന്ത്രങ്ങള്‍. ഇന്നുച്ചവരെ ഭക്തര്‍ പോലീസ് വിരട്ടില്‍ ചിതറിയോടുമ്പോഴും നിലയ്ക്കല്‍ ഭക്തിസാന്ദ്രമായിരുന്നു. ഇപ്പോള്‍ സ്ഥിതി കൈവിട്ടു. പ്രാര്‍ത്ഥനായജ്ഞങ്ങളും, നാമജപ ഘോഷയാത്രകളും കണ്ട് കേരളം നടുങ്ങുന്നു. പ്രതിഷേധം പ്രക്ഷോഭമായി മാറി. കൈയ്യില്‍ കല്ലും കമ്പുമായി പ്രതിഷേധത്തിന്റെ തീപ്പൊരിയുമായി സമരക്കാര്‍. പ്രതിഷേധത്തിന്റെ നിറം മാറിയപ്പോള്‍ പോലീസ് ലാത്തിവീശി. എന്നാല്‍ ആക്രോശിച്ചടുക്കുന്ന അക്രമസ്വഭാവം പൂണ്ട പ്രതിഷേധക്കാരെക്കണ്ട് പോലീസ് പിന്‍വാങ്ങി.

പോലീസിനോട് മുകളില്‍ നിന്ന് ഇപ്പോഴും സംയമനം തുടരാനാണ് നിര്‍ദ്ദേശം. എന്നാല്‍ രാത്രിയോടെ കൂടുതല്‍ പോലീസിനെയും, കമാന്‍ഡോകളെയുമെത്തിച്ച് നിലയ്ക്കലും പമ്പയും നിയന്ത്രണവിധേയമാക്കാന്‍ ഉന്നതതലത്തില്‍ കൂടിയാലോചനകള്‍ നടക്കുന്നു. മുഖ്യമന്ത്രിയുടെ ഓഫീസില്‍ നിന്ന് എം.വി. ജയരാജന്‍ നേരിട്ടാണ് പോലീസ് ഏകോപനം നടത്തുന്നത്.

എല്ലാം ഭദ്രമെന്ന് ദേവസ്വം മന്ത്രി പറയുമ്പോഴും സ്ഥിതിഗതികള്‍ ഗുരുതരമായിക്കൊണ്ടിരിക്കുന്നു എന്നാണ് റിപ്പോര്‍ട്ടുകള്‍. ഏകോപനത്തിലും, സമവായത്തിലും പിഴച്ച സര്‍ക്കാര്‍ ഇപ്പോള്‍ പ്രശ്‌നത്തില്‍ നിന്ന് തടിയൂരാന്‍ പിടയുകയാണ്. ഇന്നലെവരെ കൃത്യമായ വാര്‍ത്തകള്‍ നല്കാതിരുന്ന മുഖ്യധാരാ മാധ്യമങ്ങള്‍ കൂട്ടത്തോടെയെത്തി. പോലീസ് രംഗം നിയന്ത്രണ വിധേയമാക്കുന്ന കാഴ്ചയൊക്കെ കൊട്ടിഘോഷിച്ചു. എന്നാല്‍ വിശ്വാസികള്‍ക്ക് തങ്ങള്‍ക്കനുകൂലമായ വാര്‍ത്തകള്‍ നല്കാതിരുന്ന മാധ്യമങ്ങളോടു പകയാണ്.
പകയാളുന്നു. പ്രക്ഷോഭത്തില്‍ കേരളം പിടയുന്നു. അയ്യപ്പമന്ത്രങ്ങള്‍ ഉയരേണ്ട സന്നിധാനം പോര്‍വിളിയില്‍ മുഖരിതമാകുന്നു. തുലാമാസ പൂജയില്‍ ചൈതന്യം നിറയേണ്ട പമ്പയും, സന്നിധാനവുമൊക്കെ വിറക്കുകയാണ്. തീര്‍ത്ഥാടകര്‍ ഭയപ്പാടിലാണ്. എപ്പോള്‍ വേണമെങ്കിലും പൊട്ടിത്തെറിക്കാന്‍ ശക്തിയോടെ പ്രക്ഷോഭം ആളിക്കത്തുന്നു.

വിശ്വഹിന്ദു പരിഷത്തും, ശിവസേനയുമൊക്കെ നിരവധിയാളുകളെ എത്തിക്കുന്നു. ഹിന്ദു ഐക്യവേദിയും, അയ്യപ്പസേവാ സമാജവുമൊക്കെ പ്രതേ്യകം പ്രതേ്യകം പ്രക്ഷോഭങ്ങളുമായി നീങ്ങുന്നു. നിലയ്ക്കല്‍ യുദ്ധക്കളമാണ്, പമ്പയും സംഘര്‍ഷ ഭൂമിയായി മാറി. കേരളത്തിന്റെ നെഞ്ചിലെ തീയായി മാറിയിരിക്കുന്നു നിലയ്ക്കലിപ്പോള്‍.