പോലീസ് വഴിയൊരുക്കി ന്യൂയോര്ക്ക് ടൈംസ് റിപ്പോര്ട്ടര് മല കയറി; പക്ഷെ അയ്യപ്പ ഭക്തര് കൂട്ടമായയെത്തിയതോടെ റിപ്പോര്ട്ടര് തിരിച്ചിറങ്ങി; യാത്ര അവസാനിപ്പിച്ചത് മരക്കൂട്ടത്തെ പ്രതിഷേധത്തെ തുടര്ന്ന്; യുവതിക്ക് നേരെ അസഭ്യ വര്ഷവും കയ്യേറ്റ ശ്രമവും
പൊലീസ് സംരക്ഷണത്തോടെ മലകയറിയ ന്യൂയോര്ക്ക് ടൈംസ് റിപ്പോര്ട്ടര് സുഹാസിനി രാജ് തിരിച്ചിറങ്ങി. മരക്കൂട്ടത്തില് യാത്ര അവസാനിപ്പിച്ച് സുഹാസിനി തിരിച്ച് ഇറങ്ങുകയായിരുന്നു. മരക്കൂട്ടത്തില് വച്ച് പ്രതിഷേധക്കാര് എതിര്പ്പുമായി രംഗത്തുവരുകയായിരുന്നു. സുഹാസിനിക്ക് നേരെ അസഭ്യ വര്ഷവും കയ്യേറ്റ ശ്രമവും ഉണ്ടായി. പൊലീസ് പരമാവധി സംരക്ഷണം ഉറപ്പു നല്കിയെങ്കിലും സുഹാസിനിക്കൊപ്പമുള്ള ന്യൂയോര്ക്ക് ടൈംസിലെ മാധ്യമ പ്രവര്ത്തകന് ഈ എതിര്പ്പുമറികടന്ന് പോകേണ്ട എന്ന തീരുമാനത്തിലെത്തുകയായിരുന്നു.
പ്രതിഷേധക്കാരില്ലാത്ത സമയം നോക്കിയാണ് നട തുറന്ന് രണ്ടാം ദിവസം യുപി സ്വദേശിനി സുഹാസിനി രാജും ഒരു വിദേശ യുവാവും സന്നിധാനത്തേക്ക് പോകാന് കാനന പാതയിലെത്തിയത്. കനത്ത പൊലീസ് സുരക്ഷയിലാണ് ഇവര് മല കയറിയത്. ദര്ശനത്തിനില്ല, ജോലി സംബന്ധമായ ആവശ്യത്തിനാണ് താന് സന്നിധാനത്തേക്ക് പോകുന്നതെന്ന് സുഹാസിനി പറഞ്ഞിരുന്നു.
പമ്പയില് നിന്നുള്ള പ്രവേശന കവാടം കടന്ന് മുന്നോട്ട് പോകുംവരെ പ്രശ്നങ്ങള് ഒന്നും ഉണ്ടായില്ല. അതുകഴിഞ്ഞ് പരമ്പരാഗത കാനനപാത പിന്നിട്ട് മുകളിലേക്ക് കയറിയതോടെപ്രതിഷേധക്കാര് തടഞ്ഞിരുന്നു. എന്നാല് കനത്ത പൊലീസ് സുരക്ഷയില് മുന്നോട്ട് പോകുകയായിരുന്നു.
നിരവധി അന്വേഷണാത്മക റിപ്പോര്ട്ടുകള് തയ്യാറാക്കിയ ഇന്വെസ്റ്റിഗേറ്റിവ് ജേണലിസ്റ്റാണ് സുഹാസിനി.
https://www.facebook.com/Malayalivartha
