മഹാപ്രളയ ദുരിതാശ്വാസ ധനസമാഹരണത്തിന് നിശ്ചയിച്ച മന്ത്രിമാരുടെ വിദേശയാത്രയ്ക്ക് കേന്ദ്രം അനുമതി നിഷേധിച്ച സാഹചര്യത്തില്‍ തുടര്‍നടപടികളെന്തെന്ന് മുഖ്യമന്ത്രി പിണറായി വിജയന്‍ യു.എ.ഇയില്‍ നിന്ന് മടങ്ങിയെത്തിയ ശേഷം തീരുമാനിക്കും. ഇന്ന് പുലര്‍ച്ചെ യു.എ.ഇയിലേക്ക് പുറപ്പെട്ട മുഖ്യമന്ത്രി ഫണ്ട് സ്വരൂപിക്കല്‍ പര്യടനം പൂര്‍ത്തിയാക്കി 21നാണ് മടങ്ങിയെത്തുക.തല്‍ക്കാലത്തേക്കെങ്കിലും മന്ത്രിമാരുടെ യാത്രാപരിപാടി റദ്ദായിരിക്കുകയാണ്.

ഇനിയും കേന്ദ്രത്തില്‍ സമ്മര്‍ദ്ദം ചെലുത്തിയാല്‍ പ്രയോജനമുണ്ടാകുമോ, വിദേശസംഘടനകള്‍ക്ക് വീണ്ടും സജ്ജീകരണങ്ങളൊരുക്കാന്‍ ബുദ്ധിമുട്ട് വരുമോ എന്നതടക്കമുള്ള കാര്യങ്ങളെല്ലാം മടങ്ങിയെത്തിയ ശേഷം ആലോചിക്കാമെന്നാണ് മന്ത്രിമാരെ മുഖ്യമന്ത്രി അറിയിച്ചിട്ടുള്ളത്. മന്ത്രിമാരുടെ വിദേശയാത്രയ്ക്ക് അനുമതി നിഷേധിച്ചാലും തല്‍ക്കാലം കേന്ദ്രത്തിനെതിരായ വികാരം ഔദ്യോഗികതലത്തില്‍ പ്രകടിപ്പിക്കേണ്ടെന്നാണ് സര്‍ക്കാരിന്റെ നിലപാടെന്ന് സൂചനയുണ്ട്. കാരണം കേരളത്തിന്റെ പുനര്‍നിര്‍മ്മാണത്തിനുള്ള കേന്ദ്രസഹായം പൂര്‍ണതോതില്‍ ഇനിയും ലഭിക്കേണ്ടതുണ്ട്.

പ്രധാനമന്ത്രി നേരിട്ട് സമ്മതിച്ച സ്ഥിതിക്ക് കുറച്ച്‌ മന്ത്രിമാര്‍ക്കെങ്കിലും വിദേശയാത്രയ്ക്ക് അനുമതി കിട്ടുമെന്നാണ് മുഖ്യമന്ത്രി അവസാനനിമിഷം വരെയും പ്രതീക്ഷിച്ചത്. എന്നാല്‍, ചൊവ്വാഴ്ച സന്ധ്യയോടെ അനുമതിയില്ലെന്ന് വാക്കാല്‍ വിദേശമന്ത്രാലയം അധികൃതര്‍ ചീഫ്സെക്രട്ടറിയെ അറിയിക്കുകയായിരുന്നു. വിദേശ രാജ്യങ്ങളില്‍ നിശ്ചയിച്ച മലയാളി സംഗമങ്ങളും ഇതോടെ റദ്ദാക്കി. വിദേശയാത്ര വഴി 5000 കോടി രൂപ സമാഹരിക്കാനാണ് സര്‍ക്കാര്‍ ലക്ഷ്യമിട്ടത്. മുഖ്യമന്ത്രിയുടെ യാത്രയ്ക്ക് നിബന്ധനകളോടെ പ്രധാനമന്ത്രിയുടെ ഓഫീസ് അനുമതി നല്‍കിയിരുന്നു.